រាជធានីភ្នំពេញ ៖ ឆ្លងចរន្តអគ្គិសនីឆេះប្រអប់កុងទ័រនៅលើបង្គោលភ្លើងយ៉ាងសន្ធោសន្ធៅបង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងរថយន្តពន្លត់អគ្គិភ័យចុះមកអន្តរាគមន៍ កាលពីវេលាម៉ោង១រំលងអធ្រាត្រឈានចូលថ្ងៃទី២៥ ខែមេសា ឆ្នាំ២០១៩ ត្រង់ចំណុចខាងមុខខ្លោងទ្វារ វត្តញាណរង្សី តាមបណ្ដោយផ្លូវ៣៥៥ ស្ថិតក្នុងសង្កាត់ទួលសង្កែទី២ ខណ្ឌឬស្សីកែវ ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេមានធំក្លិនឈ្ងៀមចេញមកពីបង្គោលភ្លើងនៅត្រង់ចំណុចកើតហេតុខាងលើ ។ បន្ទាប់មកក៏មានការផ្ទុះបែកចេញជាផ្កាភ្លើងចេញមកពីប្រអប់កុងទ័រភ្លើងនៅលើបង្គោលភ្លើងលេចចេញជាអណ្ដាតភ្លើងឆាបឆេះប្រអប់កុងទ័រភ្លើងយ៉ាងសន្ធោសន្ធៅ បណ្តាលឲ្យដាច់ចរន្តអគ្គិសនីតាមផ្ទះប្រជាពលរដ្ឋដែលរស់នៅជុំវិញកន្លែងកើតហេតុ ។ បង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋនាំគ្នាចេញមកពីផ្ទះ និងបានរាយការណ៍ជូនសមត្ថកិច្ចមូលដ្ឋានអោយចុះមកធ្វើការអន្តរាគមន៍ ។
មួយស្ទុះមកក្រោយមកអណ្ដាតភ្លើងក៏បានឆេះរាលដាលដល់ខ្សែភ្លើង និងខ្សែកាបអ៊ីនធើណេតកាន់តែខ្លាំងឡើងៗ ប៉ុន្តែមិនឃើញសមត្ថកិច្ចមូលដ្ឋានជួយចុះមកអន្តរាគមន៍ឲ្យបានឆាប់រហ័សនោះទេ ។ ប្រជាពលរដ្ឋមានការភ័យខ្លាចអណ្ដាតភ្លើងឆាបឆេះរាលដាលដល់ផ្ទះរបស់ពួកគេជា បន្តទៀតទើបប្រញាប់ប្រញាល់នាំគ្នាយកបំពង់ពន្លត់អគ្គិភ័យ៤ទៅ៥បំពង់យកទៅបាញ់ពន្លត់អណ្តាតភ្លើងតែមិនរលត់នោះទេ ប្រជាពលរដ្ឋក៏មិនអាចបាញ់ទឹកពន្លត់ភ្លើងបានដែរ ព្រោះតែបង្គោលភ្លើងកើតហេតុនៅមានចរន្តអគ្គិសនីនៅឡើយ ។
ដោយគ្មានសមត្ថភាពក្នុងការពន្លត់អណ្ដាតភ្លើងខាងលើប្រជាពលរដ្ឋក៏បានត្រឹមនាំគ្នាឈរមើលអណ្តាតភ្លើងទាំងអារម្មណ៍ភ័យខ្លាច និងរង់ចាំសមត្ថកិច្ចមូលដ្ឋានចុះមកធ្វើការទាក់ទងឲ្យខាងជំនាញអគ្គិសនីធ្វើការផ្តាច់ចរន្តទើបអាចបាញ់ទឹកពន្លត់បាន ។ មួយស្ទុះធំក្រោយមកខណៈពេលដែលអណ្ដាតភ្លើងបានចុះអន់ថយទើបឃើញមានសមត្ថកិច្ចមូលដ្ឋានបានចុះមកដល់ និងធ្វើការទាក់ទងឲ្យជំនាញអគ្គិសនីធ្វើការតចរន្ត រួមទាំងទាក់ទងហៅរថយន្តពន្លត់អគ្គិភ័យឲ្យចុះមកធ្វើការអន្តរាគមន៍ជាបន្តទៀត ។ បន្ទាប់មកក៏មានរថយន្តពន្លត់អគ្គិភ័យរបស់ស្នងការរដ្ឋាននគរបាលរាជធានីភ្នំពេញចំនួនមួយគ្រឿងបានចុះមកដល់កន្លែងកើតហេតុបាញ់ទឹកពន្លត់តែបន្តិចក៏រលត់ទៅវិញជាស្ថាពរ ។
ចំពោះការឆេះខូចខាតមិនបានបង្កឲ្យឆេះរាលដាលដល់ផ្ទះប្រជាពលរដ្ឋនោះទេ គឺឆេះខូចខាតតែប្រអប់កុងទ័រនៅលើបង្គោល និងខ្សែភ្លើងរួមទាំងខ្សែអ៊ីនធើណេតបានបណ្ដាលឲ្យផ្ទះរបស់ប្រជាពលរដ្ឋដែលរស់នៅក្នុងតំបន់ខាងលើដាច់ចរន្តអគ្គិស និងងងឹតសូន្យឈឹង ៕
ចែករំលែកព័តមាននេះ