រាជធានីភ្នំពេញ ៖ បង្គោលភ្លើងជាប់ហាងលក់សាច់អាំង និងស៊ុបមួយកន្លែងត្រូវបានឆ្លងចរន្តផ្ទុះឆាបឆេះរាលដាលចេញជាផ្កាភ្លើងសន្ធោសន្ធៅ បង្កឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង៥ទៀបភ្លឺថ្ងៃទី២៦ ខែមេសា ឆ្នាំ២០១៩ ចំនុចប្រអប់ភ្លើងលេខ បត៣០០.៥០១A ទុលមុខហាងលក់សាច់អាំង និងស៊ុប ABC ផ្លូវ៩៥ កែង៣៦០ សង្កាត់បឹងកេងកង៣ ខណ្ឌចំការមន ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុមានការធំក្លិនឈ្ងៀមចេញមកពីប្រអប់ធំចែកចាយចរន្តអគ្គិសនីដែលនៅលើបង្គោលភ្លើងត្រង់ចំណុចកើតហេតុខាងលើ ។ បន្ទាប់មកក៏មានការផ្ទុះបែកចេញជាផ្កាភ្លើងនៅលើបង្គោលភ្លើងលេចចេញជាអណ្ដាតភ្លើងឆាបឆេះខ្សែភ្លើងយ៉ាងសន្ធោសន្ធៅ បណ្តាលឲ្យដាច់ចរន្តអគ្គិសនីតាមផ្ទះប្រជាពលរដ្ឋដែលរស់នៅជុំវិញកន្លែងកើតហេតុធ្វើអោយមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋដែលរស់នៅក្បែរកន្លែងកើតហេតុ និងអ្នកធ្វើដំណើរឆ្លងកាត់តាមផ្លូវឈប់ចោមរោមមើល ។
ភ្លាមៗនោះក៏មានប្រជាពលរដ្ឋបានយកបំពង់ពន្លត់អគ្គិភ័យមកបាញ់ពន្លត់អស់ជាច្រើនបំពង់ តែភ្លើងមិនរលត់ធ្វើការរាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យអោយចុះមកធ្វើការអន្តរាគមន៍បាញ់ពន្លត់អស់ទឹក១គ្រឿងទើបភ្លើងរលត់អស់ទៅវិញនៅម៉ោង៥និង២០នាទីថ្ងៃដដែល ដោយមិនមានប៉ះពាល់ដល់ផ្ទះបងប្អូនប្រជាពលរដ្ឋដែលនៅក្បែរនោះនោះទេ គ្រាន់តែរងការខូចខាតខ្សែភ្លើងអស់មួយចំនួនធំតែប៉ុណ្ណោះ។
ក្រោយពេលកើតហេតុបន្ទាប់ពីពន្លត់អគ្គិភ័យបាញ់ពន្លត់ជាស្ថាពរហើយក៏ឃើញមាន
មន្ត្រី EDC បានចុះទៅជួសជុលខ្សែភ្លើងវិញផងដែរ៕
ចែករំលែកព័តមាននេះ