រាជធានីភ្នំពេញ ៖ លោក លឺ ឡាយស្រេង អតីតឧបនាយករដ្ឋមន្ត្រីបានប្រកាសថា នឹងវិលចូលស្រុកវិញនៅពេលឆាប់ៗខាងមុខនេះដើម្បីជួបជុំគ្រួសារ បន្ទាប់ពីចាកចេញអស់រយៈពេលជិត២ឆ្នាំ ។ យោងតាមវីដេអូឃ្លីប លោក លឺ ឡាយស្រេង បានសម្តែងការអរគុណសម្តេចតេជោនាយករដ្ឋមន្ត្រី ហ៊ុន សែន ដែលបានប្រកាសអនុញ្ញាតឱ្យលោកចូលស្រុកវិញ ។ «ខ្ញុំរំភើបចិត្ត និងអរគុណបងប្អូន ដែលបានទូរស័ព្ទមកសួរសុខទុក្ខ» ។
លោកបន្តថា លោកនៅតែមានជំនឿ ចំពោះសម្តេចតេជោ ហ៊ុន សែន ដែលធ្លាប់ធ្វើការជាមួយគ្នាអស់រយៈពេល៣អាណត្តិមកហើយនោះ ។ លោកថា អ្វីជាអ្នកនិយាយខុស ដោយភ្លាត់មាត់ ហើយលោកនឹងឈប់និយាយអ្វី ដែលទាក់ទងនឹងព្រះមហាក្សត្រទៀតហើយ ។ លោកបញ្ជាក់ថា៖ «ខ្ញុំលែងហ៊ាននិយាយហើយជាមួយព្រះករុណា គឺលែងនិយាយអ្វីទាំងអស់ ព្រោះថានិយាយទៅរត់ចោលស្រុក វាប៉ះពាល់កិត្តិនាមរបស់ព្រះករុណា ។ ខ្ញុំក៏សូមព្រះរាជទានទោសដែលខ្លួនធ្លាប់បម្រើតាំងពីព្រះរាជបិតា រហូតដល់ព្រះមហាក្សត្រសព្វថ្ងៃនេះ» ។
លោក លឺ ឡាយស្រេង បន្ថែមថា លោកនឹងឈប់និយាយអ្វីទាំងអស់ ដោយងាករកធ្វើបុណ្យនិងចូលវត្ត ឬបង្កើតជាមូលនិធិប្រមូលចាស់ៗល្អជាង ។ លោកបានលើកឡើងថា បន្ទាប់ពីទៅបាងកក ប្រទេសថៃ ដើម្បីឲ្យពេទ្យពិនិត្យសុខភាពរួច លោកនឹងវិលចូលស្រុកខ្មែរនៅពេលឆាប់ៗខាងមុខនេះ ។
សូមជម្រាបថា សម្តេចតេជោនាយករដ្ឋមន្ត្រី ហ៊ុន សែន កាលពីពេលថ្មីៗនេះ បានប្រកាសហៅលោក លឺ ឡាយស្រេង ឲ្យវិលចូលស្រុកវិញឲ្យបានឆាប់ ដោយកុំធ្វើអំពើខុសបន្ត ។ ការហៅឲ្យចូលស្រុកវិញនេះ គឺបន្ទាប់ពីលោក លឺ ឡាយស្រេង បានស្នើសុំសម្តេចតេជោ ដើម្បីចូលស្រុកកំណើតវិញជួបជុំបងប្អូន ៕
ចែករំលែកព័តមាននេះ