ខេត្តកំពង់ស្ពឺ ៖ ផ្ទះឈើលើថ្មក្រោមមួយខ្នង និងទ្រព្យសម្បត្តិមួយចំនួនត្រូវបានភ្លើងឆាបឆេះគ្មានសល់ ដែលហេតុការណ៍នេះត្រូវបានសន្និដ្ឋានថា បណ្តាលមកពីឆ្លងចរន្តអគ្គិសនី ។ ករណីនេះសមត្ថកិច្ចបានជួយអន្តរាគមន៍បាញ់ទឹកពន្លត់អស់២រថយន្ត ទើបទប់ស្កាត់ មិនអោយឆេះរាលដាលដល់ផ្ទះអ្នកជិតខាងបាន ។ ហេតុការណ៍អគ្គិភ័យនេះកើតឡើង កាលពីវេលាម៉ោង១៨និង៤០នាទីថ្ងៃទី០៧ ខែមេសានេះ នៅភូមិកណ្ដាល ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ ។
ម្ចាស់ផ្ទះមានឈ្មោះ ពេក ទ្រី ភេទប្រុស អាយុ៦២ឆ្នាំ ។ ប្រភពពីសមត្ថកិច្ចបានអោយដឹងថាកាលពីវេលាខាងលើមានករណីអគ្គិភ័យមួយកើតឡើងឆេះផ្ទះមួយខ្នងមានទំហំ៦ម៉ែត្រគុណ ៦ម៉ែត្រ សង់ពីឈើប្រក់ស័ង្កសី ។ ក្នុងហេតុការណ៍នេះដែរ ភ្លើងឆាបឆេះម៉ូតូ១គ្រឿងម៉ាកហុងដាC50 ស្រូវ 200គីឡូ និងកង់២គ្រឿង ។
សមត្ថកិច្ចបានប្រើរថយន្តពន្លត់អគ្គិភ័យ១គ្រឿងប្រើទឹកអស់ចំនួន២ឡាន ដើម្បីទប់ស្កាត់កុំអោយភ្លើងឆាបឆេះរាលដាលទៅដល់ផ្ទះអ្នកជិតខាង និងបានជួយសង្គ្រោះនៅសល់ស្រូវ១០០គីឡូ ។ ប្រភពបន្តថា ករណីអគ្គិភ័យនេះដែរត្រូវបានដឹងថា បណ្តាលមកពីទុសេខ្សែភ្លើងនៅខាងក្រោមផ្ទះ ទើបភ្លើងឆេះរាលដាលផ្ទះទាំងមូលតែម្តង ។
បើតាមម្ចាស់ផ្ទះរៀបរាប់ គឺមុនពេលកើតហេតុគាត់បានហូបបាយរួចហើយ ក៏សម្រាកនៅក្រោមផ្ទះ ស្រាប់តែមានផ្កាភ្លើងចេញពីបារ៉ែតភ្លើង ហើយក៏ឆាបឆេះយ៉ាងសន្ធោសន្ធៅតែម្តង ។ ពេលនោះដែរ គាត់ជាម្ចាស់ផ្ទះក៏បានរាយការណ៍ទៅសមត្ថកិច្ច ដើម្បីសុំការអន្តរាគមន៍បន្ទាប់ពីគាត់សុំអន្តរាគមន៍សមត្ថកិច្ចក៏បានមកបាញ់ទឹកពន្លត់ បើទោះជាមិនទាន់ពេលក៏អាចទប់ស្កាត់មិនអោយឆ្លងរាលដាលដល់ផ្ទះអ្នកជិតខាងបាន ។
សមត្ថកិចនគរបាលបានអំពាវនាវដល់បងប្អូនប្រជាពលរដ្ឋ សូមមានការប្រុងប្រយ័ត្នអោយបានខ្ពស់ ជាពិសេសនៅពេលដែលតខ្សែភ្លើងប្រើប្រាស់នៅក្នុងផ្ទះ សូមប្រើប្រាស់ស្រទាប់ការពារខ្សែភ្លើងអោយបានល្អ ដើម្បីបង្ការទប់ស្កាត់កុំអោយកើតមានគ្រោះថ្នាក់ជាយថាហេតុដូចករណីនេះជាដើម ៕
ចែករំលែកព័តមាននេះ