ឧបនាយករដ្ឋមន្ត្រីម៉ែន សំអន ជំរុញមន្ត្រីពង្រឹងច្បាប់ និងទប់ស្កាត់អំពើពុករលួយ
- ភ្នំពេញ
រាជធានីភ្នំពេញ ៖ ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចលោកស្រីម៉ែន សំអន បានជំរុញដល់មន្ដ្រីអធិការកិច្ចត្រូវពង្រឹងការអនុវត្តច្បាប់សំដៅការទប់ស្កាត់អំពើពុករលួយ ព្រោះអំពើពុករលួយធ្វើឱ្យប៉ះពាល់ជាអវិជ្ជមានធ្ងន់ធ្ងរ ណាស់ដល់ប្រទេសជាតិ ។
ថ្លែងក្នុងពិធីបើកសន្និបាតបូកសរុបការងារក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចសម្រាប់អនុវត្ដការងារឆ្នាំ២០១៨ និងលើកទិសដៅការងារ ឆ្នាំ២០១៩ នៅសណ្ឋាគារសុខាភ្នំពេញ នាព្រឹកថ្ងៃទី៤ ខែមេសា លោកស្រីឧបនាយករដ្ឋមន្ត្រីបានលើកឡើងថា មន្ដ្រីអធិការកិច្ចទាំងអស់ត្រូវបន្ដអនុវត្តតាមស្ថាប័ន និងអង្គភាពនានាជាប្រចាំដែលនេះជាភារកិច្ចដ៏សំខាន់ទាក់ទងនឹងការពង្រឹងការអនុវត្តន៍ច្បាប់សំដៅធានាប្រឆាំងអំពើពុករលួយការរំ លោភដោយអំណាច និងបាតុភាពអសកម្មនានានៅក្នុងជួររដ្ឋបាលសាធារណៈ ក៏ដូចជាផ្នែក មិនមែនរដ្ឋ ដើម្បីធានាការប្រើប្រាស់ប្រកបដោយប្រសិទ្ធភាពនៃថវិកា និងទ្រព្យសម្បត្តិរដ្ឋ ការពារសុវត្ថិភាព សាធារណៈ និងការពារសិទ្ធរបស់ប្រជាពលរដ្ឋ ។
លោកស្រីបញ្ជាក់ថា « ថ្ងៃនេះក្រសួងទំនាក់ទំនងជាមួយរដ្ឋសភាព្រឹទ្ធិសភាព និងអធិការកិច្ច បានបើកសន្និបាតនេះមានគោលបំណងត្រួតពិនិត្យវាយតម្លៃ និងបូកសរុបលទ្ធផលការងារដែលក្រសួងបានសម្រេចក្នុងឆ្នាំ២០១៨ កន្លងមក និងដាក់ចេញនូវវិធានការណ៍ទិសដៅថ្មីៗសម្រាប់អនុវត្តបន្តក្នុងឆ្នាំ២០១៩ ដើម្បីបំពេញការងារជូនរាជរដ្ឋាភិបាល និងបម្រើប្រជាជនលើវិស័យការងារទំនាក់ទំនងសម្របសម្រួលជាមួយរដ្ឋសភា ព្រឹទ្ធសភា ការងារផ្សព្វផ្សាយច្បាប់ ការងារអធិការកិច្ច ការទទួល និងដោះស្រាយបណ្តឹងនានាសំដៅរួមចំណែកពង្រឹងអភិបាលកិច្ចល្អដែលជាឧត្តមប្រយោជន៍របស់សង្គមជាតិទាំងមូល» ។
ជាមួយគ្នានោះដែរ លោកស្រីម៉ែន សំអន បានជំរុញឲ្យមន្ដ្រីអធិការកិច្ចត្រូវបន្ដតាមដានការអនុវត្តច្បាប់ទប់ស្កាត់អំពើពុករលួយភាពអយុត្តិធម៌ក្នុងសង្គម និងការរំលោភបំពានដោយប្រើអំណាចបម្រើប្រយោជន៍បុគ្គល និងបក្សពួកគ្រួសារ និងការពារសិទ្ធរបស់ពលរដ្ឋ ពិសេស បានផ្តោតទៅលើមធ្យោបាយជាសារវន្ត័ចំនួន៣ គឺ ការអប់រំ បង្ការទប់ស្កាត់ជាមុន ការអនុវត្ត ច្បាប់ និងការចូលរួមពីមហាជន ។
លោកស្រីកិត្តិសង្គហបណ្ឌិត ម៉ែន សំអន បានបញ្ជាក់ថា ឆ្លងតាមរយៈសន្និបាតនេះមន្ដ្រីអធិការកិច្ចទាំងអស់ត្រូវអនុវត្ដ និងគោរពលោកការធំភារកិច្ចរបស់ខ្លួនឲ្យមានប្រសិទ្ធភាពដូចជាទី១- ត្រូវពង្រឹងប្រសិទ្ធិភាព កិច្ចការទំនាក់ទំងជាមួយរដ្ឋសភា -ព្រឹទ្ធសភា និងផ្សព្វផ្សាយច្បាប់ ។ ទី២ -ត្រូវពង្រឹងប្រសិទ្ធភាព កិច្ចការរដ្ឋបាល និងហិរញ្ញវត្ថុ ។ ទី៣- ត្រូវពង្រឹងប្រសិទ្ធិភាព កិច្ចការអធិការកិច្ច និងទទួលពាក្យបណ្តឹងដោះស្រាយពាក្យបណ្តឹងឲ្យបានទាន់ពេលវេលា ។ ទី៤- ត្រូវអភិវឌ្ឍធនធានមនុស្សតាមរយៈវិទ្យាស្ថានជាតិអធិការកិច្ចឲ្យបានល្អបន្ថែមទៀត ។
លោកបណ្ឌិតចាប សុថារិទ្ធ រដ្ឋលេខាធិការក្រសួងអធិការកិច្ចបានលើកឡើងថា ជាលទ្ធផលសកម្មភាពការងារក្នុងឆ្នាំ២០១៨ ក្រសួងបានអនុវត្ដការងារតាមជំនាញរបស់ខ្លួន ដើម្បីអនុវត្តផែនការយុទ្ធសាស្ត្រអភិវឌ្ឍន៍ជាតិ២០១៥-២០១៩ ក៏ដូចជា ការបន្តអនុវត្តន៍ទៅមុខទៀតក្នុងនោះក្រសួងទំនាក់ទំនងជាមួយរដ្ឋសភា – ព្រឹទ្ធសភា និងអធិការកិច្ចបានប្តេជ្ញាចិត្តចូលរួមចំណែកអនុវត្តផែនការយុទ្ធសាស្ត្រអភិវឌ្ឍន៍ជាតិ២០១៩-២០២៣ របស់រាជរដ្ឋាភិបាលដែលនឹងត្រូវអនុម័តនាពេលខាងមុខ ដើម្បីបន្តអនុវត្តយុទ្ធសាស្ត្រចតុកោណដំណាក់កាលទី៤ ដោយមានកំណត់នូវអាទិភាពសូចនាករ និងក្របខ័ណ្ឌពេលវេលាច្បាស់លាស់សម្រាប់អនុវត្តនិងយន្តការសម្រាប់តាមដានត្រួតពិនិត្យ និងវាយតម្លៃផ្អែកលើកលទ្ធផលការងារ ព្រមទាំង មានកំណត់ការទទួលខុសត្រូវរបស់ក្រសួង-ស្ថាប័នទៅតាមមុំ ឬវិស័យនីមួយៗឲ្យទទួលបានជោគជ័យទៅតាមផែនការ ៕
ចែករំលែកព័តមាននេះ