ADផ្ទាំងផ្សព្វផ្សាយពាណិជ្ជកម្ម

Picture

តម្រូវការ​ជួល​អចលនទ្រព្យ​ជា​ពិសេស​ខុន​ដូ កើនឡើង​ខ្ពស់​ ខណៈ​តម្លៃ​មិនសូវ​ប្រែ​ប្រួល

4 ឆ្នាំ មុន
  • ភ្នំពេញ

រាជធានី​ភ្នំពេញ ៖ ក្នុង​ពេល​លំហូរ​វិនិយោគិន​បរទេស​ចូល​មក​កាន់​កម្ពុជា កាន់តែ​ច្រើន​នោះ គេ​សង្កេត​ឃើញ​ថា​តម្រូវការ​ជួល​អចលនទ្រព្យ ជា​ពិសេស​ខុន​ដូ ផ្ទះល្វែង និង​វីឡា បាន​កើនឡើង​យ៉ាង​គំហុក ជា​ពិសេស​ទៅ​លើ​ខុន​ដូ…

រាជធានី​ភ្នំពេញ ៖ ក្នុង​ពេល​លំហូរ​វិនិយោគិន​បរទេស​ចូល​មក​កាន់​កម្ពុជា កាន់តែ​ច្រើន​នោះ គេ​សង្កេត​ឃើញ​ថា​តម្រូវការ​ជួល​អចលនទ្រព្យ ជា​ពិសេស​ខុន​ដូ ផ្ទះល្វែង និង​វីឡា បាន​កើនឡើង​យ៉ាង​គំហុក ជា​ពិសេស​ទៅ​លើ​ខុន​ដូ ដែល​នៅ​តំបន់​ខ្លះ​មិន​អាច​ឆ្លើយ​តប​គ្រប់គ្រាន់​ទៅ​នឹង​តម្រូវការ​បាន​ឡើយ ។ អ្នក​ជំនាញ​ស្នើ​អោយ​មានការ​វិនិយោគ​បន្ថែម​ទៀត​ដើម្បី​ទប់ទល់​នឹង​តម្រូវការ នៅ​រយៈពេល​៥​ឆ្នាំ ឬ ១០​ឆ្នាំ​ខាង​មុខ ។

បើ​ទោះបីជា​តម្លៃ​នៃ​ការ​ជួល​ខុន​ដូ ហាក់​នៅ​ថេរ តែ​តម្លៃ​នៃ​ការ​ជួល​ផ្ទះល្វែង​នៅ​ជាយក្រុង​ៗ​ដែល​មាន​ជនជាតិ​ចិន​រស់នៅ​ច្រើន ត្រូវ​បាន​ម្ចាស់ផ្ទះ​អះអាង​ថា តម្លៃ​ជួល​កើនឡើង​ជាង​មុន​ជិត ៥០ ភាគរយ ខណៈ​ជួល​ឲ្យ​បងប្អូន​ខ្មែរ​បាន​ត្រឹម​រង្វង់ ៣០០ ដុល្លារ​ក្នុង​មួយ​ខែ តែ​ជួល​ឲ្យ​ចិន​គឺ​អាច​បាន ៥០០ ដុល្លារ​ក្នុង​មួយ​ខែ​សម្រាប់​ផ្ទះល្វែង​នៅ​ផ្លូវ​តូច ចុះ​ពី​ផ្លូវ​សហព័ន្ធ​រុ​ស្សី ឬ​ផ្លូវ​វេ​ង​ស្រេង ជាដើម​។

លោក​ឧកញ៉ា នួន រឹ​ទ្ធី អគ្គនាយក​ក្រុមហ៊ុន​អចលនទ្រព្យ KFA ( Khmer Founder Appraisal ) បាន​មាន​ប្រសាសន៍​ថា ក្នុង​ពេល​បច្ចុប្បន្ន​នេះ តម្រូវការ​ជួល​ទៅ​លើ​ទីតាំង​សម្រាប់​ស្នាក់​នៅ​បាន​កើនឡើង​ខ្ពស់ ជា​ពិសេស​ទៅ​លើ​ខុន​ដូ ដែល​មាន​តំបន់​ខ្លះ​មាន​អ្នក​ស្នាក់​នៅ ១០០​ភាគរយ និង​មិន​មាន​កន្លែង​សម្រាប់​ជួល​អោយ​បន្ត​ទៀត​នោះ​ទេ ។

ឧកញ៉ា នួន រឹ​ទ្ធី បន្ត​ទៀត​ថា « ជា​ការ​កត់សម្គាល់ យើង​ឃើញ​ថា ថ្វី​ត្បិត​តែ​តម្រូវការ​មាន​ខ្ពស់​ក៏​ពិតមែន តែ​ចំពោះ​តម្លៃ​នៃ​ការ​ជួល​វិញ យើង​ឃើញ​ថា​សម្រាប់​ខុន​ដូ មិន​មានការ​ប្រែប្រួល​ទេ គឺ​មាន​តម្លៃ​ប្រហាក់​ប្រហែល​នឹង​តម្លៃ​ឆ្នាំ​ចាស់​ដែរ » ។

លោក​បន្ត​ថា ក្នុង​ពេល​បច្ចុប្បន្ន​នេះ គឺ​ទាមទារ​អោយ​មានការ​វិនិយោគ​បន្ថែម​ទៅ​លើ​ខុន​ដូ ដើម្បី​ជួល និង​លក់​ជូន​ទៅ​អ្នក​ត្រូវការ ។ ដោយឡែក​សម្រាប់​អ្នក​ត្រូវការ​វិញ ក្នុង​ពេល​នេះ​ភាគច្រើន​ជា​ជនបរទេស និង​មាន​ជនជាតិ​ខ្មែរ​តិចតួច​ប៉ុណ្ណោះ ដោយសារ​តែ​ពួក​គាត់​មិន​ទាន់​ផ្លាស់​ប្តូរ​ផ្នត់គំនិត​ពី​ការ​ស្នាក់​នៅផ្ទះ​ជាប់​ដី​ទៅ​រស់នៅ​អគារ​សហកម្មសិទ្ធិ​នៅឡើយ ។

លោក​បន្ត​ថា សម្រាប់​ការ​ជួល​ទៅ​លើ​ផ្ទះល្វែង និង​វីឡា​វិញ ក៏​ឃើញ​ថា​មាន​សកម្មភាព​កើនឡើង​ខ្លាំង​ដែរ ជា​ពិសេស​នៅ​ប៉ូ​ល​ខេត្ត​ព្រះ​សីហ​នុ តែ​យ៉ាងណា​សកម្មភាព​នេះ​អាច​នឹង​ថមថយ​វិញ​នៅ​រយៈពេល ២​ឬ​៣​ឆ្នាំ​ក្រោយ ។ កំណើន​នៃ​ការ​ជួល​ផ្ទះល្វែង និង​វីឡា នៅ​ខេត្ត​ព្រះ​សីហ​នុ ដោយសារ​តែ​លំហូរ​វិនិយោគិន​ចិន បុក​មក​យ៉ាង​គំហុក​ដូច​ទឹកបាក់​ទំនប់ ហើយ​តម្លៃ​ជួល​នៅ​ទីនោះ​ក៏​ខ្ពស់​ជាងគេ​ដែរ ព្រោះ​ពួក​គេ​ត្រូវការ​កន្លែង​​ស្នាក់​នៅ​ដែល​នៅ​កណ្ដាល​ទីប្រជុំជន កណ្ដាល​ទីក្រុង ។

សម្រាប់​ជនជាតិ​ខ្មែរ​ដែល​ចង់​ជួល​ផ្ទះ​សម្រាប់​ស្នាក់​នៅ និង​បម្រើ​ការ​នៅ​ខេត្ត​ព្រះ​សីហ​នុ ត្រូវ​បង្ខំ​មក​ជួល​នៅ​តំបន់​ជាយក្រុង ពីព្រោះ​នៅ​កណ្ដាល​ទីក្រុង​បាន​ឡើងថ្លៃ​ខ្ពស់ មិន​អាច​ទប់ទល់​នឹង​ការ​ចំណាយ​បាន​ឡើយ ។

លោក​បន្ថែម​ថា ការ​ជួល​ផ្ទះ មិន​ថា​ផ្ទះល្វែង រឺ​ផ្ទះ​វីឡា ទៅ​ជនបរទេស​ដែល​ទទួល​បាន​តម្លៃ​ខ្ពស់ ជា​ការ​ផ្ដល់​អត្ថប្រយោជន៍​ដ៏​ធំ​មួយ​សម្រាប់​ប្រជាពលរដ្ឋ​នៅ​ក្នុង​មូលដ្ឋាន ហើយ​ម្ចាស់ផ្ទះ​អាច​ទៅ​រក​ជួល​ទីណា​ដែល​មាន​តម្លៃ​សមរម្យ និង​សល់​លុយ​ខ្លះ​សម្រាប់​ទិញ​ផ្ទះ​មួយ​កន្លែង​នៅ​ពេល​អនាគត ។

លោក សន សៀ​ប នាយក​គ្រប់គ្រង​ក្រុមហ៊ុន​អចលនទ្រព្យ ឃី រៀល​អ៊ី​ស្ទេ​ត​ក៏​បាន​ឲ្យ​ដឹងផង​ដែរ​ថា ជា​ការ​ពិត​ណាស់ ការ​ជួល​អចលនទ្រព្យ​ពេល​នេះ មាន​តម្រូវការ​ច្រើន​មែន ជា​ពិសេស​នៅ​តំបន់​ពាណិជ្ជកម្ម ( Commercial zone ) ហើយ​ភាគច្រើន​ជួល​ទៅ​លើ​ទីតាំង​ដែល​បើក​អាជីវកម្ម​បាន ដោយឡែក​ខុន​ដូ ក៏​មាន​ជួល​ច្រើន​តែ​តម្លៃ​មិន​ឡើងថ្លៃ​ទេ នៅ​តែ​រក្សា​ដដែល នៅ​តំបន់​ខ្លះ ។

នាយក​គ្រប់គ្រង​ក្រុមហ៊ុន​អចលនទ្រព្យ ឃី រៀល​អ៊ី​ស្ទេ​ត មាន​ប្រសាសន៍​បន្ថែម​ទៀត​ថា «​បើ​និយាយ​ទៅ​កំពង់សោម​វិញ គេ​ឃើញ​ថា​ការ​ជួល​ភាគច្រើន​ផ្ដោត​ទៅ​លើ​ទីតាំង​ស្នាក់​នៅ ដូច​ជា​ផ្ទះល្វែង​ផ្ទះ​វីឡា តែ​អាច​បើក​អាជីវកម្ម​បាន ដោយសារ​តែ​នៅ​កំពង់សោម មិន​ទាន់​មាន​ខុន​ដូ ឬ​អា​ផាត់​មិន​ច្រើន​សម្រាប់​ផ្ដល់​សេវា​ដល់​វិនិយោគិន » ។ លោក​បន្ត​ថា នៅ​ថ្ងៃ​អនាគត ការ​ជួល​ទៅ​លើ​ផ្ទះល្វែង វីឡា​នៅ​កំពង់សោម អាច​នឹង​ថមថយ​វិញ ក្រោយ​ពេល​អគារ​ដែល​កំពុង​សាងសង់​នៅ​ពេល​ហើយ​រួចរាល់​ពីព្រោះ អ្នក​ជួល​ផ្ទះ​នៅ​ពេល​នេះ នឹង​ត្រលប់​ទៅ​ជួល​ខុន​ដូ​សម្រាប់​ស្នាក់​នៅ ។

តែ​យ៉ាងណា​ក៏​ដោយ ក្នុង​ពេល​តម្លៃ​ឡើងថ្លៃ​និង​មាន​តម្រូវការ​ច្រើន​នោះ ម្ចាស់​អចលនទ្រព្យ​ក៏​មិន​គួរ​ប្រថុយ​ជួល​អោយ​អ្នក​ដទៃ​ដោយ​ឯកឯង​នោះ​ទេ ។ ពួក​គាត់​គួរតែ​រក​មេធាវី​ណា​ដែល​មាន​ជំនាញ ច្បាស់លាស់ ដើម្បី​ធ្វើ​ជា​សាក្សី និង​ឯកសារ​ក្នុង​ការ​ជួល​ទៅ​អ្នក​បន្ទាប់ ដើម្បី​ជៀសវាង​បញ្ហា​នៅ​ពេល​អនាគត ។ ជាមួយ​គ្នា​នេះ​ផង​ដែរ ការ​ជួល​ផ្ទះល្វែង​នៅ​តាម​បុរី​មួយ​ចំនួន​នៅ​ក្រុងភ្នំពេញ កំពុង​ត្រូវប៉ាន់​ម្ចាស់ផ្ទះ​ឯកជន​មួយ​ចំនួន​ផង​ដែរ​ដោយសារ​តែ​តម្លៃ​ជួល​បាន​កើនឡើង​ទ្វេរ​មួយ​ជា​ពីរ ។

«​ពី​មុន​ផ្ទះល្វែង ១ ជុង មាន​ចំនួន ២ ជាន់​គឺ​ខ្ញុំ​ជួល​បាន​ត្រឹមតែ ៣០០​ដុល្លារ​តែ​ប៉ុណ្ណោះ​ក្នុង​មួយ​ខែ ឲ្យ​ទៅ​បងប្អូន​ខ្មែរ​យើង ។ តែ​ថ្មី​ៗ​នេះ ផ្ទះ​ខ្ញុំ​ប៉ុន្មាន​ល្វែង​ទៀត​នៅ​ផ្លូវ​តូច​ជិត​ព្រ​លាន​យន្តហោះ គឺ​អាច​ជួល​បាន​តម្លៃ​ដល់​ទៅ ៥០០ ដុល្លារ​ក្នុង​មួយ​ខែ​ទៅ​ជនជាតិ​ចិន​ស្នាក់​នៅ​» ។ នេះ​ជា​ការ​លើក​ឡើង​របស់​អ្នកស្រី ស៊ីវ​អេ​ង ដែល​មានផ្ទះ​ច្រើន​ល្វែង​ដាក់​ជួល​នៅ​ជិត​ព្រ​លាន​យន្តហោះ​អន្តរជាតិ​ភ្នំពេញ ៕

អត្ថបទសរសេរ ដោយ

កែសម្រួលដោយ