ខេត្តសៀមរាប ៖ តំបន់ព្រៃលិចទឹកភ្នំក្រោមចំនួន៨ហិកតា បានត្រូវភ្លើងឆេះ បង្កឱ្យមានការភ្ញាក់ផ្អើលដល់បងប្អូនប្រជាពលរដ្ឋនិងសមត្ថកិច្ច ព្រមទាំងភ្ញៀវទេសចរដែលកំពុងទៅទស្សនានៅតំបន់បឹងទន្លេសាបផងដែរ ។ ហេតុការណ៍ភ្លើងឆេះព្រៃលិចទឹកនេះ កើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី៣ ខែមេសាកន្លងទៅ និងបានរលត់ទៅវិញនាវេលាម៉ោង៥ល្ងាចថ្ងៃដដែល ស្ថិតនៅក្នុងភូមិភ្នំក្រោម សង្កាត់សៀមរាប ក្រុងសៀមរាប ។
លោកវរសេនីយ៍ទោ អ៊ុន ភីរម្យ នាយរងការិយាល័យនគរបាលបង្ការពន្លត់អគ្គិភ័យនិងសង្គ្រោះ ខេត្ត បានឱ្យដឹងថា នៅក្នុងហេតុការណ៍នេះលោកបានដឹកនាំរថយន្តពន្តត់អគ្គិភ័យរបស់ស្នងការដ្ឋានខេត្តចំនួន៥គ្រឿង និងមានរថយន្តរបស់កងរាជអាវុធហត្ថ១គ្រឿងផង ទៅជួយអន្តរាគមន៍បាញ់ទឹកពន្លត់ ។
លោកបញ្ជាក់ថា ករណីភ្លើងឆេះព្រៃលិចទឹកនៅតំបន់ភ្នំក្រោមនេះ ពុំបណ្តាលឱ្យមានការឆេះរាលដាលដល់ផ្ទះអ្នកស្រុក ឬមានគ្រោះថ្នាក់ដល់មនុស្សណាម្នាក់ឡើយ ។ លោកនាយរងការិយាល័យ សំណូមពរដល់បងប្អូនប្រជាពលរដ្ឋ ក៏ដូចជាអាជីវករទាំងអស់នៅក្នុងខេត្តសៀមរាប មុននឹងចាកចេញពីផ្ទះ សូមពិនិត្យបិទកុងតាក់ ពន្លត់ភ្លើងទៀន ធូប ចង្ក្រាន។ល។
ព្រោះរដូវនេះជារដូវប្រាំង ហើយក្តៅខ្លាំងទៀត ដើម្បីចៀសវាងការកើតមានហានិភ័យជាយថាហេតុ ដូចពាក្យចាស់ពោលថា «សូវលិចទូកកណ្តាលទន្លេ កុំឱ្យតែភ្លើងឆេះផ្ទះ» ព្រោះបើឆេះអស់ហើយ គឺរកតែខោខ្លីស្លៀកក៏មិនបានផង ។
មូលហេតុដែលបង្កឱ្យមានភ្លើងឆេះព្រៃនេះត្រូវបានក្រុមមន្ត្រីប្រាប់ថា ដោយសារតែអ្នកដុតភ្លើងយកឃ្មុំមិនបានពន្លត់គប់ភ្លើង ៕
ចែករំលែកព័តមាននេះ