ខេត្តសៀមរាប ៖ លំនៅឋាន២ខ្នងជារបស់ម្តាយនិងកូនស្រី បានត្រូវព្រះអគ្គីលេបត្របាក់សល់តែសម្បកផ្ទះ ខណៈម្ចាស់ផ្ទះចាក់សោចោលហើយទៅសែនផ្នូរ(ឆេងម៉េង) ទោះបីជាបែបណា ពុំមានរាលដាលដល់ផ្ទះអ្នកជិតខាងទេ ។ គ្រោះអគ្គិភ័យនេះ បានកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី៥…
ខេត្តសៀមរាប ៖ លំនៅឋាន២ខ្នងជារបស់ម្តាយនិងកូនស្រី បានត្រូវព្រះអគ្គីលេបត្របាក់សល់តែសម្បកផ្ទះ ខណៈម្ចាស់ផ្ទះចាក់សោចោលហើយទៅសែនផ្នូរ(ឆេងម៉េង) ទោះបីជាបែបណា ពុំមានរាលដាលដល់ផ្ទះអ្នកជិតខាងទេ ។ គ្រោះអគ្គិភ័យនេះ បានកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី៥ ខែមេសា នៅសហគមន៍ខាងកើតដែលជាសំណង់មិនរៀបរយ លើដីចំណីផ្លូវ១៥ម៉ែត្រ ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ។ តាមអ្នកឃើញហេតុការណ៍ដំបូងនិយាយថា មុនដំបូងឃើញភ្លើងឆេះចេញពីផ្ទះមួយ លុះពេលនាំគ្នាទៅមើលតែឃើញចាក់សោជាប់ទាំងពីរផ្ទះ។
ពេលនោះ ពួកគាត់បានទូរស័ព្ទរាយការណ៍ទៅអាជ្ញាធរមូលដ្ឋានដើម្បីឱ្យជួយអន្តរាគមន៍ បន្តិចក្រោយមករថយន្តពន្លត់អគ្គិភ័យរបស់នគរបាលក៏មកដល់ ប៉ុន្តែចូលអត់បានដោយសារផ្លូវតូចចង្អៀតពេក ។ចំណែកម្ចាស់ផ្ទះដែលជាកូនស្រីឈ្មោះ ឈា ដាវី អាយុ៥០ឆ្នាំ មុខរបរលក់ដូរ និងដាក់លុយរាប់នៅតាមផ្សារ មានស្រុកកំណើតនៅស្រុកជីក្រែង បាននិយាយរៀបរាប់ទាំងទឹកភ្នែក ថា មុនពេលចាកចេញពីផ្ទះ គាត់បានមើលសព្វគ្រប់ជុំវិញអស់ហើយ ។
នៅវេលាម៉ោង៤ទៀបភ្លឺក៏ចេញទៅស្រុកកំណើតដើម្បី សែនផ្នូរ(ឆេងម៉េង) ឱ្យជីដូនជីតា ជួយឱ្យបានសុខសប្បាយ រកស៊ីមានបាន ស្រាប់តែទើបទៅដល់មុខបុរីសៀងណាំ ក៏មានអ្នកជិតខាងទូរស័ព្ទប្រាប់ថា ផ្ទះត្រូវភ្លើងឆេះ ។ ភ្លាមនោះ គាត់ក៏ត្រឡប់មកផ្ទះវិញ ឃើញផ្ទះឆេះអស់រលីងទៅហើយទោះយំក៏យំមិនចេញដែរ ។
អ្នកស្រីរៀបរាប់ទៀតថា ផ្ទះគាត់ដែលឆេះនេះ ធ្វើអំពីឥដ្ឋប្រក់ស័ង្កសី ទំហំ៥ម៉ែត្រគុណនឹង១០ម៉ែត្រ ។ ចំណែកទ្រព្យសម្បត្តិផ្សេងទៀតដែលបាត់បង់ក្នុងភ្លើងនេះដែរមាន ម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៥ ពណ៌ខ្មៅ លុយ១.០០០ដុល្លារនិង១៨លានរៀល តុ សាឡុងឈើមួយឈុត គ្រែដេក៣ ពួក២ កៅអីតុក្កតា២០ ទូដាក់ខោអាវ៣ ទូរទស្សន៍២គ្រឿង ខោអាវ ឯកសារ និងសម្ភារប្រើប្រាស់មួយចំនួនធំទៀត សរុបជាទឹកប្រាក់ប្រហែល១៣.៥០០ដុល្លារ ។
លោកឧត្តមសេនីយ៍ត្រី ភឹង សម្បត្តិ ស្នងការ រងនគរបាលខេត្តទទួលផែនការិយាល័យបង្ការពន្លត់អគ្គិភ័យនិងសង្គ្រោះ ឱ្យដឹងថា ភ្លើងដែលឆេះផ្ទះ២នាក់ម្តាយនិងកូនស្រីអស់ទាំងស្រុងចំនួន២ខ្នងនោះ គឺបណ្តាលមកពីទុស្សេខ្សែភ្លើង ។ សូមបញ្ជាក់ថា នៅក្នុងតំបន់មិនរៀបរយនេះមានផ្ទះ២៤ខ្នង និង១៩គ្រួសាររស់
នៅ ៕
ចែករំលែកព័តមាននេះ