រាជធានីភ្នំពេញ ៖ ថ្នាក់ដឹកស្ត្រីមកពីតំបន់ឥណ្ឌូប៉ាស៊ីហ្វិកថ្មីៗនេះបានចូលរួមសិក្ខាសាលាថ្នាក់តំបន់ស្តីពី «ស្ត្រី និងភាពជាអ្នកដឹកនាំ» ដើម្បីលើកកម្ពស់សមភាពយេនឌ័រ និងជំរុញសមាហរណកម្មនៅក្នុងតំបន់ឥណ្ឌូប៉ាស៊ីហ្វិក ដែលសិក្ខាកាមបានលើកឡើងថា វាជាវេទិកាល្អមួយ ព្រោះមានតែការជំរុញពីសំណាក់ស្ត្រីដូចគ្នា ទើបជាឧបករណ៍ដ៏មានថាមពលបំផុតក្នុងការកសាងទំនុកចិត្តរបស់ស្ត្រី ដើម្បីចាប់យកតួនាទីជាថ្នាក់ដឹកនាំ ។
សិក្ខាសាលាថ្នាក់តំបន់ស្តីពី «ស្ត្រី និងភាពជាអ្នកដឹកនាំ» ត្រូវបានរដ្ឋាភិបាលអូស្ត្រាលី បានប្រកាសបើកជាផ្លូវការ និងបានប្រព្រឹត្តទៅនៅក្នុងរាជធានីភ្នំពេញ កាលពីដើមខែ មេសានេះ ក្នុងទិសដៅគាំទ្រភាពជាអ្នកដឹកនាំរបស់ស្ត្រីទាំងក្នុងប្រទេស និងតំបន់។ សិក្ខាកាម ដែលជាអតីតនិសិត្សស្ត្រីអាហារូបរណ៍អូស្ត្រាលីជាង៧០រូបមកពី ប្រទេសកម្ពុជា ឥណ្ឌូនេស៊ី ឡាវ ភូមា ហ្វីលីពីន និងវៀតណាម បានចូលរួមសិក្ខាសាលានេះ ដើម្បីកសាងបណ្តាញ និងពង្រឹង សមត្ថភាពជាអ្នកដឹកនាំ។
លោកជំទាវ អេនជេលឡា ខកខឺរ៉េន ឯកអគ្គរាជទូតអូស្ត្រាលីប្រចាំកម្ពុជា មាន ប្រសាសន៍ថា៖ «រដ្ឋាភិបាលអូស្ត្រាលី មានការប្តេជ្ញាចិត្តខ្ពស់ក្នុងការគាំទ្រស្ត្រី ព្រមទាំង ពង្រឹងភាពជាអ្នកដឹកនាំ ការអភិវឌ្ឍអាជីពការងារ និងការផ្តល់សិទ្ធិអំណាចដល់ស្ត្រី នៅក្នុងតំបន់ឥណ្ឌូប៉ាស៊ីហ្វិក»។
គំនិតផ្តួចផ្តើមថ្មីនេះ បានផ្តល់ឱកាសដល់សិក្ខាកាម ឲ្យទទួលបានមធ្យោបាយ និងចំណេះដឹងថ្មីៗ ដើម្បីកាត់បន្ថយឧបសគ្គនានា ដែលរាំងស្ទះដល់ភាពជាអ្នកដឹកនាំរបស់ស្ត្រី។ សិក្ខាកាម ដែលសុទ្ធតែជាថ្នាក់ដឹកនាំស្ត្រីនៅក្នុងតំបន់ឥណ្ឌូប៉ាស៊ីហ្វិក បានឡើងធ្វើបទបង្ហាញក្នុងទម្រង់បែប TED Talk ដើម្បីចែករំលែកបទពិសោធន៍ អំពីចំណងភ្ជាប់រវាងការផ្តល់សិទ្ធិអំណាចដល់ស្ត្រី និងការអភិវឌ្ឍសេដ្ឋកិច្ចជាតិជាដើម។
សិក្ខាសាលារយៈពេល៣ថ្ងៃនេះ ទទួលបានចំណាប់អារម្មណ៍គួរឱ្យកត់សំគាល់ពីសិក្ខាកាម ។ លោកស្រី មួយលី វិច្ចិរ៉ា បានមានប្រសាសន៍ថា ចំណេះដឹង និងជំនាញដែលទទួលបាននៅក្នុងកម្មវិធីនេះ ពិតជាមានសារប្រយោជន៍ ដល់ការងារអ្នកស្រីក្នុងនាមជាមន្ត្រី ប្រឹក្សានៃ អង្គការពលកម្មអន្តរជាតិ(ILO)។
រីឯលោកស្រីបណ្ឌិត ហ័ង យិន វូ ដែលជាស្ថាបនិក អង្គការក្រៅរដ្ឋាភិបាលមួយនៅ ក្នុងប្រទេសវៀតណាម បង្ហាញចំណាប់អារម្មណ៍ថា៖ «សិក្ខាសាលានេះប្រមូលផ្តុំស្ត្រី ដែលមានឥទ្ធិពល និងអានុភាព ដែលអាចរួមចំណែកដល់ការផ្លាស់ ប្តូរជាវិជ្ជមាននៅក្នុងតំបន់»។ ចំណែក លោកស្រី ច័ន្ទ សុខអ៊ិនសុវណ្ណ មកពីប្រទេសឡាវ យល់ឃើញថា៖ «ការជំរុញពីសំណាក់ស្ត្រីដូចគ្នា គឺជាឧបករណ៍ដ៏មានថាមពលបំផុតក្នុងការកសាងទំនុកចិត្តរបស់ស្ត្រី ដើម្បីចាប់យកតួនាទីជាថ្នាក់ដឹកនាំ»។ លោកស្រីបញ្ជាក់ថា ខ្លួននឹងប្រើប្រាស់ចំណេះដឹង និងបណ្តាញទំនាក់ទំនងពីសិក្ខាសាលានេះនៅក្នុងអាជីពរបស់ខ្លួនជាទីប្រឹក្សាផ្នែកអភិវឌ្ឍន៍ សង្គមរបស់ធនាគារអភិវឌ្ឍន៍អាស៊ី។
សិក្ខាសាលាថ្នាក់តំបន់ស្តីពីស្ត្រី និងភាពជាអ្នកដឹកនាំ បានទទួលថវិកាឧបត្ថម្ភពីរដ្ឋាភិបាលអូស្ត្រាលី និងអនុវត្តដោយកម្មវិធីអាហារូបករណ៍អូស្ត្រាលីប្រចាំកម្ពុជា សហការ ជាមួយសមាគមអតីតនិស្សិតកម្ពុជាពីអូស្ត្រាលី។
អាហារូករណ៍អូស្ត្រាលី គឺជាអាហារូបរណ៍ផ្តល់ដោយរដ្ឋាភិបាលអូស្ត្រាលី ដែលផ្តល់ឱកាសដល់ពលរដ្ឋមកពីប្រទេសកំពុងអភិវឌ្ឍឲ្យទទួលបានការអប់រំពីសាកលវិទ្យាល័យលំដាប់ពិភពលោកនៅក្នុងប្រទេសអូស្ត្រាលី។ អាហារូបករណ៍ដែលមានកិត្យានុភាពនេះ វិវឌ្ឍមកពីកម្មវិធី Colombo Plan ក្នុងឆ្នាំ ១៩៥០ ហើយមានអតីតនិស្សិតជាច្រើនកំពុងបំពេញតួនាទីជាថ្នាក់ដឹកនាំក្នុងជួររដ្ឋាភិបាល វិស័យធុរកិច្ច និងអង្គការសង្គមស៊ីវិល។
រដ្ឋាភិបាលអូស្ត្រាលី គ្រោងបន្តការគាំទ្រដល់គំនិតផ្តួចផ្តើមនានាទាក់ទងទៅនឹងភាពជាអ្នកដឹកនាំរបស់ស្ត្រីនៅទូទាំងតំបន់ឥណ្ឌូប៉ាស៊ីហ្វិក និងធានាថាសមភាពយេនឌ័រ និងការផ្តល់សិទ្ធិអំណាចដល់ស្ត្រី និងក្មេងស្រី នៅតែជាចំណុចស្នូលរបស់កិច្ចការទូត ការ អភិវឌ្ឍ និង សន្តិសុខនៅក្នុងតំបន់៕
ចែករំលែកព័តមាននេះ