ករណីឆេះយ៉ាងសន្ធោសន្ធៅនៅតំបន់មួយក្នុងប្រទេសកូរ៉េខាងត្បូង គឺមិនមានជនជាតិខ្មែរ ឬក៏ជនជាតិបរទេសណាម្នាក់ បានរងគ្រោះថ្នាក់នៅក្នុងហេតុការណ៍ឆេះនោះទេ ។ នេះបើយោងតាមការបញ្ជាក់លោកឡុង ឌី ម៉ង់ ឯកអគ្គរាជទូតប្រចាំប្រទេសកូរេ៉ខាងត្បូងប្រាប់កោះសន្តិភាព នារសៀលថ្ងៃទី០៦ មេសា នេះ ។
គួររំលឹកទៀតថា កាលពីម៉ោង០៧ និង១៧នាទីយប់(ម៉ោងក្នុងស្រុក)ថ្ងៃទី៤ មេសា មានអគ្គិភ័យមួយបានកើតឡើង នៅទីក្រុងGoseong ដែលបណ្តាលមកពីការទុស្សេខ្សែភ្លើង ហើយភ្លាមៗមានខ្យល់បក់បោក
កួចយ៉ាងខ្លាំងៗ ដែលធ្វើអោយភ្លើងឆេះរាលដាលលឿន និងគ្រប់គ្រងលែងបានភ្លាមៗនោះ។
បន្ទាប់ពីមិនអាចទប់ស្កាត់អគ្គិភ័យបាន នៅព្រឹកទី៥ មេសា លោកម៉ូន ចេអ៊ីន បានចុះដល់កន្លែងកើតហេតុ ហើយរដ្ឋាភិបាលកូរ៉េ បានដាក់ទីក្រុងGoseong ជាតំបន់គ្រោះថា្នក់ និងបានប្រកាសអាសន្នភ្លាមៗ។ រដ្ឋាភិបាលកូរ៉េ បានចល័តប្រើប្រាស់រថយន្តពន្លត់អគ្គិភ័យប្រមាណ៩០០គ្រឿង កងកម្លាំងពន្លត់អគ្គីភ័យ ១៣០០០នាក់ ឧទ្ធម្ភាគចក្រ៣៥គ្រឿង និងកងទាហានចល័ត១៦៥០០នាក់ ទៅកន្លែងកើតហេតុ ដើម្បីបញ្ចៀសការរាលដាលកាន់តែខ្លាំងបន្ថែមទៀត។
គិតមកដល់ពេលនេះ ស្ថានភាពអគ្គិភ័យស្ថិតក្រោមការគ្រប់គ្រងបាន ហើយអគ្គិភ័យបានរលត់ជាស្ថាពរនៅថ្ងៃ៥ មេសា វេលាម៉ោងប្រមាណ១១ព្រឹក ។ ឧប្បទ្ធវហេតុនេះ បានបណ្តាលឱ្យមានមនុស្ស២នាក់បាត់បង់ជីវិត រងរបួស១១នាក់ អគារតូចធំ និងផ្ទះសំបែងជាង៤០០ខ្នង និងព្រៃជាង៥០០ហិកតា ត្រូវបានលេបត្របាក់ និងបំផ្លាញដោយអគ្គីភ័យក្រហមច្រាល ហើយប្រជាជនប្រមាណជាង២៤០០នាក់ត្រូវបានជម្លៀសទៅកាន់ទីក្រុងសុវត្ថិ ក្បែរ Sokcho Gangneung និង Donghae ។
ចែករំលែកព័តមាននេះ