រាជធានីភ្នំពេញ ៖ ជំងឺប៉េស្តអាហ្វ្រិកដែលផ្ទុះរាលដាលឡើងខ្លាំងលើសត្វជ្រូកនៅឯប្រទេសវៀតណាមនោះ ពេលនេះត្រូវបានមន្ត្រីនៃអគ្គនាយកដ្ឋានសុខភាពសត្វនិងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទឱ្យដឹងថា ជំងឺប៉េស្តអាហ្វ្រិកនេះកំពុងផ្ទុះឡើងនៅឃុំសោមធំ ស្រុកអូរយ៉ាដាវ ខេត្តរតនគិរី ដែលជាខេត្តជាប់ព្រំប្រទល់ប្រទេសវៀតណាម និងកំពុងគំរាមកំហែងដល់ជ្រូកជាច្រើនទៀតនៅក្នុងតំបន់នោះ ។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វមានប្រសាសន៍ថា ជំងឺនេះ ពិតជាបានផ្ទុះឡើងនៅខេត្តរតនគិរីមែន គឺស្ថិតនៅភូមិសោមកានិញ ឃុំសោមធំ ស្រុកអូរយ៉ាដាវ ដែលករណីនេះ ចាប់ផ្ដើមតាំងពីថ្ងៃទី២២ ខែមីនាម្ល៉េះ តែពលរដ្ឋមិនបានចាប់អារម្មណ៍ថា ជាជំងឺប៉េស្តអាហ្វ្រិកនោះទេ ។
លោកមានប្រសាសន៍បញ្ជាក់ថា «មុនដំបូងជ្រូករបស់អ្នកភូមិសោមកានិញ ឃុំសោមធំ ចាប់ផ្ដើមងាប់ម្ដងមួយៗ តែពលរដ្ឋជាជនជាតិដើមភាគតិច ដែលនិយមចិញ្ចឹមជ្រូកកណ្តុរដើរសីុតាមព្រៃគិតថា ជាជំងឺជ្រូកធម្មតា ដោយសារតែអាកាសធាតុក្ដៅខ្លាំងពេក តែនៅពេលដែលជ្រូកនៅតែងាប់ជាបន្តបន្ទាប់ មន្ត្រីប្រចាំនៅខេត្តនោះក៏បានយកសាច់ជ្រូកមកពិនិត្យនៅថ្ងៃទី២៨ ខែមីនា ហើយជាលទ្ធផលបានរកឃើញថាជ្រូកដែលងាប់នៅតំបន់នោះ គឺផ្ទុកជំងឺប៉េស្តអាហ្វ្រិក»។
លោកអគ្គនាយកបន្តទៀតថា បន្ទាប់ពីបានដឹងពីករណីនេះហើយ រូបលោកផ្ទាល់ និងមន្ត្រីជាច្រើនក្រុមទៀត បានទៅដល់ទីនោះផ្ទាល់ ហើយសុំចរចាជាមួយពលរដ្ឋក្នុងការទិញយកជ្រូក ដែលពួកគាត់ចិញ្ចឹមដើម្បីយកទៅកម្ទេចចោល ។ រហូតមកដល់ពេលនេះ ក្រុមការងារបានកម្ទេចជ្រូកចោលជាង៤០០ក្បាលហើយ នៅសល់ជាង១០០ក្បាលទៀត ត្រូវកម្ទេចចោលនៅថ្ងៃទី៤ មេសា ហើយសង្ឃឹមថា ជំងឺនេះនឹង
ត្រូវកម្ទេចចោលអស់នៅថ្ងៃនេះផងដែរ ។
លោកថ្លែងថា «ក្រៅពីវិធានការនេះ យើងក៏បានរៀបចំទប់ស្កាត់មិនឲ្យមានការដឹកជញ្ជូនសាច់ជ្រូកចេញ-ចូលតំបន់នោះដែរ និងត្រូវទុកតំបន់នោះ ជាតំបន់ហាមឃាត់ មិនឲ្យចរាចរណ៍សាច់ជ្រូកចេញក្រៅក្នុងរង្វង់ប្រមាណ៣គីឡូម៉ែត្រជុំវិញ និងត្រូវតាមដាននៅតំបន់ផ្សេង១០គីឡូម៉ែត្រជុំវិញកន្លែងកើតហេតុផងដែរ» ។
លោកអគ្គនាយកបន្ថែមថា ជាជំហានដំបូង លោកសន្និដ្ឋានថា ជំងឺនេះឆ្លងមកដល់ជ្រូកក្នុងប្រទេសកម្ពុជា ដោយសារតែការចល័តដឹកបន្លែ និងសាច់របស់អាជីវករវៀតណាម ចូលមកលក់នៅក្នុងទឹកដីកម្ពុជា ពីព្រោះតំបន់នោះ មិនមែនជាតំបន់មានច្រកនាំចូលនោះទេ ។ ច្រកនាំចូលសំខាន់ៗពីប្រទេសវៀតណាមមកកម្ពុជា មានតែ៣ទេគឺ នៅខេត្តតាកែវ ខេត្តត្បូងឃ្មុំ និងខេត្តស្វាយរៀង ដោយឡែកច្រកផ្សេងទៀត គ្រាន់
តែជាច្រកដែលអាជីវករចេញចូលលក់បន្លែនិងសាច់ប៉ុណ្ណោះ ។
លោកបញ្ជាក់ថា ក្នុងករណីនេះ វានឹងអាចធ្វើឲ្យតម្លៃជ្រូកក្នុងស្រុកធ្លាក់ចុះ ខណៈបច្ចុប្បន្នតម្លៃជ្រូកកម្ពុជាមានហាងឆេងខ្ពស់ គួរជាទីពេញចិត្តពីកសិករ និងអ្នកចិញ្ចឹមទៅហើយ ។ លោកថា «ពេលនេះ តម្លៃជ្រូកក្នុងស្រុកយើង ស្ថិតនៅក្នុងរង្វង់ប្រមាណជាង១ម៉ឺនរៀលក្នុង១គីឡូក្រាម ជាតម្លៃមួយខ្ពស់និងកម្រមាននៅក្នុងប្រទេសកម្ពុជា» ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានបញ្ជាក់ថា ជំងឺប៉េស្តអាហ្វ្រិកនេះ ជាជំងឺដែលឆ្លងពីសត្វជ្រូកទៅសត្វជ្រូក ហើយវាមិនឆ្លងមកមនុស្សនោះទេ ក៏ប៉ុន្តែផលអាក្រក់របស់វានោះ គឺនឹងធ្វើឲ្យជ្រូកងាប់ជាបន្តបន្ទាប់ រហូតដល់អស់ពីទ្រុង ឬកសិដ្ឋាន ។ ដូច្នេះហើយ ត្រូវមានវិធានការទប់ស្កាត់ជាបន្ទាន់ បើរកឃើញថា វាកើតឡើងនៅតំបន់ណាមួយ ៕
ចែករំលែកព័តមាននេះ