ខេត្តបាត់ដំបង ៖ ប្រជាពលរដ្ឋកំពុងប្រើគ្រប់វិធីដើម្បីជួយសង្គ្រោះជីិវិតដូនជីម្នាក់ កំពុងដេកស្ដូកស្ដឹងក្នុងពុំនូកខ្សាច់ ក្រោយពីគាត់ត្រូវឆក់ចរន្តអគ្គិសនី កាលពីវេលាម៉ោង១២ថ្ងៃត្រង់ថ្ងៃទី០៦ មេសា នេះ ខណ:គាត់កំពុងបោសសំអាតសំរាម នៅខាងមុខវត្តធម្មចារ្យរាម ហៅវត្តតាគ្រក់ ស្ថិតក្នូងភូមិតាគ្រក់ ឃុំត្រែង ស្រុករតនមណ្ឌល ហើយគ្មានឃើញអាជ្ញាធរ ឬសមត្ថកិច្ចណាមកអើពើឡើយ។ នេះបើតាមការអះអាងរបស់ប្រជាពលរដ្ឋដែលកំពុងជួយសង្គ្រោះដូនជីនៅកន្លែងកើតហេតុ ។
ដូនជីដ៏កំសត់នោះ ត្រូវគេស្គាល់ឈ្មោះហ៊ាង ហៅយាយម៉ែអាឡេ អាយុ៧៦ឆ្នាំ ជាដូនជី ស្នាក់នៅវត្តខាងលើនេះ ។ សាក្សីនៅទីនោះ បាននិយាយថា មុនពេលកើតហេតុ គេឃើញលោកយាយហ៊ាង បានបោសប្រមូលសំរាមនៅខាងមុខវត្ត តែគាត់ឃើញខ្សែភ្លើងដាច់ធ្លាក់ពីលើរបងវត្ត គាត់ក៏ចាប់ទាញខ្សែភ្លើងនោះដោយមិនដឹងថា ខ្សែភ្លើងនោះមានចរន្តភ្លើង ស្រាប់តែឆក់គាត់ដូលប្រកាច់នៅក្បែនោះតែម្ដង ។
បើតាមប្រភពដដែលបានប្រាប់ថា ពេលឃើញដូនជីដូលសន្លប់ អ្នកភូមិក៏បាននាំគ្នាយកខ្សាច់កប់លើខ្លួននិងជួយធ្វើចលនា ដើម្បីរង់ចាំអាជ្ញាធរ ឬសមត្ថកិច្ចយករថយន្តមកដឹកគាត់យកទៅមន្ទីរពេទ្យ តែមិនឃើញស្រមោលអាជ្ញាធរណាម្នាក់ចុះទៅកាន់កន្លែងកើតហេតុទេ បើទោះអ្នកភូមិបានព្យាយាមទំនាក់ទំនងហើយក្ដី ។
ពាក់ព័ន្ធនឹងខ្សែភ្លើងដាច់រប៉ាត់រប៉ាយនៅក្បែររបងវត្តនោះ លោកតាអាចារ្យម្នាក់បាននិយាយថា គេមិនដឹងថា អ្នកណាបានតភ្លើងនោះទេ ហើយគេក៏មិនដឹងថា ខ្សែភ្លើងមានផ្ទុកចរន្តដែរ ដែលនាំឲ្យឆក់ដូនជីសន្លប់បែបនេះ។
ទោះយ៉ាងណា គិតត្រិមម៉ោង០១និង២០នាទីរសៀលថ្ងៃដដែលនេះ គេមិនដឹងថា ដូនជីរងគ្រោះត្រូវបានគេជួយសង្គ្រោះហើយ ឬយ៉ាងណានោះទេ ឬក៏ដូនជីនោះត្រូវរងគ្រោះដល់ជីវិត ឬយ៉ាងណាដែរ ព្រោះបើតើតាមប្រជាពលរដ្ឋបានបញ្ជាក់ថា ស្ថានភាពដូនជីហាក់ធ្ងន់ធ្ងរបំផុត ខណ:ការជួយសង្គ្រោះរបស់អាជ្ញាធរនិងសមត្ថកិច្ចមានភាពយឺតយ៉ាវដូចអូសប្ញស្សីបញ្ច្រាសចុងនេះ ។
ចែករំលែកព័តមាននេះ