រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានប្រកាសថា ប្រជាពលរដ្ឋដែលជិះរថយន្តក្រុងចេញពីរាជធានីភ្នំពេញទៅតាមបណ្តាខេត្ត ក្នុងឱកាសបុណ្យចូលឆ្នាំប្រពៃណីជាតិខាងមុខនេះ នឹងមិនតម្រូវឲ្យបង់ថ្លៃឡើយ ។
សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍ថា រថយន្តក្រុងសាធារណៈរបស់សាលារាជធានីភ្នំពេញចំនួន១២០គ្រឿង នឹងត្រូវបញ្ចេញសម្រាប់ដឹកជញ្ជូនប្រជាពលរដ្ឋពីភ្នំពេញទៅតាមបណ្តាខេត្តនានាដោយឥតគិតថ្លៃរយៈពេល៧ថ្ងៃ ក្នុងឱកាសបុណ្យចូលឆ្នាំថ្មីប្រពៃណីជាតិដែលនឹងចូលមកដល់នាពេលខាងមុខនេះ ដើម្បីបញ្ចប់ការដំឡើងថ្លៃឈ្នួលរថយន្តរបស់ក្រុមហ៊ុនឯកជន ។
ថ្លែងក្នុងពិធីជួបជុំពិសាភោជនាហារជាមួយគ្រួសារកីឡាជាតិ កាលពីល្ងាចថ្ងៃទី៤ ខែមេសា សម្តេចតេជោ បានបញ្ជាក់ថា ប្រជាពលរដ្ឋដែលចេញដំណើរទៅតាមបណ្តាខេត្តនានា អាចធ្វើដំណើរតាមរថយន្តក្រុងសាធារណៈដោយមិនគិតថ្លៃ ចាប់ពីថ្ងៃទី១២ ដល់១៨ ខែមេសា។
សម្តេចតេជោបញ្ជាក់ថា «ឱកាសនេះ ជូនព័ត៌មានចំពោះកីឡាករកីឡាការិនី ក៏ដូចជាប្រជាពលរដ្ឋទូទាំងព្រះរាជាណាចក្រកម្ពុជាឱ្យបានជ្រាបថា ចាប់ពីថ្ងៃទី១២ ដល់ថ្ងៃទី១៨ ខែមេសារយៈពេល៧ថ្ងៃ សាលារាជធានីភ្នំពេញនឹងដាក់រថយន្តក្រុងចំនួន១២០គ្រឿង ដើម្បីដឹកបងប្អូនប្រជាពលរដ្ឋរបស់យើងពីរាជធានីភ្នំពេញទៅតាមបណ្តាខេត្ត និងពីខេត្តមកភ្នំពេញវិញ ដោយមិនគិតប្រាក់ ។
ខ្ញុំមិនចង់និយាយពីបញ្ហាច្រំដែលៗជាមួយនឹងម្ចាស់រថយន្តទៀតទេ កាលមុននេះប៉ុន្មានឆ្នាំហើយដែលខ្ញុំបានអំពាវនាវដល់ពួកគេ គឺកុំដំឡើងថ្លៃនៅក្នុងពេលបុណ្យចូលឆ្នាំ និងពេលបុណ្យភ្ជុំ ក៏ប៉ុន្តែមួយចំនួនក៏បានស្តាប់ តែមួយចំនួនមិនបានស្តាប់ទេ ។
ដូច្នេះហើយបានជាយើងដាក់រថយន្តរបស់យើងតែម្តង ដែលរួមមានផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ ផ្លូវជាតិលេខ៦ ផ្លូវជាតិលេខ៧ និងផ្លូវជាតិលេខ៨ ដែលនឹងចេញដំណើរចាប់ផ្តើមនៅថ្ងៃទី១២ខែមេសាតែម្តង ក្នុងនោះ ៖
-ផ្លូវជាតិលេខ១ ភ្នំពេញ ខេត្តកណ្តាល ខេត្តស្វាយរៀង ចំនួន៥គ្រឿង ភ្នំពេញ ខេត្តកណ្ដាល ខេត្តព្រៃវែងចំនួន៥គ្រឿង សរុបចំនួន១០គឿង ។
-ផ្លូវជាតិលេខ២ ភ្នំពេញ ទៅខេត្តតាកែវ ចំនួន៥គ្រឿង ។
-ផ្លូវជាតិលេខ៣ ភ្នំពេញទៅខេត្តកែបចំនួន៥គ្រឿង ភ្នំពេញទៅខេត្តកំពតចំនួន៥ គ្រឿង សរុបចំនួន១០គ្រឿង ។
-ផ្លូវជាតិលេខ៤ ភ្នំពេញទៅខេត្តកំពង់ស្ពឺ ចំនួន៣គ្រឿង ភ្នំពេញទៅក្រុងព្រះសីហនុចំនួន៧ គ្រឿងសរុបចំនួន ១០គ្រឿង ។
-ផ្លូវជាតិលេខ៥ ភ្នំពេញទៅខេត្តកំពង់ឆ្នាំង ចំនួន៥គ្រឿង ភ្នំពេញទៅខេត្តពោធិ៍សាត់ចំនួន១០គ្រឿង ភ្នំពេញទៅខេត្តបាត់ដំបងចំនួន ១៥គ្រឿង ភ្នំពេញទៅខេត្តបន្ទាយមានជ័យ១៥គ្រឿង សរុបចំនួន៤៥គ្រឿង ។
-ផ្លូវជាតិលេខ៦ ភ្នំពេញទៅខេត្តកំពង់ធំ ចំនួន៥គ្រឿង ភ្នំពេញទៅខេត្តសៀមរាបចំនួន១៥គ្រឿង សរុបចំនួន២០គ្រឿង ។
-ផ្លូវជាតិលេខ៦ និងផ្លូវជាតិលេខ៧ ពីភ្នំពេញទៅខេត្តកំពង់ចាមចំនួន៥គ្រឿង ភ្នំពេញទៅខេត្តត្បូងឃ្មុំចំនួន៥គ្រឿង សរុបចំនួន១០គ្រឿង ។ ផ្លូវជាតិលេខ៧ និងផ្លូវជាតិលេខ៨ ភ្នំពេញទៅខេត្តក្រចេះចំនួន៥គ្រឿង ភ្នំពេញទៅខេត្តស្ទឹងត្រែងចំនួន៥គ្រឿង សរុបចំនួន១០គ្រឿង ។
ដូច្នេះ យើងមានទាំងអស់ចំនួន១២០គ្រឿងសម្រាប់ការជូនដំណើរប្រជាពលរដ្ឋរបស់យើងចេញទៅចូលឆ្នាំហើយនឹងត្រឡប់ចូលរាជធានីភ្នំពេញវិញ ។ ពួកគាត់អាចធ្វើដំណើរជ្រើសរើសតាមផ្លូវនេះ ។ ដូច្នេះខ្ញុំគិតថា ចូលឆ្នាំថ្មីឆ្នាំនេះ ប្រជាជនយើងមានភាពសប្បាយរីករាយក្នុងការធ្វើដំណើរ» ៕
ចែករំលែកព័តមាននេះ