ខេត្តកំពត ៖ អេស្កាមួយគ្រឿង និងរថយន្តប្រភេទបែន៤ទៅ៥គ្រឿងត្រូវបានចុះកាយដីក្នុងបឹង និងដឹកជញ្ជូនដីចេញពីក្នុងបឹងមួយ ស្ថិតក្នុងភូមិបឹងធំ ឃុំអង្គសូភី ស្រុកកំពង់ត្រាច ។ ដែលការយកគ្រឿងចក្រចុះកាយក្នុងបឹងយកដីលក់នោះកើតមាន កាលពីព្រឹកថ្ងៃទី០៤ មេសា នេះ ប៉ុន្តែត្រូវបានផ្អាកទៅវិញ ដោយសារតែគ្រឿងចក្រកាយដីនោះមានការស្រពិចស្រពិលមិនទាន់ច្បាស់ការថា តើកាយដីរបស់រដ្ឋនោះចាប់ពីត្រឹមណា ហើយម្ចាស់ដីដែលមានដីជាប់ក្នុងបឹងនោះក៏ធ្វើការជំទាស់ដែរ ។
លោកជួនឧត្តម ម្ចាស់គ្រឿងចក្របាននិយាយប្រាប់អោយដឹង កាលពីព្រឹកថ្ងៃទី០៤ ខែមេសាថា អាជ្ញាធរស្រុកកំពង់ត្រាចទេ ដែលយកគ្រឿងចក្ររបស់ខ្លួនមកចុះកាយស្ដាបឹងនេះ ។ លោកជួន ឧត្តម និយាយប្រាប់ថា ការចុះស្ដាបឹង គឺខ្ញុំជាម្ចាស់គ្រឿងចក្រត្រូវការដឹកដីលក់អោយគេមែន បើស្ដាបឹងរដ្ឋមិនអោយលុយចាក់ប្រេង តើមានលុយឯណា ។ លោកជួន ឧត្តមនិយាយប្រាប់ថា បើគេជំទាស់ ខាងស្រុកអោយឈប់ គាត់ឈប់មិនទាស់អ្វីទេ ។
លោកហូ សាយ អាយុ៣៨ឆ្នាំ នៅភូមិកំពង់ត្រាចទី១ ឃុំកំពង់ត្រាចខាងកើតស្រុកកំពង់ត្រាចបាននិយាយប្រាប់ កាលពីព្រឹកមិញថា គាត់មានដីស្រែនៅជាប់មាត់បឹងដែរ ។
លោកហូ សាយនិយាយថា ការចុះស្ដាបឹងដោយមានគ្រឿងចក្របែបនេះ គឺលោកសាទរ តែបើក្រលេកមើលផ្ទៃបឹងទាំងមូលមានគេដាំបង្គោលបេតុងរំលោភយកដីបឹងទៅហើយ ។ តែអាជ្ញាធរស្រុកមិនដកបង្គោលចេញផង បែរគេមកនាំគ្នាកាយដីជាប់ និងដីគាត់បន្ថែមទៅវិញ ។ លោកនិយាយបន្តថា បើអាជ្ញាធរស្រុកមានគម្រោងកាយដីស្ដាបឹងប្រាកដមែន សូមកុំអោយមានការលំអៀងកាយអោយត្រង់ពោះបឹង ហើយអ្នកបោះបង្គោលរំលោភយកដីបឹងត្រូវដកចេញវាសំហេតុសំផល ។
លោកង៉ែត សុផល អភិបាលរងស្រុកកំពង់ត្រាចបាននិយាយប្រាប់ កាលពីព្រឹកថ្ងៃទី០៤ មេសានេះថា អាជ្ញាធរស្រុកមានគម្រោងស្ដាបឹងប៊ូអូប្រឡាយឡើងវិញ ខណៈពេលមានកើតគ្រោះរាំងស្ងួតហួតហែងមិនប្រក្រតី ។ លោកអភិបាលរងស្រុកកំពង់ត្រាចនិយាយប្រាប់ថា ពាក់ពន្ធ័រឿងដីបឹងនៅភូមិបឹងធំគ្រឿងចក្រចុះកាយមានការជំទាស់នោះ ខាងស្រុកបានអោយគ្រឿងចក្រធ្វើសកម្មភាពកាយដីក្នុងបឹងនោះផ្អាកសិន រង់ចាំបង្កើតគណៈកម្មាការចុះទៅបោះព្រំដីបឹងសិន ៕
ចែករំលែកព័តមាននេះ