រាជធានីភ្នំពេញ ៖ អ្វីដែលគួរឲ្យភ្ញាក់ផ្អើលនោះ គឺបុរសវ័យក្មេងរូបនេះ ហេតុអ្វីបានជាទ័លតម្រិះរហូតឲ្យប្រពន្ធលក់ខ្លួនបែបនេះ ។ តើមានបុរសខ្មែរប៉ុន្មាននាក់ ដែលបានប្រកាន់យកទង្វើបែបនេះ?
តើពិតជាមានបុរសខ្មែរបែបនេះមែនឬ? ដោយសារតែអត់លុយទិញទឹកដោះគោឱ្យកូនបៅ ក៏សម្រេចចិត្តឲ្យប្រពន្ធលក់ខ្លួនបម្រើផ្លូវភេទ តែក៏មានជន២នាក់ដែលមិនដឹងថា មានគំនុំរឿងអី្វនោះទេ បានយកកាំបិតទៅចាក់បុរសជាប្តីចំលចំខ្នងរងរបួសយ៉ាងដំណំ ។ ករណីនេះកើតឡើងកាលពីវេលាម៉ោងប្រមាណ១១និង១០នាទីយប់ថ្ងៃទី២៥ ខែមេសា នៅតាមមហាវិថីព្រះមុនីវង្ស ចំណុចមុខសាលារាជធានីភ្នំពេញ ស្ថិតក្នុងសង្កាត់វត្តភ្នំ ខណ្ឌដូនពេញ ។
ប្រភពព័ត៌មានពីបុរសឈ្មោះ អុឹង សុខា អាយុ១៩ឆ្នាំ ស្នាក់នៅម្តុំផ្សារសុរិយាម៉ល សង្កាត់ផ្សារថ្មី ខណ្ឌ
ដូនពេញបានឱ្យដឹងថា មុនពេលកើតហេតុ រូបគេបាននាំប្រពន្ធនិងកូនតូចម្នាក់ទៅម្តុំសណ្ឋាគាររ៉ូយ៉ាល់ ។ ដោយសារតែជីវភាពខ្វះខាត ទើបសម្រេចចិត្តឱ្យប្រពន្ធឈរលក់ខ្លួនដើម្បីយកលុយទៅទិញទឹកដោះគោឱ្យកូនបៅ ។ ខណៈនោះ ស្រាប់តែមានបុរស២នាក់ជិះម៉ូតូឌុបមិនដឹងថាមកពីណាទេ បានជិះក្រឡឹង២ទៅ
៣ជុំនៅម្តុំសណ្ឋាគារឡឺរ៉ូយ៉ាល់រួចក៏ឈប់ម៉ូតូ ។
ប្រភពដដែលនិយាយទៀតថា ពេលនោះបុរសម្នាក់ឈ្មោះ រុន ហៀង អាយុ៣៥ឆ្នាំ ស្នាក់នៅម្តុំគល់ស្ពានជ្រោយចង្វា និងមានស្រុកកំណើតនៅភូមិទួលរកា ឃុំរអាង ស្រុកកំពង់សៀម ខេត្តកំពង់ចាម ធ្វើពុតជាដេកលក់ ។ រីឯម្នាក់ទៀតឈ្មោះ យន្ត នី អាយុ៣៨ឆ្នាំ ស្នាក់នៅម្តុំគល់ស្ពានជ្រោយចង្វាដែរ បានយកកូនកាំបិតមកចាក់រូបគេចំខ្នង បណ្តាលឱ្យរបួសហូរឈាម ដែលមិនដឹងថា មានគំនុំរឿងអី្វនោះទេ ។
ភ្លាមៗនោះ រូបគេបានរត់និងស្រែកឱ្យគេជួយ ទើបសមត្ថកិច្ចធ្វើអន្តរាគមន៍ឃាត់ខ្លួនជនទាំង២នាំយកទៅប៉ុស្តិ៍នគរបាលវត្តភ្នំដើម្បីសាកសួរ ។ បុរសឈ្មោះ អុឹង សុខា អះអាងថា រូបគេពីមុនមកមិនដែលស្គាល់គ្នាជាមួយជនទាំង២នាក់នោះទេ ហើយក៏មិនដែលមានគំនុំអ្វីនឹងគ្នាដែរ ។ ក្រោយពេលកើតហេតុ បុរសដែលត្រូវគេចាក់ ដោយមិនចង់ឱ្យមានរឿងរ៉ាវវែងឆ្ងាយ ក៏សម្រេចចិត្តមិនដាក់ពាក្យបណ្តឹងឡើយ គ្រាន់តែឱ្យសមត្ថកិច្ចធ្វើការអប់រំជនទាំង២នាក់នោះ ។
មន្ត្រីនគរបាលបានឲ្យដឹងថា ពួកគេជាក្រុមជនអនាថាដូចគ្នា និងតែងមានជម្លោះវាយតប់គ្នារកហេតុផលមិនឃើញ គឺពួកគេប្រើជីវិតបែបនេះ ៕
ចែករំលែកព័តមាននេះ