រាជធានីភ្នំពេញ ៖ រយៈប៉ុន្មានឆ្នាំចុងក្រោយនេះ សភាពការណ៍ទេសចរណ៍កម្ពុជាមានការអភិវឌ្ឍរីកចម្រើនគួរជាទីមោទនៈ ជាពិសេសទេសចរចិន បាននឹងកំពុងក្លាយជាទីផ្សារទេសចរណ៍សំខាន់របស់ប្រទេសកម្ពុជា ជាមួយនឹងការកើនឡើងជារៀងរាល់ឆ្នាំ។ ជាក់ស្តែងទេសចរអន្តរជាតិចិន បានស្ថិតនៅកំពូលតារាងនៃទេសចរអន្តរជាតិទាំង ១០ ដែលមកទស្សនាកម្ពុជាមានកំណើនប្រមាណជាង ៦៧,២% ក្នុងឆ្នាំ ២០១៨ និងរក្សាបាននូវកំណើនប្រមាណជាង ៣១,៧% សម្រាប់រយៈពេល ២ ខែឆ្នាំ ២០១៩ នេះ ។
«វិស័យទេសចរណ៍ជាកម្លាំងចលករដ៏សំខាន់ក្នុងការជំរុញកំណើនសេដ្ឋកិច្ចជាតិ បង្កើតឱកាសការងារ មុខរបរ ប្រាក់ចំណូល និងកាត់បន្ថយភាពក្រីក្ររបស់ប្រជាពលរដ្ឋ» ។ នេះជាការលើកឡើងរបស់រដ្ឋមន្ត្រីក្រសួងទេសចរណ៍នាឱកាសដឹកនាំគណៈប្រតិភូក្រសួង រួមជាមួយអាជ្ញាធរជាតិអប្សរា គ្រឹះស្ថានអង្គរ សមាគមទីភ្នាក់ងារទេសចរណ៍កម្ពុជា ក្រុមហ៊ុន និងផ្នែកឯកជន ចុះសួរសុខទុក្ខ សំណេះសំណាល និងជូនពរដល់នាយទាហាន ពលទាហាន នៃយោធភូមិភាគទី៤ ក្នុងឱកាសអបអរសាទរបុណ្យចូលឆ្នាំប្រពៃណីជាតិ នៅទីបញ្ជាការដ្ឋានយោធភូមិភាគទី៤ ខេត្តសៀមរាប នាថ្ងៃទី ០៧ ខែមេសា ឆ្នាំ ២០១៩ នេះ ។
លោក ថោង ខុន បានបញ្ជាក់ទៀតថា ជាក់ស្តែង ក្នុងឆ្នាំ២០១៨ កន្លងមកនេះ កម្ពុជាទទួលបានទេសចរអន្តរជាតិ ជាង ៦,២០លាននាក់ កើនឡើង ១០,៧% ធៀបនឹងឆ្នាំ២០១៧ បង្កើតប្រាក់ចំណូលជូនជាតិប្រមាណ ៤.៣៧៥លានដុល្លារអាមេរិក រួមចំណែកប្រមាណ ១២,៧% នៃផលិតផលក្នុងស្រុកសរុប (GDP) បង្កើតការងារដោយផ្ទាល់ប្រមាណជាង ៦២ម៉ឺននាក់ និងការងារដោយប្រយោលរាប់ម៉ឺននាក់បន្ថែមទៀត។
យោងតាមរបាយការណ៍បូកសរុបការងារទេសចរណ៍ ឆ្នាំ ២០១៨ និងត្រីមាសទី១ នៃឆ្នាំ ២០១៩ របស់ក្រសួងទេសចរណ៍ បានឲ្យដឹងថា ទេសចរអន្តរជាតិមកទស្សនាកម្ពុជាឆ្នាំ ២០១៨ បានធ្វើដំណើរតាមផ្លូវអាកាសសំខាន់ៗទាំងបី (អាកាសយានដ្ឋានអន្តរជាតិភ្នំពេញ, អាកាសយានដ្ឋានអន្តរជាតិសៀមរាប និងអាកាសយានដ្ឋានកងកេង) មានចំនួនជាង ៤,០៩៦ លាននាក់ កើនឡើង ២៣,៧% ខណៈការធ្វើដំណើរផ្លូវគោកមានចំនួនជាង ១,៩៦០ លាននាក់ ថយចុះ ៨,៦% និងចំនួនភ្ញៀវអន្តរជាតិធ្វើដំណើរមកកម្ពុជាតាមផ្លូវទឹកមានចំនួន ១៤៤,១៩៦ នាក់ ថយចុះ ០,៨% ។ យ៉ាងណាមិញទេសចរអន្តរជាតិដែលមកទស្សនាកម្ពុជាក្នុងឆ្នាំ ២០១៨ នេះ គឺចិន មានចំនួនជាង ២,០២៤ លាននាក់ (កើនឡើង ៦៧,២% ធៀបឆ្នាំ២០១៧) នាំមុខគេ ក្នុងចំណោមប្រទេសទាំង ១០ ក្នុងនោះមាន វៀតណាម (ប្រមាណជាង ៨០០ ពាន់នាក់ ថយចុះ ៤,២%), ឡាវ (ប្រមាណជាង ៤២៧ ពាន់នាក់ ថយចុះ ១៥,១%), ថៃ (ប្រមាណជាង ៣៨៣ ពាន់នាក់ ថយចុះ ៣,២%), កូរ៉េ (ប្រមាណជាង ៣០១ពាន់នាក់ ថយចុះ ១២,៦%), សហរដ្ឋអាមេរិក ( ប្រមាណជាង ២៥០ ពាន់នាក់ ថយចុះ ២,២%), ជប៉ុន (ប្រមាណជាង ២១០ ពាន់នាក់ កើនឡើង ៣,៥%), ម៉ាឡេស៊ី (ប្រមាណជាង ២០១ ពាន់នាក់ កើនឡើង ១២,២%), បារាំង (ប្រមាណជាង ១៧០ ពាន់នាក់ កើនឡើង ២,៧%) និងអង់គ្លេស (ប្រមាណជាង ១៦២ ពាន់នាក់ ថយចុះ ៥,១%) ។
របាយការណ៍ដដែលបានបញ្ជាក់ថា ទេសចរចិន នៅតែមានសន្ទុះកើនឡើងខ្ពស់សម្រាប់រយៈពេល ២ ខែ ដើមឆ្នាំ ២០១៩ នេះហើយឈរលើកំពូលតារាងសម្រាប់ទីផ្សារទេសចរណ៍សំខាន់ៗទាំង ១០ មកកម្ពុជា ។ ជាក់ស្តែងរយៈពេល ២ ខែក្នុងឆ្នាំ២០១៩ នេះ ទេសចរចិន មកទស្សនាកម្ពុជាមានចំនួនប្រមាណជាង ៤១៩ ពាន់នាក់ ស្មើនឹង ៣៣,៦% នៃចំនួនសរុប ឬមានការកើនឡើងចំនួន ៣១,៧%, ភ្ញៀវទេសចរវៀតណាម ក៏មានការកើនឡើង ១,៧%, ទេសចរឡាវ កើនឡើង ១៣%, ទេសចរថៃកើនឡើង ២០,៣% ខណៈទេសចរកូរ៉េ នៅបន្តធ្លាក់ចុះរហូតដល់ ១៩,៦% សម្រាប់រយៈពេល ២ ខែនៃឆ្នាំ ២០១៩ នេះ ។ អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាមានប្រសាសន៍ថាទេសចរគ្រប់ជាតិសាសន៍ មិនថាចិនកើនឡើង ឬទេសចរអន្តរជាតិប្រទេសណាមួយបន្តកើនឡើង សម្រាប់ការមកទស្សនាកម្ពុជា គឺសុទ្ធតែផ្តល់ប្រយោជន៍ដល់សេដ្ឋកិច្ចជាតិលើវិស័យឧស្សាហកម្មគ្មានផ្សែង ។
អ្នកស្រី ឆាយ ស៊ីវលីន មានប្រសាសន៍បញ្ជាក់យ៉ាងដូច្នេះថា «សម្រាប់ភ្ញៀវទេចរណ៍ចូលមកកាន់កម្ពុជាមិនថាជនជាតិចិន ឬជនជាតិផ្សេងនោះទេ ពួកគាត់សុទ្ធតែនាំនូវអត្ថប្រយោជន៍ចំណូលជូនជាតិផង ពលរដ្ឋផង តាមលក្ខណៈផ្ទាល់ ឬមិនផ្ទាល់ គឺយើងសុទ្ធតែទទួលបានទាំងអស់។ ភ្ញៀវទេសចរណ៍ចិន ពេលគាត់ចូលមកគាត់ត្រូវចំណាយ។ មិនតែប៉ុណ្ណោះគាត់អាចនាំនូវការវិនិយោគផងដែរ នៅពេលគាត់ចូលមកកម្ពុជាមើលឃើញឱកាសនៅពេលកម្ពុជាកំពុងមានអភិវឌ្ឍន៍ដូចសព្វថ្ងៃនេះ»។
ឆ្លើយតបទៅនឹងសំនួរដែលសួរថា តើការកើនឡើងនៃទេសចរចិនមកកម្ពុជា លុយហូរចូលដល់សេដ្ឋកិច្ចនិងប្រជាពលរដ្ឋកម្ពុជាដែរ អត់នៅពេលដែលមានការបើកហាងនិងសណ្ឋាគារដោយវិនិយោគិនចិន ដើម្បីឲ្យទេសចរចិនស្នាក់នៅនោះ អ្នកស្រីថា កម្ពុជានៅតែចំនេញពីការកើនឡើងនៃចំនួនទេសចរអន្តរជាតិ ។
ប្រធានសមាគមទីភ្នាក់ងារទេសចរណ៍កម្ពុជារូបនេះបន្តទៀតថា «ជាទូទៅនៅពេលមានភ្ញៀវទេចរណ៍ចូលមកកាន់កម្ពុជា គឺយើងជាអ្នកចំណេញ។ គាត់ចូលមកគាត់ទទួលសេវាកម្មក្នុងស្រុកយើងផ្តល់ជូន ទោះបីជាវិនិយោគិនចិន ឬវិនិយោគិនណាក៏ដោយ គាត់ចូលមកបើកហាងគាត់ ក៏ជៀសមិនផុតពីការប្រើប្រាស់កំលាំងពលកម្មក្នុងស្រុកខ្មែរ»។
ស្របពេលវិស័យទេសចរណ៍ខ្មែរហាក់មានសុខភាពល្អ ដោយចំនួនទេសចរអន្តរជាតិមានការកើនឡើងជារៀងរាល់ឆ្នាំ គេក៏កត់សម្គាល់ឃើញថា ប្រជាពលរដ្ឋខ្មែរចេញទៅដើរកំសាន្តនៅក្រៅប្រទេសក៏មានការកើនឡើងផងដែរ ។ ជាក់ស្តែង ការធ្វើដំណើរដោយប្រជាជនកម្ពុជាទៅកំសាន្តនៅក្រៅប្រទេសក៏មានការកើនឡើងគួរឲ្យកត់សម្គាល់ផងដែរ ជាក់ស្តែងក្នុងឆ្នាំ២០១៨ នេះ ចំនួនទេសចរកម្ពុជាទៅក្រៅប្រទេសមានចំនួនជិត ២លាននាក់ កើនឡើង ១៣,៩% ធៀបនឹងឆ្នាំ២០១៧ ។ ខណៈរយៈពេល ២ ខែឆ្នាំ២០១៩នេះ ទេសចរកម្ពុជាចេញទៅក្រៅប្រទេសមានចំនួនប្រមាណជាង ៣០០ ពាន់នាក់ កើនឡើង ៤% ធៀបនឹងរយៈពេលដូចគ្នាឆ្នាំ ២០១៨ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ