រាជធានីភ្នំពេញ ៖ ប្រទេសកម្ពុជា កាលដើមឡើយត្រូវបានគេប្រសិទ្ធនាម ថាជាប្រទេសកសិកម្ម ដោយប្រជាជនភាគច្រើនពឹងលើវិស័យកសិកម្ម ក៏ប៉ុន្តែក្រោយមកកម្ពុជាបានធ្វើពិពិធកម្មបន្តិចម្ដងៗ ទៅរកប្រទេសឧស្សាហម្មខ្នាតតូច ដោយពឹងលើវិស័យកាត់ដេរសម្លៀកបំពាក់បំពាក់និងស្បែកជើងវិញ ប៉ុន្តែសេដ្ឋវិទូជាច្រើន ចង់អោយកម្ពុជាផ្លាស់ប្តូរពីឧស្សាហកម្មខ្នាតតូចទៅជាឧស្សាហកម្មខ្នាតធំ ដើម្បីរក្សាកំណើនសេដ្ឋកិច្ច និងឈានទៅរកការសម្រេចនូវផែនការឆ្នាំ ២០៣០ ជាប្រទេសមានប្រាក់ចំណូលមធ្យមកម្រិតខ្ពស់ និងប្រទេសមានប្រាក់ចំណូលខ្ពស់នៅឆ្នាំ ២០៥០ ។
លោក ដួង ប៉ូលឡាំង សេដ្ឋវិទូជាន់ខ្ពស់នៃធនាគារអភិវឌ្ឍន៍អាស៊ី ហៅកាត់ថា ADB បានមានប្រសាសន៍ថា ប្រទេសណាក៏ដូចប្រទេសណាដែរ ដែលមានការរីកចម្រើនត្រូវពឹងលើវិស័យឧស្សាហកម្មក្នុងនោះដូចជាឧស្សាហកម្មទេសចរណ៍សំណង់ និងឧស្សាហកម្មគ្រឿងចក្រជាដើម ។ សម្រាប់ប្រទេសកម្ពុជា ជាប្រទេសមានអំនោយផលល្អមួយ នៅក្នុងវិស័យឧស្សាហកម្ម ជាក់ស្ដែង កម្ពុជាមានតំបន់ទេសចរណ៍ជាច្រើន ដែលទាញយកប្រយោជន៍ ពីវា ដើម្បីរកចំណូលសម្រាប់សេដ្ឋកិច្ច ។
សេដ្ឋវិទូ រូបនេះបន្តទៀតថា « វិស័យឧស្សាហកម្ម គឺជាកូនសោដ៏សំខាន់មួយសម្រាប់ការលូតលាស់កំណើនសេដ្ឋកិច្ច ប៉ុន្តែដោយសារតែប្រជាពលរដ្ឋកម្ពុជាភាគច្រើនជាកសិករ វានៅតែជាបញ្ហាសម្រាប់ការអភិវឌ្ឍន៍និងផ្លាស់ប្តូរពីកសិកម្ម មកឧស្សាហកម្ម » ។ លោកបន្តថា បើទោះបីជាពេលនេះកម្ពុជានៅតែពឹងលើការវិស័យសកសិកម្ម លោកជឿជាក់ថា នៅរយៈពេលយូរអង្វែងតទៅទៀត កម្ពុជា នឹងផ្លាស់ពីវិស័យកសិកម្មទៅរកវិស័យឧស្សាហកម្មជាក់ជាពុំខានពីព្រោះពេលនេះ ការផ្លាស់ប្តូរក៏កំពុងកើតមានបន្តិចម្ដងៗហើយផងដែរ ។
លោក ដួង ប៉ូលឡាំង បន្ថែមថា អ្វីដែល កម្ពុជាត្រូវធ្វើនៅពេលនេះ នៅពេលដែលកសិកម្មនៅតែមានសក្ដានុពល គួរតែផ្លាស់ប្តូរពីការនាំចេញវត្ថុធាតុដើមកសិកម្ម ទៅជាការកែច្នៃ ផលិតផលកសិកម្មទាំងនោះ ហើយនាំចេញទៅទីផ្សារអន្តរជាតិវិញ ពីព្រោះការនាំចេញវត្ថុធាតុដើមចេញ ទទួលបាននូវតម្លៃទាបជាងការនាំចេញផលិតផលសម្រេច ដូច្នេះយើងគួរតែផ្លាស់ប្តូរ ហើយទាក់ទាញវិនិយោគិន ដើម្បីវិនិយោគកែច្នៃមុននាំចេញ ។ លោកថា ៖« ដោយសារតែប្រទេសយើងជាប្រទេសដែលមានអំណោយផលកសិកម្ម យើងក៏មិនចាំបាច់បោះបង់វាចោលដែរ តែយើងត្រូវអភិវឌ្ឍន៍ និងត្រូវយកផលិតផលកសិកម្មទាំងនោះទៅកែច្នៃដើម្បីទទួលបានតម្លៃបន្ថែមខ្ពស់នៅពេលនាំចេញ » ។
លោក លី សូដេត សេដ្ឋវិទូជាន់ខ្ពស់នៃធនាគារពិភពលោកប្រចាំកម្ពុជា ក៏បានលើកឡើងផងដែរ ក្នុងរយៈពេលប៉ុន្មានឆ្នាំកន្លងមកនេះ កំណើននៃវិស័យកសិកម្មឃើញថាមានការថមថយច្រើន តែវាមិនជាអ្វីនោះទេ ពីព្រោះដូចដែលបានដឹងហើយ ប្រទេសរីកចម្រើននៅលើពិភពលោក អត់មានប្រទេសណាមួយ ដែលមានវិស័យកសិកម្មរួមចំណែកធំនោះទេ យ៉ាងច្រើនត្រឹមពីរ ឬបីភាគរយ ។
បើតាមសេចក្ដីប្រកាសរបស់ក្រសួងឧស្សាហកម្ម និងសិប្បកម្មកាលពីចុងខែមុននេះថា នៅក្នុងចក្ខុវិស័យនៃគោលនយោបាយអភិវឌ្ឍន៍ឧស្សាហកម្ម ឆ្នាំ ២០១៥-២០២៥ ត្រូវបានបង្ហាញថា ឧស្សាហកម្មខ្នាតតូច និង មធ្យមកម្ពុជា គួរតែអភិវឌ្ឍបាន៤,៣ភាគរយ ក្នុងមួយឆ្នាំសម្រាប់ការចែករំលែកពី ១៥,៥ភាគរយ ទៅ២០ភាគ រយ នៃផលិតផលក្នុងស្រុកសរុប នៅឆ្នាំ ២០២៥ ។ គោលនយោបាយបច្ចុប្បន្ននៅតែមាន នៅលើអ្នកបង្កើតនយោបាយ ដើម្បីសម្រេចចិត្តយន្តការបន្ថែមទៀត ដើម្បីអនុវត្តគោលដៅនេះ ឬពួកគេនៅតែកំពង់រង់ចាំការគាំទ្ររបស់ម្ចាស់ជំនួយ លើវិស័យនេះ ៕
ចែករំលែកព័តមាននេះ