អ្នកលក់ប្រហិតចៀនមុខព្រលានយន្តហោះលេងមួយប្រាវផ្អើលសមត្ថកិច្ច
- ភ្នំពេញ
រាជធានីភ្នំពេញ ៖ អ្នកលក់ប្រហិតចៀនមុខព្រលានយន្តហោះអន្តរជាតិភ្នំពេញម្នាក់ខឹងគេមកលក់ក្បែរដេញមិនចេញទាញកាំបិតកាប់ទូដាក់ប្រហិតរងការខូចខាតសមត្ថកិច្ចហៅទៅអប់រំណែនាំ និងដោះស្រាយបញ្ចប់រឿង កាលពីវេលាម៉ោង៦ល្ងាច ថ្ងៃទី០៤ ខែមេសា ឆ្នាំ២០១៩ នៅតាមបណ្ដោយផ្លូវសហព័ន្ធរុស្ស៊ី ទល់មុខប្រលានយន្តហោះអន្តរជាតិភ្នំពេញ ដែលស្ថិតនៅ សង្កាត់កាកាបទី១ ខណ្ឌពោធិ៍សែនជ័យ ។
ភាគីរងគ្រោះឈ្មោះហាក់ អន ភេទស្រី អាយុ៤៤ឆ្នាំ មុខរបរលក់ប្រហិតចៀន តាមផ្លូវ
ស្នាក់នៅភូមិព្រៃជីសាក់ សង្កាត់ចោមចៅទី២ ខណ្ឌពោធិ៍សែនជ័យ មានស្រុកកំណើតនៅស្រុកមេសាង ខេត្តព្រៃវែង ។ ចំណែកជនបង្កមានឈ្មោះអ៊ូ ចន់ណារ៉ា ភេទស្រី អាយុ៣៤ឆ្នាំ មុខរបរលក់ប្រហិតចៀន និងបាយនៅតាមផ្លូវ រស់នៅភូមិតាងួន២ សង្កាត់កាកាបទី១ ខណ្ឌពោធិ៍សែនជ័យ មានស្រុកកំណើតនៅស្រុកអង្គជ័យ ខេត្តកំពត ។
តាមសំដីស្ត្រីបង្កបានបញ្ជាក់ប្រាប់ថា មូលហេតុដែលរូបគាត់ដាច់ចិត្តប្រើអំពើហិង្សាបែបនេះ គឺព្រោះរូបគាត់ និងគ្រួសាររបស់គាត់បានទៅលក់កន្លែងទីតាំងខាងលើអស់រយៈពេលជាច្រើនឆ្នាំមកហើយ មានម៉ូយមកទិញដាច់គ្រាន់បើដែរលុះបន្ទាប់មកស្រាប់តែភាគីជម្លោះខាងលើបានមកលក់ជិតកន្លែងពួកគាត់ ហើយគាត់បានអោយលក់ឆ្ងាយពីកន្លែងគាត់ជាច្រើនដងមកហើយនៅតែមិនព្រមចេញធ្វើឲ្យគាត់ខឹងពេកទើបគាត់ហ៊ានប្រើអំពើហិង្សាបែបនេះ ។
បើតាមសំដីភាគីម្ខាងរងគ្រោះបានបញ្ជាក់ថា ខណៈពេលស្ត្រីបង្កបានវាយនឹងកាប់កម្ទេចទូប្រហិតចៀនរបួសគាត់ ដូចជា ធ្មិលចូលអញ្ចឹង ព្រោះនៅតាមចិញ្ចើមផ្លូវមុខព្រលានជាកន្លែងសាធារណចង់អ្នកណាលក់បានក៏លក់ទៅកុំអោយធ្វើអំពើហិង្សាដាក់គ្នា ម្ល៉ោះហើយគាត់មិនបានឈ្លោះប្រកែកគ្នានោះឡើយ ហើយគាត់បានទៅប្តឹងសមត្ថកិច្ចតែម្តង។
ចំណែកសមត្ថកិច្ចនគរបាលប៉ុស្តិ៍បានអោយដឹងថា ខណៈពេលដែលភាគីម្ខាងបានប្តឹងលោកនាយប៉ុស្តិ៍ផ្ទាល់ និងមន្ដ្រីនគរបាលប៉ុស្តិ៍បានទៅអញ្ជើញ ដើម្បីដោះស្រាយបែរជាភាគីបង្កខាងលើបានជេរប្រមាថពួកគាត់នៅមុខមហាជនយ៉ាងខ្លាំងដោយមិនដឹងខុសមិនដឹងត្រូវនោះឡើយ ទើបសមត្ថកិច្ចឃាត់ភាគីបង្កខាងលើយកទៅអប់រំ នៅប៉ុស្តិ៍នគរបាលកាកាបទី១ ។
បន្ទាប់មកភាគីរងគ្រោះបានទាមទារសំណងចំនួន១ពាន់ដុល្លារ ថ្លៃការខូចខាត ប៉ុន្តែសមត្ថកិច្ច មើលទៅសម្ភារខូចខាតតិចតួចដែរ ហើយសមត្ថកិច្ចបានជួយសម្របសម្រួលភាគីទាំងសង្ខាងភ្លាមៗផងដែរ ។ ក្រោយពេលកើតហេតុបន្ទាប់មកភាគីបង្កសងចំនួន១៥០ដុល្លារ និងធ្វើកិច្ចសន្យារៀងខ្លួនកុំឲ្យលក់នៅលើចិញ្ចើមផ្លូវបន្តទៀត និងកុំឲ្យកកស្ទះចរាចរណ៍ និងមួយទៀត ជនបង្កបានសុំទោសទៅភាគីរងគ្រោះភ្លាមៗផងដែរ ព្រមទាំងសុំទោសលោកនាយប៉ុស្តិ៍ និងមន្ត្រីនគរបាលដែលខ្លួនបានធ្វើខុសមិនគប្បីទៅលើពួកផងដែរ ៕
ចែករំលែកព័តមាននេះ