តើ​សេវាកម្ម​បង់​រំលស់​ផ្ដល់​អត្ថប្រយោជន៍​អ្វី ដល់​ពលរដ្ឋ​និង​សេដ្ឋកិច្ច ?


រាជធានី​ភ្នំពេញ ៖ នា​ពេល​បច្ចុប្បន្ន​នេះ​សេវាកម្ម​បង់​រំលស់ ត្រូវ​បាន​គេ​សង្កេត​ឃើញ​ថា មានការ​រីក​ដុះដាល​ខ្លាំង​នៅ​ក្នុង​ទីផ្សារ​ប្រទេស​កម្ពុជា ក្នុង​នោះ​រាប់​ចាប់តាំងពី​សេវាកម្ម​បង់​រំលស់​របស់របរ​ប្រើប្រាស់​ប្រចាំ​ថ្ងៃ គ្រឿងយន្ត រហូត​ដល់​រំលស់​អចលនទ្រព្យ​ជាដើម ។ បើសិនជា​សេវាកម្ម​នេះ កាន់តែ​រីកសាយ​ខ្លាំង​នៅ​កម្ពុជា តើ​វា​ចំណេញ​អ្វី​ដល់​ពលរដ្ឋ ជា​ពិសេស​សេដ្ឋកិច្ច ឬ​អាច​មាន​ផល​ប៉ះពាល់​យ៉ាងម៉េច ?

បើ​តាម​លោក ង៉ែត ជូ ទីប្រឹក្សា​សេដ្ឋកិច្ច នៃ​ក្រុមហ៊ុន Emerging Markets Consulting បានអោយ​ដឹង​ថា ការ​ទិញរ​បស់បង់​រំលស់​ជា​ការ​ល្អ​ហើយ បើសិនជា​របស់​នោះ​ជា​របស់​ចាំបាច់ ហើយ​អ្នក​ប្រើប្រាស់​សេវាកម្ម​បង់​រំលស់​នោះ​យក​ទៅ​ធ្វើ​អ្វី​ដែល​មាន​ប្រយោជន៍ តែបើ​សិន​ចេះ​តែ​ទិញ​បង់​រំលស់​របស់​ដែល​មិន​ចាំបាច់​វា​មាន​ផល​ប៉ះពាល់​ធ្ងន់ធ្ងរ​ទៅ​វិញ​ទេ ។ លោក ង៉ែត ជូ មាន​ប្រសាសន៍​បញ្ជាក់​ថា « វា​ជា​ការ​ល្អ​ហើយ​ដែល​មាន​សេវាកម្ម​បង់​រំលស់​នៅ​កម្ពុជា ប៉ុន្តែ​បើសិនជា​អ្នក​ប្រើប្រាស់​សេវាកម្ម​បង់​រំលស់ តែ​របស់​ណា​ដែល​មិន​បាន​ផ្ដល់​ប្រយោជន៍​ដល់​យើង​វិញ​ក៏​វា​មិន​ប្រសើរ​ដែរ ជាក់ស្ដែង​ដូច​ជា​បង់​រំលស់​ទូរស័ព្ទ​ដៃ​ដើម្បី​ឡើង​ស៊េរី បង់​រំលស់​ម៉ូតូ​ថ្មី ខណៈ​ខ្លួន​ក៏​មាន​ម៉ូតូ​ប្រើ​រួច​ហើយ​ជាដើម »​។ លោក​បន្ត​ថា​សម្រាប់​ប្រទេស​ដែល​ជា​អ្នក​ផលិត ហើយ​គេ​លក់​បង់​រំលស់​ទៅ​ពលរដ្ឋ​គេ វា​ជា​ការ​ប្រសើរ​ណាស់ ព្រោះ​មិន​ចាំបាច់​ចំណាយ​លុយ​លើ​ការ​នាំ​ចូល​របស់​ទាំងនោះ​មក​លក់​បង់​រំលស់ និង​ចំណាយ​ថ្លៃ​ការ​ប្រាក់​ទៅ​ប្រទេស​គេ​វិញ តែ​សម្រាប់​ប្រទេស​កម្ពុជា ជា​ប្រទេស​នាំ​ចូល​នូវ​សម្ភារៈ​ភាគច្រើន​មក​ផ្គត់ផ្គង់​ទីផ្សារ ដូច្នេះ អ្នក​ដែល​ចង់​ប្រើរ​បស់បង់​រំលស់​ក៏​គួរតែ​គិតគូរ​អោយ​បាន​ច្បាស់លាស់​ផង​ដែរ ។

លោក​បន្ថែម​ទៀត​ថា បើ​ក្រលេក​ទៅ​មើល​អាជីវកម្ម​បង់​រំលស់​នានា នៅ​ក្នុង​ប្រទេស​កម្ពុជា​ធៀប​នឹង​ប្រទេស​ជិតខាង ជា​ពិសេស​ប្រទេស​ថៃ ឃើញ​ថា​កម្ពុជា​នៅ​មាន​កម្រិត​ទាប​ជាង​ប្រទេស​គេ តែ​យើង​ត្រូវ​ដឹង​ថា​ប្រទេស​គេ គេ​បង់​រំលស់​ច្រើន ពីព្រោះ​គេ​ជា​ប្រទេស​អ្នក​ផលិត​ស្រាប់ ចំណែក​យើង​ជា​ប្រទេស​នាំ​ចូល ដូច្នេះ​យើង​មិន​អាច​ប្រកួតប្រជែង​ខាង​បង់​រំលស់​ច្រើន​ពេក​ទេ ។

ដោយឡែក​លោក សួន ពិសី ប្រធាន​នាយក​ប្រតិបត្តិ​អាជីវកម្ម គ្រឹះស្ថាន​មីក្រូហិរញ្ញវត្ថុ អេ អឹ​ម ខេ ដែល​ជា​គ្រឹះស្ថាន​ក្នុងស្រុក​មួយ ផ្ដល់​សេវាកម្ម​បង់​រំលស់​លើ​ម៉ូតូ និង​កង់​បី​ដែរ​នោះ បាន​មាន​ប្រសាសន៍​ថា សព្វ​ថ្ងៃនេះ ការ​ផ្ដល់​សេវាកម្ម​បង់​រំលស់​នៅ​កម្ពុជា គេ​មើលឃើញ​ថា​មាន​ច្រើន​ពិតមែន ក៏​ប៉ុន្តែ​សេវាកម្ម​បង់​រំលស់​ខ្លះ​មិន​មាន​ស្តង់ដារ​ត្រឹមត្រូវ និង​មិន​មាន​តម្លាភាព​ត្រឹមត្រូវ ក្នុង​ការ​គណនា​នោះ​ទេ ដែល​ធ្វើ​អោយ​ប្រជាពលរដ្ឋ​មិន​ទទួល​បាន​នូវ​អត្ថប្រយោជន៍​ពិតប្រាកដ ។ ប៉ុន្តែ​បើសិនជា​សេវាកម្ម​បង់​រំលស់​នៅ​ក្នុង​ប្រទេស​កម្ពុជា មាន​តម្លាភាព​និង​គណនា​តាម​ស្តង់ដារ​ត្រឹមត្រូវ នឹង​ធ្វើ​អោយ​អ្នក​ប្រើប្រាស់​សេវាកម្ម​នេះ ទទួល​បាន​នូវ​ប្រយោជន៍​ជា​ច្រើន ។ យ៉ាងណាមិញ​ការ​បង្កើត​អោយ​សេវាកម្ម​បង់​រំលស់​របស់​គ្រឹះស្ថាន​មីក្រូហិរញ្ញវត្ថុ អេ អឹ​ម ខេ គឺ​ដោយសារ​តែ តម្រូវការ​នៅ​កម្ពុជា​មាន​ច្រើន និង​ចង់​រួមចំណែក​ដល់​ជីវភាព​ពលរដ្ឋ និង​សេដ្ឋកិច្ចជាតិ​ផង ។

លោក​បន្ត​ថា ការ​ប្រើប្រាស់​សេវាកម្ម​បង់​រំលស់ របស់​ពលរដ្ឋ ពិតជា​មាន​ប្រយោជន៍​ខ្លាំង​ណាស់ ។ ឧទាហរណ៍​ជាក់ស្ដែង បើសិន​ពលរដ្ឋ​ចង់បាន​របស់​ប្រើប្រាស់​ចាំបាច់​មួយ​សម្រាប់​អាជីវកម្ម បង្កើន​ប្រាក់​ចំណូល ហើយ​មិន​មាន​លទ្ធភាព​បង់​ផ្ដាច់ ហើយ​មាន​សេវាកម្ម​បង់​រំលស់​នោះ ពួក​គាត់​នឹង​ទទួល​បាន​របស់​នោះ​តាម​ប្រាថ្នា និង​អាច​បង់​ត្រលប់​ទៅ​វិញ​ជា​ប្រចាំខែ ក្នុង​បរិមាណ​ទឹកប្រាក់​ដែល​អាច​រ៉ាប់រង​បាន ។

លោក សួន ពិសី បន្ថែម​ទៀត​ថា « អត្ថ ប្រយោជន៍​មួយទៀត នៃ​ការ​ប្រើប្រាស់​សេវាកម្ម​បង់​រំលស់ នឹង​ជំរុញ​អោយ​មានការ​ចាយវាយ​កាន់តែ​ច្រើន ជាក់ស្ដែង​នៅ​ពេល​ដែល​មាន​សេវាកម្ម​បង់​រំលស់ ពលរដ្ឋ​នឹង​មាន​លទ្ធភាព​បង់​ប្រចាំខែ​កាន់តែ​ច្រើន ដែល​ធ្វើ​អោយ​ចរន្ត​នៃ​ការ​ចាយ​កាន់តែ​ច្រើន អាច​ធ្វើ​អោយ​ចរន្ត​សេដ្ឋកិច្ច​ក៏​កាន់តែ​ខ្លាំង​ដែរ » ។
ចំណែក​លោក Piyachart Srimarut ប្រធាន​ក្រុមហ៊ុន​គ្រឿងយន្ត​កសិកម្ម គូ​បូ​តា ដែល​ផ្ដល់​សេវាកម្ម​បង់​រំលស់​ដល់​អតិថិជន​ដែរ​នោះ ក៏​បានអោយ​ដឹង​ថា ការ​បង្កើត​សេវាកម្ម​បង់​រំលស់​របស់​ក្រុមហ៊ុន​មួយ​ៗ គឺ​ក្នុង​គោលបំណង​សម្រួល​ដល់​អ្នក​ដែល​មិន​មាន​លទ្ធភាព​ទិញរ​បស់បង់​ផ្ដាច់ ដើម្បី​យក​របស់​ទៅ​ប្រើប្រាស់​សម្រាប់​បង្កើន​ចំណូល ប៉ុន្តែ​ក្រុមហ៊ុន​បង់​រំលស់​ក៏​គួរតែ​មាន​ភាព​ត្រឹមត្រូវ​និង​ស្មោះត្រង់​ចំពោះ​អតិថិជន​របស់​ខ្លួន​ផង​ដែរ ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ