អ្នកនិពន្ធ៖ ប្រេវីន
ជាង៦០ឆ្នាំនៃទំនាក់ទំនងការទូតរវាងប្រទេសកម្ពុជានិងប្រទេសចិន ទំនាក់ទំនងរវាងប្រទេសទាំងពីរ ត្រូវបានគេមើលឃើញថា បានរីកធំធាត់និងរឹងមាំជាងពេលណាៗទាំងអស់។
សម្តេចតេជោថ្មីៗនេះ បានក្លាយជាមេដឹកនាំពិភពលោកដំបូងគេ ដែលត្រូវមេដឹកនាំចិនអញ្ជើញអោយ
ទៅទស្សនកិច្ចផ្លូវការនៅប្រទេសចិន នៅដើមឆ្នាំ២០១៩ ។ ឥឡូវនេះ ជាលើកទីពីរនៅក្នុងឆ្នាំតែមួយដែល សម្តេចបានទៅដល់ទីក្រុងប៉េកាំង នៅថ្ងៃទី២៥ មេសា ដើម្បីចូលរួមកិច្ចប្រជុំ«វេទិកាខ្សែក្រវ៉ាត់ និងផ្លូវ» មុនពេលបំពេញទស្សនកិច្ចផ្លូវការនៅប្រទេសចិន។
ទស្សនកិច្ចខែមេសា ឆ្នាំ២០១៩នេះ បានក្លាយជាឱកាសមាសមួយទៀត សម្រាប់ពង្រឹងនិងធ្វើអោយលូតលាស់ដល់ទំនាក់ទំនងទ្វេរភាគីរវាងប្រទេសកម្ពុជានិងចិន ខណៈដែលសម្តេចនឹងជួបប្រជុំផង ដែរជាមួយមេដឹកនាំចិន ។
កាលពីដើមឆ្នាំ មេដឹកនាំចិនបានធ្វើការសន្យាផ្តល់ជំនួយ និងជំរុញវិនិយោគចិនកាន់តែច្រើនៅក្នុងប្រទេសកម្ពុជា ដោយធ្វើអោយសម្តេចតេជោហ៊ុន សែន រំភើបចិត្តនិងផ្តល់ការសន្យានយោបាយដ៏មុតមាំអំពីឆន្ទះនៃការថែរក្សា និងការធ្វើអោយរីកចម្រើនកាន់តែខ្លាំង ដល់ទំនាក់ទំនងទ្វេរភាគីដែលគេគិតថា នឹងបម្រើផលប្រយោជន៍គ្នាទៅវិញទៅមក ។
ខណ:ដែលមេដឹកនាំចិនបានសន្យាជួយបង្កើនការទិញអង្ករពីកម្ពុជាដល់៤សែនតោន និងសន្យាផ្តល់ជំនួួយឥតសំណាងប្រមាណ៦០០លានដុល្លារដល់កម្ពុជា ដើម្បីធ្វើការអភិវឌ្ឍន៍ប្រទេសកម្ពុជានៅចន្លោះឆ្នាំ២០១៩ ដល់២០២១ នៅក្នុងទស្សនកិច្ចលើកនោះ គេរំពឹងថា ទស្សនកិច្ចនៅខែមេសានេះ នឹងនាំប្រយោជន៍ជាច្រើនដល់កម្ពុជា ដូចកាលពីទស្សនកិច្ចផ្លូួវការរបស់សម្តេចកាលពីខែមករាដែរ ។
ទំនាក់ទំនងរឹងមាំខុសធម្មតារវាងកម្ពុជានិងចិន បានធ្វើអោយមានការរិះគន់ថា កម្ពុជាផ្អៀងខ្លាំងទៅរកប្រទេសចិន ដោយធ្វើអោយបាត់តុល្យភាពទំនាក់ទំនងរបស់ខ្លួនជាមួយប្រទេសផ្សេងពិសេសលោកខាងលិចដែលកាន់លទ្ធិប្រជាធិបតេយ្យ។ ប៉ុន្តែសម្តេចតេជោបានពន្យល់ជាច្រើនដងថា សម្តេចមិនមានភាព លម្អៀងទេ ហើយស្វាគមន៍គ្រប់ប្រទេស សម្រាប់សហប្រតិបត្តិការជាមួយកម្ពុជា។ កម្ពុជាស្វាគមន៍វិនិយោគិនមកពីគ្រប់ប្រទេស ។
ប្រជាជនកម្ពុជា និងសហគមន៍អន្តរជាតិនឹងតាមដានដោយយកចិត្តទុកដាក់ទស្សនកិច្ចរបស់សម្តេចតេជោនៅប្រទេសចិនលើកនេះ។ សម្រាប់ប្រជាជនកម្ពុជា ពួកគេចង់ដឹងថា ទស្សនកិច្ចលើកនេះនឹងនាំមកនូវផលប្រយោជន៍សេដ្ឋកិច្ច និងនយោបាយកម្រិតណាសម្រាប់ប្រទេសកម្ពុជា ខណៈដែលសហគមន៍ អន្តរជាតិប្រហែលជាផ្តោតខ្លាំងទៅលើទំនាក់ទំនងនយោបាយរវាងប្រទេសទាំងពីរ ។
តែប៉ុន្មានថ្ងៃមុនពេលទស្សនកិច្ចរបស់សម្តេចតេជោទៅកាន់ប្រទេសចិននោះ អាមេរិកតាមរយៈស្ថានទូតរបស់ខ្លួនប្រចាំនៅកម្ពុជា បានចេញផ្សាយសារដ៏ចាក់ដោតមួយ ដោយលើកឡើងថា ទំនាក់ទំនងពាណិជ្ជកម្មចិន និងកម្ពុជាផ្តល់ផលប្រយោជន៍ដល់ចិនច្រើនជាង ។
ចំណែកស្ថានទូតចិននៅប្រទេសកម្ពុជា បានប្រតិកម្មតបវិញថា អោយប្រជាជនកម្ពុជាមានការប្រយ័ត្នចំពោះអ្វីដែលអាមេរិកបាននិយាយហើយចិនក៏ចោទសួរវិញថា តើអាមេរិកបានធ្វើអ្វីខ្លះសម្រាប់កម្ពុជា
ខណៈដែលចិនបានបង្ហាញពីសមិទ្ធផលជាច្រើន ដូចជាស្ពាននិងផ្លូវថ្នល់ដែលកើតចេញពីទំនាក់ទំនងល្អរវាងចិននិងកម្ពុជា ។
ដូច្នេះ នៅពេលដែលសម្តេចតេជោដឹកនាំគណៈប្រតិភូជាន់ខ្ពស់មួយ ក្រុមបំពេញទស្សនកិច្ចនៅចិនលើកនេះ ក្រសែភ្នែកជាតិនិងអន្តរជាតិនឹងបន្តតាមដានដោយយកចិត្តទុកអំពីលទ្ឋផលនៃទស្សកិច្ចលើកនេះ ៕
ចែករំលែកព័តមាននេះ