ឮស្នូរផ្ទុះកណ្តាលទន្លេ…អណ្តាតភ្លើងខ្មួលខ្មាញ់ចេញពីនាវាទេសចរណ៍នេះ
- ភ្នំពេញ
រាជធានីភ្នំពេញ ៖ នាវាទេសចរណ៍អន្តរជាតិធុនមធ្យមមួយគ្រឿងមានកម្ពស់៣ជាន់បានត្រូវភ្លើងឆាបឆេះផ្នែកខាងក្រោយហុយផ្សែងខ្មៅទ្រលោមឡើងទៅលើអាកាស អស់រយៈពេលជាច្រើនម៉ោង ពេលចតនៅកណ្តាលទន្លេ ។ មុនពេលមានភ្លើងឆេះនេះ គេឮសំឡេងផ្ទុះលាន់ឡើងដូចផ្ទុះបំពង់ហ្កាស និងបង្កឱ្យមានការភ្ញាក់ផ្អើលឡើង កាលពីវេលាម៉ោង៥និង៥៥នាទីល្ងាចថ្ងៃទី២៣ ខែមេសា នៅកណ្តាលទន្លេ ត្រើយខាងកើត ក្នុងសង្កាត់ជ្រោយចង្វា ខណ្ឌជ្រោយចង្វា ។
បុរសម្នាក់ដែលបានឃើញហេតុការណ៍ផ្ទាល់ភ្នែកនិយាយថា នាល្ងាចថ្ងៃនោះខណៈរូបគាត់កំពុងអង្គុយលំហែកាយនៅមាត់ច្រាំងទន្លេប៉ែកខាងលិចក្បែរកំពង់ផែទីតានិក ជាមួយនឹងមិត្តភក្តិម្នាក់រួមជាមួយមនុស្សម្នាច្រើនទៀត ស្រាប់តែមានសំឡេងផ្ទុះមួយលាន់ដូចសំឡេងផ្ទុះបំពង់ហ្កាស ចេញពីនាវាទេសចរណ៍មួយគ្រឿងនោះ ។
ប្រភពដដែលបន្តថា ក្រោយពីមានសំឡេងផ្ទុះលាន់ឮចេញពីនាវាទេសចរណ៍ខាងលើហើយ ស្រាប់តែពួកគាត់ឃើញមានផ្សែងខ្មៅហុយទ្រលោមនៅផ្នែកខាងក្រោយ មើលពីចម្ងាយទៅគួរឱ្យបះសក់ និងឃើញមានមនុស្សរត់ប្រសេចប្រសាចនាំគ្នាមកឈរនៅផ្នែកខាងមុខនាវានោះ ទើបធ្វើឱ្យមានការភ្ញាក់ផ្អើលឡើងថា «នាវានោះត្រូវភ្លើងឆេះ» ។
ភ្លាមនោះ កម្លាំងនគរបាលចរាចរណ៍ផ្លូវទឹក ដែលឈរជើងនៅក្បែរៗនោះបានចេញអូប័រ២គ្រឿងទៅជួយអន្តរាគមន៍បាញ់ទឹកពន្លត់ទាន់ពេលវេលា ។ ប្រភពព័ត៌មានពីបុរសម្នាក់ជាសន្តិសុខយាមសួនបានឱ្យដឹងថា នាវាទេសចរណ៍ធុនធំមួយគ្រឿងនេះ ជានាវាខ្នាតអន្តរជាតិដែលតែងតែដឹកភ្ញៀវបរទេសកម្សាន្តតាមដងទន្លេ និងចូលមកសំចតនៅរាជធានីភ្នំពេញ ទំនងដឹកភ្ញៀវបរទេសមកពីប្រទេសវៀតណាម ចូលមកលេង
ស្រុកខ្មែរ រួចហើយបើកយកទៅចតនៅកណ្តាលទន្លេ ។
ពាក់ព័ន្ធទៅនឹងករណីភ្លើងឆេះនាវាដឹកភ្ញៀវទេសចរមួយគ្រឿងនេះដែរ មិនមានអ្នកណាម្នាក់បានដឹងថា កើតឡើងដោយសារមូលហេតុអ្វីឱ្យប្រាកដឡើយ គឺពុំអាចស្វែងរកការបំភ្លឺបានទេ ហើយក៏មិនបានដឹងថារងការខូចខាតគិតជាទឹកប្រាក់អស់ប៉ុន្មានដែរ ប៉ុន្តែមិនមានប៉ះពាល់ដល់អាយុជីវិតអ្នកជិះណាម្នាក់ឡើយ ៕
ចែករំលែកព័តមាននេះ