ខេត្តកំពង់ស្ពឺ ៖ លោកហ៊ុន ម៉ាណែត ផ្តាំផ្ញើនិស្សិតនាយទាហានសកម្មត្រូវយកសមត្ថភាពជំនាញ ដើម្បីការពារប្រទេសជាតិ និងបម្រើប្រជាពលរដ្ឋ ដែលថ្លែងនៅក្នុងពិធីសម្ពោធក្លោងទ្វារសាលាអគារស្នាក់នៅរបស់សិក្ខាកាមនិស្សិតនាយទាហានសកម្មជំនាន់ទី២២-២៣ នៅសាលានាយទាហានសកម្មស្រុកឧត្តុង្គ ខេត្តកំពង់ស្ពឺ កាលពីថ្ងៃទី២៤ ខែមេសា ឆ្នាំ២០១៩កន្លងទៅនេះអគ្គមេបញ្ជាការរងលោកហ៊ុន ម៉ាណែត បានផ្តាំផ្ញើរដល់និស្សិតនាយទាហានសកម្មទាំងអស់ត្រូវយកសមត្ថភាពជំនាញរបស់ខ្លួនដែលទទួលបានពីការបណ្តុះបណ្តាលនេះទៅការពារប្រទេសជាតិ និងបម្រើប្រជាពលរដ្ឋ ។
លោកហ៊ុន ម៉ាណែត ក៏បានលើកទឹកចិត្តរួមទាំងកោតសរសើរផងដែរ ចំពោះការសម្រេចចិត្តចូលបម្រើក្នុងជួរកងទ័ព ខណៈដែលបច្ចុប្បន្នវិស័យការងារ គឺមានជម្រើសច្រើនណាស់ទាំងការងាររដ្ឋ ការងារឯកជន ស្ថាប័នអង្គការ NGOផ្សេងៗ ។ ដោយឡែកការជ្រើសរើសវិស័យ យោធាដែលប្អូនៗខិតខំប្រឹងប្រែងរៀនសូត្រត្រៀមប្រលងរហូតទទួលបានជោគជ័យសំខាន់ឆន្ទៈជំហររឹងមាំមិនបោះបង់រត់ចោលការសិក្សាការហ្វឹកហាត់ គឺបង្ហាញពីតម្លៃនៃឱកាសដែលប្អូនៗរៀននៅសាលានេះ ។
លោកហ៊ុន ម៉ាណែត ថ្លែងបញ្ជាក់ថា អ្នកដែលបានមកអង្គុយនៅលើកៅអីនេះ គឺជាឱកាសមាសព្រោះកៅអីនីមួយៗមានតម្លៃណាស់មិនអាចកាត់ថ្លៃបានដោយហេតុថា និស្សិតដែលទទួលបានជោគជ័យនៅថ្ងៃនេះ គឺមានការប្រកួតប្រជែងប្រកបដោយមោទនភាពខ្លួនឯងក្នុងចំណោមមនុស្សរាប់ពាន់រាប់ម៉ឺននាក់ ។ ការជាប់នេះ គឺជាប់ដោយការប្រកួតប្រជែងជាប់ដោយមោទនភាព ហើយបើធ្លាក់ គឺធ្លាក់ដោយអស់ចិត្ត នេះជាការប្រកួតប្រជែងដោយយុត្តិធម៌ ។
លោកមានប្រសាសន៍បន្ថែមថា ការដែលប្រឡងជាប់ពេលនេះទើបធ្វើអោយខ្លួនយើងដឹងពីសមត្ថភាពខ្លួនឯងថា យើងខ្លាំងប៉ុណ្ណា ហើយក៏ជាឱកាសមាសមួយទៀតដែលយើងទទួលបានការបណ្តុះបណ្តាលនៅមជ្ឈមណ្ឌលអប់រំដែលផ្តល់ចំណេះវិជ្ជាជំនាញដែលសាលាឯកជនផ្សេងមិនមាន គឺយុទ្ធវិធី និងចំណេះដឹងយោធា ហើយរៀនជានាយទាហានទទួលបានអាជីពយោធាកសាងមនុស្សឱ្យមានវិន័យ សណ្តាប់ធ្នាប់ មានការទទួលខុសត្រូវម៉ឺងម៉ាត់ និងមានភាពជាអ្នកដឹកនាំ ។
លោកហ៊ុន ម៉ាណែត ក៏បានឲ្យដឹងដែរថា ដើម្បីក្លាយជាអ្នកទទួលខុសត្រូវ ឬជាមេ គឺចាំបាច់ត្រូវដឹងពីមូលដ្ឋានគ្រឹះ ហើយបើចង់រៀនថ្នាក់អនុបណ្ឌិតត្រូវឆ្លងកាត់ពីបរិញ្ញាបត្រជាមុនសិន ចង់ក្លាយជានាយទាហានថ្នាក់មធ្យម ថ្នាក់ឧត្តម ដែលមានមូលដ្ឋានគ្រឹះរឹងមាំទាល់តែច្បាស់ពីនាយទាហានបឋមជាមុនសិន ។ ចំណែកនាយទាហាននីមួយៗក៏ត្រូវយល់ពីវិន័យសណ្តាប់ធ្នាប់ការយល់ដឹងពីការគ្រប់គ្រងខ្លួនឯងយល់ពីកងទ័ពយល់ពីខ្លួនឯងយល់ពីការទទួលខុស ត្រូវក្នុងនាមជានាយទាហានដឹកនាំពលទាហាន ។
ទន្ទឹមនោះនាយទាហានដែលចេញពីសាលានាយទាហានសកម្ម និងនាយទាហានជើងគោក ដែលបញ្ចប់ការសិក្សាចេញពីសាលាគ្រប់គ្រងត្រឹមត្រូវមានមូលដ្ឋានច្បាស់លាស់ គឺមានឱកាសច្រើននៅក្នុងការកសាងភាពជោគជ័យ ប៉ុន្តែក៏វាអាស្រ័យទៅលើយុទ្ធវិធីរៀនធ្វើជាមេគេ និងការងារទទួលខុសត្រូវផងដែរ ។ លោកបញ្ជាក់បន្ថែមថា និស្សិតនាយទាហានដែលចេញពីសាលានាយទាហានសកម្មមានឱកាសច្រើននៅក្នុងការទទួលបានភាពជោគជ័យនៅក្នុងការប្រើប្រាស់យុទ្ធវិធី ជំនាញ និងភាពជាអ្នកដឹកនាំ ៕
ចែករំលែកព័តមាននេះ