ខេត្តសៀមរាប ៖ ភ្លើងឆេះព្រៃនៅតំបន់ព្រៃលិចទឹកភ្នំក្រោមអស់៨ហិកតា បង្កឱ្យមានការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ចព្រមទាំងភ្ញៀវទេសចរណ៍ ដែលកំពុងទៅទស្សនានៅតំបន់បឹងទន្លេសាប ភ្នំក្រោមនោះផងដែរ ។ ហេតុការណ៍ឆេះព្រៃលិចទឹកនោះបានកើតឡើងនៅវេលាម៉ោង ១២និង៣០នាទី រសៀល ហើយ រលត់ទៅវិញនៅ៥និង០០នាទីល្ងាច ថ្ងៃទី៣ ខែមេសា ឆ្នាំ២០១៩ ស្ថិតនៅចំណុច ក្នុងភូមិភ្នំក្រោម សង្កាត់សៀមរាប ក្រុង/ខេត្តសៀមរាប ។
លោកវរសេនីយ៍ទោ អ៊ុន ភីរម្យ នាយរងការិយាល័យបង្កាពន្លត់អគ្គីភ័យនៃស្នងការដ្ឋាននគរបាលខេត្តសៀមរាបបានប្រាប់ឱ្យដឹងនៅរសៀលថ្ងៃទី៤ ខែមេសា ឆ្នាំ២០១៩ នេះថា មានករណីភ្លើងឆេះនៅតំបន់ព្រៃលិចទឹកមួយកន្លែងស្ថិតនៅ ភូមិភ្នំក្រោម សង្កាត់សៀមរាប ក្រុង ខេត្តសៀមរាប ពិតជាមានមែន ។
ហើយករណីឆេះព្រៃលិចទឹកអស់៨ហិកតានេះដែរលោកបានដឹកនាំកម្លាំងរថយន្តពន្តត់អគ្គីភ័យ របស់ស្នងការខេត្តចេញជួយអន្តរាគមន៍ដោយប្រើរថយន្តចំនួន៥គ្រឿង ប្រើប្រាស់បាញ់ទឹកអស់៥រថយន្ត និង រថយន្តកងរាជអាវុធហត្ថ១ គ្រឿងផងដែរ ស្ថិតក្នុងភូមិសាស្ត្រ ផ្លូវ ចង្អៀត ពិបាកចូលទើបឆេះរាលដាល់អស់ទំហំ៨ហិកតា ហើយរលត់ទៅវិញទាំងស្រុង នៅវេលាម៉ោង៥និង០០នាទីល្ងាច ថ្ងៃទី៣ ខែមេសា ឆ្នាំ២០១៩ ។
លោកបានបញ្ជាក់ថា ករណីឆេះព្រៃលិចទឹកនៅតំបន់ភ្នំក្រោមនោះ ពុំបណ្តាលឱ្យមានការឆេះរាលដាលដល់ផ្ទះប្រជាពលរដ្ឋ ឬ មានគ្រោះថ្នាក់ ដល់មនុស្សឡើយ ៕
ចែករំលែកព័តមាននេះ