ដោយ៖ ប្រេវីន
ប្រទេសកម្ពុជាកំពុងប្រឈមមុខនឹងការឡើងកម្តៅធ្ងន់ធ្ងរ ជាងពេលណាៗទាំងអស់ ។ មនុស្សគ្រប់គ្នាបានថ្ងូរអំពីបញ្ហានេះ ដែលកំពុងតែធ្វើអោយប៉ះពាល់ដល់ការរស់នៅប្រចាំថ្ងៃ សុខភាព ការប្រកបមុខ របរទទួលទាន និងការសិក្សារបស់សិស្សជាដើម ។
អគ្គិសនីកម្ពុជាមិនអាចផ្គត់ផ្គង់អគ្គិសនី ដែលមានតម្រូវការខ្ពស់នៅក្នុងរដូវក្តៅនេះ គួបផ្សំនឹងការថយចុះនៃការផលិតថាមពលអគ្គិសនីចេញពីវារីអគ្គិសនី។ សម្តេចតេជោហ៊ុន សែន បានសូមអោយមានការអនុគ្រោះចំពោះការខ្វះខាងអគ្គិសនីនៅពេលបច្ចុប្បន្ន ហើយក៏បានអំពាវនាវអោយមានការប្រើប្រាស់សន្សំសំចៃនិងមានវិធានការដោះស្រាយមួយចំនួន ដោយរួមមានការទិញម៉ាស៊ីនភ្លើង សម្រាប់ការប្រើប្រាស់នៅតាមក្រុម ហ៊ុន ឬផ្ទះជាដើម ។
នៅពេលដែលស្ថានភាពខ្វះខាតអគ្គិសនី កំពុងតែប៉ះពាល់ដល់មនុស្សគ្រប់គ្នានោះ វាក៏មានការលេចឮអំពីការដាច់អគ្គិសនីនៅមន្ទីរពេទ្យព្រះកុសមៈ ។ នេះជាបញ្ហាមួយ ដែលមិនគួរកើតមានឡើយ ។ មន្ទីរពេទ្យគឺជាទីកន្លែងសង្គ្រោះជីវិតមនុស្ស ដែលកំពុងតែមានសុខភាពទន់ខ្សោយស្រាប់ ។
ការខ្វះខាតអគ្គិសនីប្រើប្រាស់នឹងធ្វើអោយអ្នកជំងឺកាន់តែមានការលំបាក ហើយប៉ះពាល់ដល់ការព្យាបាលជំងឺរបស់ពួកគេ ។ ខណៈដែលមនុស្សសុខភាពល្អពិបាកទ្រាំនឹងកំដៅខ្លាំងបែបនេះ វានឹងកាន់តែធ្ងន់ធ្ងរទៀតសម្រាប់អ្នកជំងឺដែលមានសុខភាពទន់ខ្សោយ ។ សំខាន់ជាងនេះទៀត បើសិនជាមន្ទីរពេទ្យគ្មាន ភ្លើងប្រើប្រាស់ទេនោះ វានឹងអាចធ្វើអោយបាត់បង់ជីវិតមនុស្ស ដែលត្រូវការសង្គ្រោះបន្ទាន់បាន។ ពេលវាមានសារសំខាន់ណាស់ សម្រាប់មនុស្សដែលត្រូវការសង្គ្រោះបន្ទាន់ ។
វារឹតតែសំខាន់ទៀតនោះ គឺវាគ្រោះថ្នាក់ជាអាយុជីវិត បើសិនជាភ្លើងត្រូវបានដាច់នៅពេលដែលគ្រូពេទ្យ កំពុងតែដំណើរការវះកាត់សង្គ្រោះជីវិតមនុស្ស ។
ហេតុផលទាំងនេះ វាចាំបាច់ត្រូវធានាថា មន្ទីរពេទ្យត្រូវតែមានអាទិភាព នៅក្នុងការទទួលបានអគ្គិសនី ប្រើប្រាស់នៅក្នុងស្ថានភាពដ៏លំបាកនេះ។
នៅចំពោះមុខការខ្វះខាតនេះ ការបែងចែកអគ្គិសនី ប្រកបដោយប្រសិទ្ធភាព និងយុត្តិធម៌ គឺមានភាពចាំ បាច់ណាស់ ។ នេះគឺជាកិច្ចការដែលត្រូវធ្វើដោយអគ្គិសនីកម្ពុជា ។ ចំណែកស្ថាប័នរដ្ឋ ក្រុមហ៊ុន ឯកជន និងប្រជាជនទាំងអស់ ក៏ត្រូវចូលរួមចំណែកនៅក្នុងការដោះស្រាយបញ្ហា ខ្វះខាតអគ្គិសនីតាមរយៈការកាត់បន្ថយការប្រើប្រាស់អោយបានច្រើនបំផុត តាមដែលអាចធ្វើបាន ។
ការប្រើប្រាស់អគ្គិនី ដើម្បីបំភ្លី ការប្រើប្រាស់កង្ហារ និងម៉ាស៊ីនត្រជាក់ត្រូវកាត់បន្ថយអោយបានច្រើន បំផុត តាមដែលអាចធ្វើបាន ខណៈដែលត្រូវចៀសវាងដាច់ខាតការប្រើប្រាស់អគ្គិសនីខ្ជះខ្ជាយ ។
ទន្ទឹមជាមួយគ្នានោះ គេក៏អាចងាករកជម្រើសផ្សេងសម្រាប់ថាមពលអគ្គិសនីផងដែរ ដូចជាការប្រើប្រាស់ ថាមពលព្រះអាទិត្យជាដើម ។
ទាំងអស់គ្នាសុទ្ធតែអាចរួមចំណែកបាន ដើម្បីដោះស្រាយបានមួយផ្នែកអំពីការខ្វះខាតអគ្គិសនីប្រើប្រាស់នៅពេលដែលមានការឡើងកម្តៅខ្ពស់ពេលនេះ និងប៉ុន្មានខែទៅមុខទៀត ៕
ចែករំលែកព័តមាននេះ