រាជធានីភ្នំពេញ ៖ ខណៈដែលប្រមុខដឹកនាំរាជរដ្ឋាភិបាលកម្ពុជាបានបញ្ជាក់ជំហរជាច្រើនលើកថាបើនៅទទួលបានប្រព័ន្ធអនុគ្រោះពន្ធ ក្រោមកម្មវិធីអ្វីគ្រប់យ៉ាងលើកលែងអាវុធ (EBA) សម្រាប់ការនាំចេញទំនិញពីកម្ពុជាទៅទីផ្សារអឺរ៉ុប គឺជារឿងប្រពៃណាស់ ។ ក៏ប៉ុន្តែមិនអាចដោះដូរអធិបតេយ្យភាពខ្មែរ ដើម្បីបន្តទទួលបានប្រព័ន្ធអនុគ្រោះពន្ធ ក្រោមកម្មវិធីអ្វីគ្រប់យ៉ាងលើកលែងអាវុធ នោះទេ ស្រាប់តែថ្មីៗនេះ ក្រុមហ៊ុនបញ្ជាទិញធំៗនៅសហគមន៍អឺរ៉ុប បានបង្ហាញពីការព្រួយបារម្ភរបស់ខ្លួនជាថ្មី ចំពោះការបាត់បង់ប្រព័ន្ធEBA ដែលសហ គមន៍អឺរ៉ុបផ្ដល់ជូនកម្ពុជានាពេលកន្លងមក ។ ការបង្ហាញក្ដីព្រួយបារម្ភនេះ ត្រូវបានធ្វើឡើងដោយក្រុមហ៊ុនធំៗចំនួន៨ និងបានផ្ញើលិខិតមួយជូនរដ្ឋាភិបាលកម្ពុជាផងដែរ ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនិងសម្លៀកបំពាក់កម្ពុជា ហៅកាត់ថា (GMAC) បានមានប្រសាសន៍ថា GMAC ក៏ទទួលបានលិខិតរបស់ក្រុមហ៊ុនទាំងនោះ ផ្ញើជូនរាជរដ្ឋាភិបាលកម្ពុជាដែរ តែលោកថា វាគ្រាន់តែជាការបង្ហាញក្ដីបារម្ភចំពោះអ្នកទិញផលិតផលពីកម្ពុជានាំចូលអឺរ៉ុបនោះទេ ពីព្រោះនៅពេលដែលអឺរ៉ុបដកប្រព័ន្ធអនុគ្រោះពន្ធនេះចេញ គឺពួកគេជាអ្នកខាត និងត្រូវបង់ថ្លៃនាំចូលទៅកាន់ទីផ្សារអឺរ៉ុប ។
អគ្គលេខាធិការរងសមាគមរោងចក្រកាត់ដេរនិងសម្លៀកបំពាក់កម្ពុជាមានប្រសាសន៍បញ្ជាក់ថា « ការលើកឡើងនេះ វាមិនខុសទេពីព្រោះពួកគេ គឺជាអ្នកទិញ និងមានកាតព្វកិច្ចបង់ពន្ធ បើសិនជាអឺរ៉ុបតម្រូវអោយបង់ពន្ធនូវទំនិញដែលចេញពីកម្ពុជា ដូច្នេះពួកគេតែងតែមានការព្រួយបារម្ភអញ្ចឹងហើយ » ។ លោកបន្តថា សម្រាប់សមាគមរោងចក្រកាត់ដេរ នៅតែមានក្ដីរំពឹងខ្ពស់ថា EBA នឹងនៅតែបន្តផ្ដល់ជូនកម្ពុជា ហើយកម្ពុជាក៏មានក្រុមការងារបច្ចេកទេស ដើម្បីជួបចរចារជាមួយសហភាពអឺរ៉ុប ក្នុងការបន្តផ្ដល់ EBA ដល់កម្ពុជាបន្ថែមទៀតដែរ ។ តែ លោក កាំង ម៉ូនីកា សង្កត់ធ្ងន់ថា «ប៉ុន្តែអ្វីដែលខ្លាចបំផុតនោះគឺ ខ្លាចតែអឺរ៉ុបមិនមែនយកលក្ខខណ្ឌការងារមកនិយាយដើម្បីដកប្រព័ន្ធអនុគ្រោះពន្ធទេ គឺខ្លាចសហគមន៍អឺរ៉ុបយកនយោបាយមកប្រឡូកក្នុងការងារដកប្រព័ន្ធអនុគ្រោះពន្ធនេះ ពីព្រោះអឺរ៉ុបក៏លេងនយោបាយដែរ» ។ លោកបន្ថែមថា ពេលនេះយើងក៏មានក្រុមហ៊ុនច្បាប់នៅទីក្រុងប្រ៊ុចសែល ដើម្បីធ្វើកិច្ចការងារនេះដែរ ដែលក្រុមការងារនេះ អាចជួយកម្ពុជា ជជែកជាមួយសហភាពអឺរ៉ុបពីអ្វីដែលកម្ពុជាបានធ្វើកន្លងមក ក្នុងពេលកម្ពុជាទទួលបានការអនុគ្រោះពន្ធគ្រប់មុខទំនិញ ចូលទីផ្សារអឺរ៉ុប ដូច្នេះសង្ឃឹមថា សហភាពអឺរ៉ុបអាចនឹងយល់កាន់តែច្រើនថែមទៀតពីកម្ពុជា ។
សូមរំលឹកថា នៅក្នុងលិខិតដែលក្រុមហ៊ុនបញ្ជាទិញផ្ញើជូនរដ្ឋាភិបាលកម្ពុជា បានបង្ហាញពីក្ដីបារម្ភចំពោះការបាត់បង់ប្រព័ន្ធអនុគ្រោះពន្ធ EBA ពីសហភាពអឺរ៉ុបហើយថា បើសិនជាបាត់បង់ វាក៏នឹងធ្វើអោយកម្មករ និយាយជិតមួយចំនួនត្រូវអត់ការងារ ហើយប្រឈមនឹងបញ្ហាមួយចំនួន នៅក្នុងជីវភាពប្រចាំថ្ងៃរបស់ប្រជាពលរដ្ឋកម្ពុជាផងដែរ ។ លិខិតរបស់ក្រុមអ្នកបញ្ជារទិញចុះថ្ងៃទី៤ ខែមេសា ឆ្នាំ២០១៩ បានលើកឡើងថា «ការគំរាមកំហែងយ៉ាងជាក់ច្បាស់នៃការដកចេញពីអត្ថប្រយោជន៍បានមកពី EBA របស់សហភាពអឺរ៉ុប និង GSP របស់អាមេរិក នឹងធ្វើឲ្យឧស្សាហកម្មកម្ពុជាខូចខាត និងប៉ះពាល់យ៉ាងធ្ងន់ធ្ងរ លើពលរដ្ឋខ្មែររាប់លាននាក់ដែលធ្វើការក្នុងឧស្សាហកម្មនេះ។ ជាងនេះទៅទៀត វានឹងធ្វើឲ្យខាតបង់ការខិតខំនៃរដ្ឋាភិបាលរបស់អ្នក ដែលផ្តោតលើការអភិវឌ្ឍឧស្សាហកម្មមួយដែលជោគជ័យនេះ ដែលបាននាំមកនូវផលប្រយោជន៍ដ៏សម្បើមដល់ប្រជាជន និងសេដ្ឋកិច្ចកម្ពុជា»។
ពាក់ព័ន្ធនឹងបញ្ហា EBA នេះដែរ ធុរជនកម្ពុជាមួយចំនួនថា វានឹងមិនមានបញ្ហានោះទេ ក្នុងការនាំចេញទំនិញពីកម្ពុជា ។ ជាក់ស្ដែងលោក យ៉ន សុវណ្ណ អគ្គនាយកក្រុមហ៊ុនបាយ័ន សៀរាល ( Bayon Cereal ) ដែលជាក្រុមហ៊ុននាំចេញអង្ករធំមួយកម្ពុជា បាននិយាយថា ការដកប្រព័ន្ធអនុគ្រោះពន្ធ EBA ពីកម្ពុជារបស់សហគមន៍អឺរ៉ុប នឹងមិនបង្កើតជាឧបស័គ្គ សម្រាប់ការនាំចេញផលិតផលវាយនភ័ណ្ឌ សម្លៀកបំពាក់និងអ្វីៗផ្សេងទៀតទេ ។ ឧទាហរណ៍ករណីអឺរ៉ុប បានដាក់ពន្ធលើការនាំចូលអង្ករកម្ពុជាទៅកាន់ទីផ្សារអឺរ៉ុបកាលពីអំឡុងខែ មករា ក៏កម្ពុជានៅតែអាចនាំចេញអង្ករកម្ពុជាទៅទីផ្សារអឺរ៉ុបបានដដែល ហើយក៏មានកំណើននៃការនាំចេញអង្ករកើនឡើងដដែល ។ លោកនិយាយថា EBA វាគង់តែបាត់បង់ទេ នៅពេលដែលសេដ្ឋកិច្ចកម្ពុជាកាន់តែលូតលាស់ តែអ្វីដែលកម្ពុជាត្រូវធ្វើនោះ គឺពង្រឹងគុណភាព ផលិតផលរបស់ខ្លួន ដើម្បីនាំចេញទៅកាន់តែទីផ្សារទាំងនោះ និងធ្វើអោយទីផ្សារទាំងនោះ នៅតែត្រូវការផលិតផលចេញពីកម្ពុជា ។ លោក យ៉ន សុវណ្ណ និយាយថា « សម្រាប់អង្ករដែលកម្ពុជា បានផលិតនិងនាំចេញទៅកាន់ទីផ្សារអឺរ៉ុបឃើញថានៅតែមានកំណើន បើទោះបីជាអឺរ៉ុបបានដាក់ពន្ធមកលើអង្ករយើងក៏ដោយ ។នេះបង្ហាញថាអង្កររបស់អឺរ៉ុបមិនមែនជាគូរប្រជែងរបស់អង្ករយើងទេ អញ្ចឹងយើងនៅតែមានឱកាសក្នុងការនាំចូលទៅកាន់ទីផ្សារប្រទេសទាំងនោះ » ។
គួរបញ្ជាក់ថា ទន្ទឹមនឹងការប្រឈមនឹងការបាត់បង់ EBA ពីអឺរ៉ុបដែលនាំកម្ពុជាប្រឈមនឹងការបង់ពន្ធប្រមាណជាង ៥០០ លានដុល្លារអាមេរិកក្នុងមួយឆ្នាំនោះ កម្ពុជាក៏កំពុងស្វែងរកទីផ្សារថ្មីៗបន្ថែមទៀត សម្រាប់ផលិតផលរបស់ខ្លួន ដូចជាកំពុងជំរុញការចរចារជាមួយកិច្ចព្រមព្រៀង RCEP និងកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិក (TPP) TPP ជាដើម ៕
ចែករំលែកព័តមាននេះ