រាជធានីភ្នំពេញ ៖ ការលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ និងការលុបបំបាត់នូវភាពអសកម្មទាំងឡាយក្នុងសង្គម គឺជាការងារអប់រំសង្គមដែលមានភាពលំបាកស្មុគស្មាញ ហើយការងារនេះមិនអាចអនុវត្តដោយក្រសួងឬស្ថាប័នណាមួយដោយឡែកបានទេ ។ មានន័យថា យើងត្រូវការឱ្យមានការចូលរួមដោះស្រាយទាំងអស់គ្នា ទាំងស្ថាប័ននីតិប្បញ្ញតិ្ត នីតិប្រតិបត្តិ តុលាការ ដៃគូអភិវឌ្ឍន៍ សង្គមស៊ីវិល ផ្នែកឯកជន ក៏ដូចជាប្រជាជនគ្រប់រូប ។
នេះជាការលើកឡើងរបស់លោកជំទាវវេជ្ជបណ្ឌិត អុឹង កន្ថាផាវី រដ្ឋមន្ត្រីក្រសួងកិច្ចការនារីនិងជាប្រធានគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ នៅក្នុងសន្និបាតបូកសរុបការងារលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ឆ្នាំ២០១៧-២០១៨ និងលើកទិសដៅឆ្នាំ២០១៩- ២០២០ កាលពីថ្ងៃទី២៤ ខែមេសា នៅសណ្ឋាគារភ្នំពេញ ។
លោកជំទាវរដ្ឋមន្ត្រីថ្លែងទៀតថា មានន័យថា យើងត្រូវការឱ្យមានការចូលរួមដោះស្រាយទាំងអស់គ្នា ទាំងស្ថាប័ននីតិប្បញ្ញតិ្ត នីតិប្រតិបត្តិ តុលាការ ដៃគូអភិវឌ្ឍន៍ សង្គមស៊ីវិល ផ្នែកឯកជន ក៏ដូចជាប្រជាជនគ្រប់រូប ។ ជាមួយនេះដែរ ការងារសីលធម៌សង្គមគឺជាការងារដែលពាក់ព័ន្ធដល់ការផ្លាស់ប្តូរអាកប្បកិរិយា ក៏ដូចជាផ្នត់គំនិតរបស់ប្រជាជន និងជាការងារមួយដែលមិនអាចធ្វើដោយតក់ក្រហល់ ហើយសម្រេចបានជោគជ័យនៅក្នុងរយៈពេលខ្លីបានឡើយ ។
ការងារនេះទាមទារនូវពេលវេលា គួបផ្សំនឹងទស្សនៈរួមរបស់សង្គម ព្រមទាំងការប្តេជ្ញាចិត្តខ្ពស់ពីគ្រប់មជ្ឈដ្ឋាននៅគ្រប់កម្រិត ដោយបន្តលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ដែលជាកត្តារួម ចំណែកធ្វើឱ្យមានសមធម៌ បរិយាប័ន្ន សុខុមាលភាពគ្រួសារ និងសង្គម ។
ការមកដល់នូវសកល ភាវូប នីយកម្ម ក៏បាននាំមកឱ្យប្រទេសជាតិនូវការរីកចម្រើន និងបញ្ហាប្រឈមជាច្រើនទៀត ដែលរួមមានជាអាទិ៍ ការប្រកួតប្រជែងរកការងារធ្វើ ការឈ្លក់វង្វេងនឹងគ្រឿងញៀន ជាតិស្រវឹង ភាពជាមនុស្សទំនើង ការផ្សព្វផ្សាយរូបភាពអាសអាភាសតាមរយៈប្រព័ន្ធអេឡិចត្រនិក ដែលបង្កឡើងនូវការរំលោភបំពាន ការកេងប្រវ័ញ្ចគ្រប់ប្រភេទ អំពើហិង្សា ការជួញដូរមនុស្ស ការប្រព្រឹត្តអំពើ អនាចារ ដែលធ្វើឱ្យប៉ះពាល់ដល់សុខភាព អាយជីវិត សណ្តាប់ធ្នាប់សង្គម និងដាក់សម្ពាធយ៉ាងធ្ងន់ដល់គ្រួសារសហគមន៍ និងសង្គមជាតិ ។
លោកជំទាវរដ្ឋមន្ត្រី អុឹង កន្ថាផាវី បានបញ្ជាក់ថា បច្ចុប្បន្ននេះទិដ្ឋភាពទូទៅ ទាំងនយោបាយ សន្តិសុខ សណ្តាប់ធ្នាប់សាធារណៈ សេដ្ឋកិច្ច សង្គមកិច្ច ប្រជាធិបតេយ្យ សិទិ្ធសេរីភាព និងនីតិរដ្ឋ កំពុងមានការវិវត្តប្រកបដោយភាពវិជ្ជមាន ធ្វើឱ្យសាធារណមតិជាតិនិងអន្តរជាតិវាយតម្លៃថា កម្ពុជាកំពុងមានការផ្លាស់ប្តូរយ៉ាងល្អប្រសើរ រួមទាំងការគោរពសិទ្ធិ និងសេចក្តីថ្លៃថ្នូររបស់មនុស្សជាតិ ។ ជាពិសេស លើការលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ដែលជាកត្តារក្សាបាននូវប្រពៃណី ទំនៀមទម្លាប់ វប្បធម៌ និងអរិយធម៌ដ៏ល្អប្រពៃរបស់ប្រជាជនខ្មែរទៅថ្ងៃអនាគត ។
ឆ្នាំ២០១៩នេះ គឺជាឆ្នាំទី១របស់រាជរដ្ឋាភិបាលនីតិកាលទី៦នៃរដ្ឋសភា ។ ការជួបជុំនាពេលនេះ គឺជាឱកាសសម្រាប់យើងទាំងអស់គ្នា ក្នុងការពិនិត្យមើលឡើងវិញនូវសមិទ្ធផលនានាដែលសម្រេចបានក្នុងឆ្នាំ២០១៧ -២០១៨កន្លងមក និងពិភាក្សាផ្លាស់ប្តូរយោបល់លើចំណុចខ្វះខាត ព្រមទាំងបញ្ហាប្រឈមដែលនៅសេស សល់ ដើម្បីដាក់ចេញនូវយុទ្ធសាស្ត្រ និងវិធានការថ្មីៗដ៏មានប្រសិទ្ធភាពបន្ថែមទៀត សំដៅជំរុញការអនុវត្តផែនការលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរប្រកបដោយជោគជ័យ ។
តាងនាមឱ្យបងប្អូនស្ត្រីខ្មែរ លោកជំទាវសូមសម្តែងនូវការគោរពដឹងគុណយ៉ាងជ្រាលជ្រៅជូនចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធានកិត្តិយស ដែលបានបង្កលក្ខណៈឱ្យប្រជាជនរស់នៅក្នុងសង្គមជាតិមួយមានសុខសន្តិភាព និងការអភិវឌ្ឍ ។
ជាសក្ខីភាព បងប្អូនស្ត្រីនិងប្រជាជនកម្ពុជា បានបង្ហាញនូវឆន្ទៈគាំទ្រ និងបន្តបោះឆ្នោតជូនសម្តេចតេជោ ដើម្បីបន្តដឹកនាំនាវាកម្ពុជា និងធានាបានសុខសន្តិភាព ស្ថិរភាព ធ្វើឱ្យប្រជាជនគ្រប់រូបបានរស់នៅជួបជុំក្រុមគ្រួសារ និងបន្តអភិវឌ្ឍន៍ជីវភាពរស់នៅរបស់ប្រជាជន ប្រកបដោយភាពរីកចម្រើនជឿនលឿនតទៅមុខ ៕
ចែករំលែកព័តមាននេះ