សេដ្ឋវិទូ៖កម្ពុជានឹងសម្រេច ចក្ខុវិស័យប្រទេសមានប្រាក់ ចំណូលមធ្យមកម្រិតខ្ពស់នៅ ឆ្នាំ២០៣០ តាមរយៈការធ្វើ ពិពិធកម្មសេដ្ឋកិច្ចបន្តទៀត
- ភ្នំពេញ
រាជធានីភ្នំពេញ ៖ ក្នុងពេលរាជរដ្ឋាភិបាលកម្ពុជា បានកំណត់ចក្ខុវិស័យរបស់ខ្លួន ជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសមានប្រាក់ចំណូលខ្ពស់នៅឆ្នាំ ២០៥០នោះ សេដ្ឋវិទូជាន់ខ្ពស់នៃធនាគារ អភិវឌ្ឍន៍អាស៊ី ហៅកាត់ថា ADB បានព្យាករណ៍ថា កម្ពុជានឹងសម្រេចបាននូវចក្ខុវិស័យរបស់ខ្លួន ។
លោក ដួង ប៉ូលឡាំង សេដ្ឋវិទូជាន់ខ្ពស់នៃធនាគារអភិវឌ្ឍន៍អាស៊ី ប្រចាំកម្ពុជា បានមានប្រសាសន៍ថា យោងទៅតាមស្ថានភាពសេដ្ឋកិច្ចកម្ពុជា នាពេលនេះ លោកជឿជាក់ថា កម្ពុជានឹងសម្រេចបាននូវចក្ខុវិស័យរបស់ខ្លួន ក៏ប៉ុន្តែដោយសារតែរយៈពេលវានៅយូរទៀតនោះ យើងក៏មិនអាចព្យាករណ៍បានថា នឹងមានអ្វីកើតឡើងទេ ដូច្នេះ រដ្ឋាភិបាលត្រូវធ្វើអ្វីដែលប្រយ័ត្នប្រយែងបំផុត ដើម្បីរក្សាបាននូវកំណើនសេដ្ឋកិច្ចប្រកបដោយចីរភាព ។ លោកបន្តថា រដ្ឋាភិបាលត្រូវដើរបណ្ដើរគិតបណ្ដើរ និងដោះស្រាយបណ្ដើរ បើសិនជាជួបបញ្ហាកន្លែង ត្រូវដោះស្រាយបញ្ហានោះជាបន្ទាន់ ដោយមិនគួរអោយនៅបន្តអូសបន្លាយឡើយ ធ្វើយ៉ាងណាអោយវាឡើងរហូត ។
លោកបន្ថែមថា តាមពិតទៅធនាគារ អភិវឌ្ឍន៍អាស៊ី មិនបានធ្វើកិច្ចការក្នុងរឿងនេះទេ តែជាទស្សនរបស់លោកផ្ទាល់ លោកយល់ថា បើសិនជាកំណើនសេដ្ឋកិច្ចក្នុងរង្វង់ ៧ភាគរយរហូតដល់ឆ្នាំ ២០៣០នោះ លោកគិតថា កម្ពុជានឹងសម្រេចបាននូវចក្ខុវិស័យជាប្រទេស ដែលមានប្រាក់ចំណូលមធ្យមកម្រិតខ្ពស់បាន ហើយរដ្ឋាភិបាលបច្ចុប្បន្ននេះ ក៏ហាក់ដូចជាបង្ហាញពីជំនឿខ្ពស់ផងដែរពីចក្ខុវិស័យនេះ ។ ទន្ទឹមនឹងនោះដែរ សេដ្ឋវិទូរូបនេះ ក៏បានផ្ដល់ជាទស្សនទានមួយចំនួនផងដែរ ដើម្បីរក្សាកំណើនសេដ្ឋកិច្ចអោយស្ថិតក្នុងរង្វង់ខ្ពស់។ លោកនិយាយថា កម្ពុជា គួរតែផ្លាស់ប្តូរពីប្រទេសកសិកម្ម ទៅជាប្រទេសឧស្សាហកម្ម ពីព្រោះបណ្ដាប្រទេសជឿនលឿនលើពិភពលោក គ្មានអ្នកណាយកសិកម្មជាគោលនោះទេ ជាក់ស្ដែងប្រទេសឧស្សាហកម្មផលិតរថយន្តមួយគ្រឿង លក់ចេញ គេអាចទិញអង្ករបានរាប់តោន ដូច្នេះគេមិនចាំបាច់ធ្វើស្រែ ដាំស្រូវនោះទេ ។
ដោយឡែកទស្សនទានរបស់ធនាគារ ពិភពលោកវិញក៏ស្រដៀងនឹងធនាគារអភិវឌ្ឍន៍ អាស៊ីដែរ ពោលគឺចង់អោយកម្ពុជា ធ្វើពិពិធកម្មសេដ្ឋកិច្ច ដោយផ្លាស់ប្តូរពីការផលិតរបស់ដែលមានតម្លៃបន្ថែមទៀត ទៅរកការផលិតណាដែលមានតម្លៃបន្ថែមខ្ពស់ ស្របពេលតម្លៃពលកម្មនៅក្នុងស្រុកក៏ចាប់ផ្ដើមឡើងខ្ពស់បន្តិចម្ដងៗដែរ ដូចជាការផលិតនូវគ្រឿងអេឡិចត្រូនិក គ្រឿងអគ្គិសនីនិងសម្ភារៈសម្រាប់នាំចេញផ្សេងទៀតជាដើម ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ នៃឧត្តមក្រុមប្រឹក្សាសេដ្ឋកិច្ចជាតិ បានលើកឡើងផងដែរថា កម្ពុជា គួរធ្វើពិពិធកម្មសេដ្ឋកិច្ចជាបណ្ដើរៗ ក្នុងពេលសហគមន៍អន្តរជាតិ គេផ្ដល់ឱកាសអោយយើង ក្នុងការនាំទំនិញចេញដោយមិនគិតពន្ធ ហើយនៅពេលដែលគេចង់គិតពន្ធវិញក៏កម្ពុជា អាចរស់បានដោយខ្លួនឯង ដោយមិនចាំបាច់ពឹងគេទៀតឡើយ ។
គួរបញ្ជាក់ថា ក្នុងឆ្នាំ ២០១៩ នេះសេដ្ឋកិច្ចកម្ពុជា ត្រូវបានស្ថាប័នអន្តរជាតិធំៗ ព្យាករណ៍ថា នៅតែមានកំណើនល្អប្រសើរ ដោយមានកំណើនប្រមាណ៧ភាគរយ និង ប្រមាណ៦,៨ភាគរយ នៅឆ្នាំ ២០២០ ខាងមុខ ។ តែយ៉ាងណាក៏ដោយគម្លាតជំនាញនៃធនធានមនុស្សនៅកម្ពុជា គឺជាបញ្ហាប្រឈមមួយសម្រាប់ជំរុញកំណើនអោយកាន់តែល្អប្រសើរ ដូច្នេះ កម្ពុជា គួរតែបណ្ដុះបណ្ដាលជំនាញដល់ធនធានរបស់ខ្លួនអោយបានកាន់តែច្រើនបន្ថែមទៀត ៕
ចែករំលែកព័តមាននេះ