រាជធានីភ្នំពេញ ៖ ក្រសួងសុខាភិបាលបានឲ្យដឹងថា ក្នុងរយៈពេល៣ខែ ឆ្នាំ២០១៩ មានអ្នកពុលចំណីអាហារមានចំនួន២៤៦នាក់ និងបណ្តាលឲ្យស្លាប់ចំនួន២នាក់ ។ ចំពោះការពុលចំណីអាហានេះត្រូវបានក្រសួងសុខាភិបាលអំពាវនាវឲ្យប្រជាពលរដ្ឋទាំងអស់ មេត្តាមានការ…
រាជធានីភ្នំពេញ ៖ ក្រសួងសុខាភិបាលបានឲ្យដឹងថា ក្នុងរយៈពេល៣ខែ ឆ្នាំ២០១៩ មានអ្នកពុលចំណីអាហារមានចំនួន២៤៦នាក់ និងបណ្តាលឲ្យស្លាប់ចំនួន២នាក់ ។ ចំពោះការពុលចំណីអាហានេះត្រូវបានក្រសួងសុខាភិបាលអំពាវនាវឲ្យប្រជាពលរដ្ឋទាំងអស់ មេត្តាមានការ ប្រុងប្រយ័ត្នខ្ពស់លើបញ្ហាសុខភាពពុលចំណីអាហារ និងពុលស្រាដែលអាចកើតមានក្នុង អំឡុងពិធីបុណ្យចូលឆ្នាំខ្មែរ ។
ក្រសួងសុខាភិបាលជាថ្មីម្ដងទៀតបានចេញសេចក្តីប្រកាសព័ត៌មានស្ដីពីការបង្ការជំងឺ នឹងបញ្ហាសុខភាពក្នុងអំឡុងពិធីបុណ្យចូលឆ្នាំខ្មែរប្រពៃណីជាតិពោល គឺថ្ងៃទី១៤ ១៥និង១៦ ខែមេសាខាងមុខនេះ ។ ក្រសួងបានលើកឡើងថា ដោយហេតុថា ពិធីបុណ្យចូលឆ្នាំខ្មែរប្រពៃណីជាតិនឹងឈានចូលមកដល់ក្នុងពេលឆាប់ឆាប់នេះក្រសួងសុខាភិបាលថា កន្លងមកក្រសួងធ្លាប់បានចេញសេចក្តីប្រកាសព័ត៌មានជូនសាធារណៈជនទាំងអស់ក្នុងការបង្ការករណីពុលអាហារ និងករណីពុលស្រាជាច្រើនលើកហើយ ក៏ប៉ុន្តែក្រសួងសុខាភិបាលបានសង្កេតឃើញថា មានករណីពុលអាហារ និងករណីពុលស្រានៅតែបន្តកើតឡើង នៅតាមសហគមន៍នៃបណ្តាខេត្តមួយចំនួន ជាក់ស្ដែងនៅក្នុងអំឡុងឆ្នាំ២០១៨កន្លងមកនេះមានករណីពុលចំណីអាហារសរុបចំនួន១៩លើក មានអ្នកពុលសរុបចំនួន៨៥២នាក់ ក្នុងនោះស្លាប់ចំនួន១៣នាក់ និងពុលស្រាចំនួន៥លើក ដោយមានអ្នកពុលស្រា២០៦នាក់ ក្នុងនោះស្លាប់១២នាក់ ។
ក្រសួងបញ្ជាក់ «ជាងនេះទៅទៀតនៅក្នុងអំឡុងឆ្នាំ២០១៩ ត្រឹមខែមីនានេះ មានករណីពុលចំណីអាហារសរុបចំនួន៦លើក ដោយមានអ្នកពុលសរុបចំនួន២៤៦នាក់ក្នុងនោះស្លាប់២ នាក់» ។ លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានលើកឡើងថា «ខ្ញុំសូមប្រកាសធ្វើការក្រើនរំលឹកជូនដល់ប្រជាពលរដ្ឋទាំងអស់ឲ្យមានការប្រុងប្រយ័ត្នខ្ពស់លើបញ្ហាសុខភាព ដែលអាចកើតមានក្នុងអំឡុងពិធីបុណ្យចូលឆ្នាំខ្មែរប្រពៃណីជាតិដែលស្របគ្នាជាមួយនឹងអាកាសធាតុនៅលើផ្ទៃប្រទេសកម្ពុជាមានការកើនកម្ដៅខ្លាំង ជាពិសេសទៅលើការបរិភោគចំណីអាហារ និងភេសជ្ជៈការរៀបចំអាហារ និងការទុកដាក់មិនត្រឹមត្រូវ ដើម្បីជៀសផុតពីបញ្ហាឈឺពោះរាគរូស ដែលបណ្តាលមកពីការបរិភោគចំណីអាហារមិនមានអនាម័យអាហារជូរផ្អូម ឬពុលស្រា បណ្តាលមកពីការទិញស្រាមកពីផ្សារតែជាស្រាបានផលិតឬបានបិត ដោយមិនមានលក្ខណៈបច្ចេកទេសត្រឹមត្រូវជាដើម» ។ លោកបន្តថា បន្ថែមលើនេះក្រសួងសូមលើកទឹកចិត្តគ្រប់គ្នាឲ្យចូលរួមអនុវត្តវិធានការប្រុងប្រយ័ត្ន រួមទាំងការការពារផ្ទាល់ និងក្រុមគ្រួសាររបស់ខ្លួន ដើម្បីចៀសផុតពីបញ្ហាទាំងនេះ ជាពិសេសលើការពុលចំណីអាហារដូចជា ការប្រើប្រាស់ទឹកស្អាត និងម្ហូបអាហារដែលស្អាត និងឆ្អិនជានិច្ច អាហារត្រូវគ្រប់ជានិច្ច ដើម្បីជៀងវាងរុយរោម ពិនិត្យចំណីអាហារដែលអាចនឹងជូនផ្អូម…. ។
លោករដ្ឋមន្ត្រីក្រសួងសុខាភិបាលបានលើកឡើងថា បើមានបញ្ហានៃការពុលអាហារ ឬមានរោគសញ្ញានៃការពុលស្រា ដូចជាឈឺក្បាលក្អួត ឈឺពោះ វិលមុខ ស្រវាំងភ្នែកសន្លប់ តែពិបាកដកដង្ហើម សូមស្វែងរកការពិនិត្យ និងព្យាបាលជាបន្ទាន់ នៅមណ្ឌលសុខភាព ឬទៅមន្ទីរពេទ្យដែលនៅជិតផ្ទះរបស់លោកអ្នក ។ ជាមួយគ្នានោះដែរក្រសួងសុខាភិបាល សូមណែនាំចំពោះមនុស្សពេញវ័យទាំងអស់សូមកុំពិសាគ្រឿងស្រវឹង ក្នុងពេលបើកបរ ឬក្នុងពេលបញ្ជាគ្រឿងម៉ាស៊ីន ៕
ចែករំលែកព័តមាននេះ