រាជធានីភ្នំពេញ ៖ លោក គង់ គាំ អតីតមន្ត្រីជាន់ខ្ពស់គណបក្សសង្គ្រោះជាតិបានបន្តចំអកទៅកាន់លោកសម រង្ស៊ី ថា ជាអ្នកនយោបាយក្អេងក្អាងដូចក្អាត់ក្នុងក្អម ហើយជាមេដឹកនាំនយោបាយដង្ហើមចង្រិត…
រាជធានីភ្នំពេញ ៖ លោក គង់ គាំ អតីតមន្ត្រីជាន់ខ្ពស់គណបក្សសង្គ្រោះជាតិបានបន្តចំអកទៅកាន់លោកសម រង្ស៊ី ថា ជាអ្នកនយោបាយក្អេងក្អាងដូចក្អាត់ក្នុងក្អម ហើយជាមេដឹកនាំនយោបាយដង្ហើមចង្រិត ។
លោកគង់ គាំ បានបញ្ជាក់ឲ្យដឹងនៅថ្ងៃទី៨ មេសា យ៉ាងដូច្នេះថា«ក្អេងក្អាងដូចក្អាត់ក្នុងក្អម ។ មេដឹកនាំនយោបាយដង្ហើមចង្រិត ខំចំតិតផ្លុំសមុទ្រអោយកើតរលកស៊ូណាមី ។ មានតែមនុស្សប្រភេទសំរាមទេ ដែលមិនខ្លាចការលិចលង់ខូចខាត ហើយគាំទ្រ ជូនពរការហួចហៅខ្យល់របស់មេដឹកនាំបំផ្លាញខ្មែរ បំផ្លាញកម្ពុជាមិនផុតផៅនេះ» ។ ជាមួយគ្នានោះដែរលោកគង់ គាំ ក៏បានលើកឡើងថា ប្រជាពលរដ្ឋខ្មែរ និងពលទាហានជាកូនចៅខ្មែរពួកគេមិនជឿ មិនធ្វើតាមសម្តីក្រុមដំរី ដែលភ្លាត់ ហើយភ្លាត់ទៀត ក្រុមអ្នកប្រាជ្ញដែលភ្លើ ហើយភ្លើទៀត គ្មានបានភ្លឺស្វាងម្តងណាសោះរបស់មេក្លោងបរទេស និងក្រុមខ្មែរបំផ្លាញតជំនាន់នេះ ។
លោកបញ្ជាក់ថា«ខ្លួនឯង និងក្រុមឯងជាប់បំរាម ជាប់សាលដីកា មិនហ៊ាននៅក្នុងស្រុក និងមិនហ៊ានចុលស្រុក ហើយប្រកូកប្រកាសអោយបរទេស អ្នកដទៃជួយកំដរពួកខ្លួន ដោយកុំទទួលស្គាល់សាលដីកាតុលាការកម្ពុជាកុំទទួលស្គាល់ការបោះឆ្នោតឆ្នាំ២០១៩ ។ តែពួកគេមិនអាចបំផ្លាញការពិតបានទេ» ។ លោកបន្ថែមថា រាជរដ្ឋាភិបាល និងស្ថាប័នកម្ពុជាសំខាន់ៗក្រោយការបោះឆ្នោតឆ្នាំ២០១៨ បន្តមានទំនាក់ទំនងល្អ និងទូលំទូលាយឡើងឥតឈប់ឈរនៅក្នុង និងក្រៅប្រទេស ។
ជាមួយគ្នានោះដែរលោកគង់ គាំ ក៏លើកឡើងថា«បាបកម្មរបស់មេដឹកនាំនយោបាយបំផ្លាញ ដែលកំពុងត្រដរខ្យល់ ម្តងរវើរវាយចង់យកគំរូនៅវ៉េណេហ្ស៊ុយអេឡា ម្តងយកគំរូនៅអាល់ហ្សេរី ។ ម្តងថា របបហ៊ុន សែន រលំឆ្នាំ២០១៩ ម្តងថា បួនដប់ឆ្នាំទៀតកម្ពុជារលាយ តែវត្ថុស័ក្តសិទ្ធិប្រទាញមាត់អោយស្រែកថា ជយោ! កម្ពុជាអមតៈ» ។ លោកបន្តថា មានតែក្រុម៨នាក់+១ទេ ដែលត្រូវចប់ជាស្ថាពរ អស់ក្បួនភរ និងមានតែយុទ្ធសាស្ត្រចាញ់ចាញ់ដ៏អាម៉ាសអស់មួយជីវិតមិនខាខនោះ ។
ជាមួយគ្នានោះដែរលោកគង់ គាំ ក៏បានលើកឡើងថា គណបក្សឆន្ទៈខ្មែរជាប៉ូលនយោបាយ ប្រជែងថ្មី ដែលមានប្រធាន និងថ្នាក់ដឹកនាំជាក្រុមអ្នកនយោបាយវ័យក្មេងបានសម្រេចពុះពារការលាបពណ៌ ការប្រមាថថា គ្មានអនាគត ដោយចូលរួមយ៉ាងប្តូរផ្តាច់ និងជឿជាក់ថា ជំហ៊ានក្នុងឆ្នាំ២០១៨ ឆ្នាំ២០១៩ ឆ្នាំ២០២០ ឆ្នាំ២០២១ ប្រាកដជាជួយអោយទាំងធនធានមនុស្សទាំងបទពិសោធន៍ធំធាត់សក្តិសមឆ្ពោះទៅដណ្តើមជ័យជំនះនៅការបោះឆ្នោតជ្រើសរើសតំណាងរាស្ត្រឆ្នាំ២០២៣ និងការបោះឆ្នោតជ្រើសរើសសមាជិកព្រឹទ្ធសភា នៅឆ្នាំ២០២៤ជាក់ជាមិនខាន ៕
ចែករំលែកព័តមាននេះ