ខេត្តកំពង់ធំ ៖ ដោយសារតែរកាំចិត្តនឹងម្តាយមិនព្រមរៀបការប្រពន្ធឱ្យឆាប់ៗ យុវជនម្នាក់ឈ្មោះ យឺ យ៉ាង អាយុ២២ឆ្នាំ បានចងកធ្វើអត្តឃាត និងបង្កឲ្យមានការភ្ញាក់ផ្អើល កាលពីព្រឹកថ្ងៃទី៣ ខែមេសា នៅក្នុងចម្ការស្វាយចន្ទីក្នុងភូមិផ្ដៀក ឃុំផាន់ញើម ស្រុកប្រាសាទបល្ល័ង្ក ។
យោងតាមអ្នកស្រី ទេព សាន់ អាយុ៥៨ឆ្នាំ ជាម្ដាយបង្កើតប្រាប់ថា កូនប្រុសរបស់គាត់រូបនេះធ្លាប់ប៉ងធ្វើអត្តឃាតដោយចងកម្ដងហើយ តែបានបងប្អូនក្នុងភូមិជួយទាន់ ហើយគាត់ក៏បាននាំកូនទៅស្រោចទឹកកាត់គ្រោះចេញ និងបានចូលស្តីដណ្ដឹងប្រពន្ធឲ្យរួចហើយថានឹងរៀបការឲ្យនៅឆ្នាំក្រោយ ។ ប៉ុន្តែកូនប្រុសបានសុំគាត់រៀបការក្នុងឆ្នាំនេះ ឯគាត់មិនយល់ព្រមតាមទេ ដោយលើកហេតុផលថាឆ្នាំនេះមិនសូវល្អ ហើយក៏មិនទាន់មានប្រាក់គ្រប់គ្រាន់ទៀតផង ។
អ្នកស្រីជាម្តាយរៀបរាប់ទៀតថា កាលពីថ្ងៃទី២ ខែមេសា ក្មួយៗរបស់គាត់វិលត្រឡប់មកពីធ្វើការនៅ
ឯប្រទេសថៃ ក៏នាំគ្នាទិញស្រាមកផឹក ហើយកូនគាត់ក៏ចូលរួមផឹកនឹងគេដែរ ។ រហូតដល់ម៉ោងប្រហែល
៩យប់ពួកគេនៅមិនទាន់ឈប់ផឹកទៀត គាត់ក៏ឡើងលើផ្ទះដេកមុនបាត់ទៅ ។
លុះព្រឹកឡើងថ្ងៃទី៣ ខែមេសា ស្រាប់តែមានបងប្អូនក្នុងភូមិមកប្រាប់គាត់ថា ពួកគេឃើញកូនប្រុសគាត់ចងកនៅនឹងដើមស្វាយចន្ទីខាងត្បូងផ្ទះប្រហែល១៥០ម៉ែត្រស្លាប់បាត់ទៅហើយ ដែលមិនដឹងស្លាប់តាំងពីពេលណាទេ ។
នៅពេលឮដូច្នេះ រូបគាត់និងបងប្អូនក្នុងភូមិក៏នាំគ្នាទៅមើល ហើយស្រាយចំណងទម្លាក់សពមកដី និងកាប់រំលំដើមស្វាយចន្ទីនោះចោលយកសពមកផ្ទះ ។ ក្រោយពីទទួលបានព័ត៌៌មាននេះ នគរបាលស្រុកនិងប៉ុស្ដិ៍ផាន់ញើម រួចទាំងអាជ្ញាធរឃុំ បានទៅពិនិត្យសព និងស្រាវជ្រាវពិនិត្យវិភាគកន្លែងកើតហេតុហើយសន្និដ្ឋានថា ការស្លាប់នេះគឺ ដោយសារចងកប្រាកដមែន មូលហេតុស្រវឹងស្រា ចង់រៀបការប្រពន្ធតែមិនបានដូចបំណង ៕
ចែករំលែកព័តមាននេះ