រាជធានីភ្នំពេញ ៖ ចៅក្រមសើុបសួរបានតម្រូវឱ្យឃុំខ្លួនលោកឈ្មោះ ផែង វណ្ណៈ ដាក់ពន្ធនាគារព្រៃ.សជាបណ្តោះអាសន្ន រង់ចាំបើកការសើុបអង្កេត និងដាក់ការជំនុំជម្រះលើអង្គសេចក្តី ។ ស្របពេលជាមួយគ្នានេះ…
រាជធានីភ្នំពេញ ៖ ចៅក្រមសើុបសួរបានតម្រូវឱ្យឃុំខ្លួនលោកឈ្មោះ ផែង វណ្ណៈ ដាក់ពន្ធនាគារព្រៃ.សជាបណ្តោះអាសន្ន រង់ចាំបើកការសើុបអង្កេត និងដាក់ការជំនុំជម្រះលើអង្គសេចក្តី ។ ស្របពេលជាមួយគ្នានេះ លោកផែង វណ្ណៈ បានបង្ហើបប្រាប់ក្រុមគ្រួសារនិងសាច់ញាតិ ដែលបានទៅសួរសុខទុក្ខនៅសាលាដំបូងមុនពេលសមត្ថកិច្ចនាំទៅឃុំខ្លួននៅពន្ធនាគារថា «កម្មវិធីខួបកំណើតចៅជាទីស្រឡាញ់ និងលើកដំបូងរបស់លោកដែលនឹងប្រព្រឹត្តធ្វើនៅថ្ងៃទី៤ មេសា នេះ ត្រូវបានផ្អាកទាំងស្រុង ខណៈភ្ញៀវដែលត្រូវចូលរួមខួបកំណើតចៅ ដែលបានដើរជម្រាបជិតអស់ទៅហើយ ដោយមូលហេតុម្ចាស់កម្មវិធី (ជីតា)
ត្រូវជាប់ពន្ធនាគារ។
សូមរំលឹកថា លោក កី ម៉ានេរ៉ា អនុប្រធានសាលាដំបូងរាជធានីភ្នំពេញ ដែលជាចៅក្រមសើុបសួរ កាលពីរសៀលថ្ងៃទី៣ ខែមេសា បានសម្រេចចេញដីកាឃុំខ្លួនលោកផែង វណ្ណៈ ដាក់ពន្ធនាគារជាបណ្តោះអាសន្ន យោងតាមការចោទប្រកាន់ជាផ្លូវការពីស្ថាប័នអយ្យការក្រោមបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទបរិហារកេរ្តិ៍ជាសាធារណៈ ។ ជនណាដែលបានរងនូវការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាម មាត្រា៤៩៤ មាត្រា៤៩៥ ជននោះច្បាប់តម្រូវឲ្យផ្តន្ទាទោសដាក់ពន្ធនាគារពី៦ខែ ទៅ
២ឆ្នាំ និងពិន័យជាប្រាក់ពី១លានទៅ៤លានរៀល ។ រីឯបទបរិហារកេរ្តិ៍ជាសាធារណៈ តាមមាត្រា ៣០៥ តម្រូវឲ្យផ្តន្ទាទោសពិន័យជាប្រាក់ពី១សែនទៅ១០លានរៀល ។
គួរបញ្ជាក់ថា លោក ផែង វណ្ណៈ បានត្រូវកងរាជអាវុធហត្ថលើផ្ទៃប្រទេស ដឹកនាំដោយលោកឧត្តមសេនីយ៍ គង់ សុត្ថារិន ស្នងការរងទទួលផែនយុត្តិធម៌ ឃាត់ខ្លួនកាលពីវេលាម៉ោង៨យប់ថ្ងៃទី១ ខែមេសា ខណៈលោកកំពុងលាងរថយន្តនៅផ្ទះខ្លួនឯងក្នុងក្រុងតាខ្មៅ ខេត្តកណ្តាល ពោលគឺអនុវត្តតាមដីកាបញ្ជាឲ្យចូល
ខ្លួនរបស់លោក អ៊ុំ សុភក្តី ព្រះរាជអាជ្ញារងអមសាលាដំបូងរាជធានីភ្នំពេញ ។
លោក ផែង វណ្ណៈ បានរងនូវបណ្តឹងរបស់លោក គី តិច មេធាវីការពារដោយអាណត្តិសម្តេចតេជោ ហ៊ុន សែន នាយករដ្ឋមន្ត្រី ។ ក្រោយពេលឃាត់ខ្លួនសាកសួរពេញ១យប់ រហូតដល់ព្រឹកថ្ងៃទី២ ខែមេសា សមត្ថកិច្ចកងរាជអាវុធហត្ថលើផ្ទៃប្រទេសបាននាំខ្លួនលោក ផែង វណ្ណៈ តាមរថយន្តទំនើប១គ្រឿង និងមានរថយន្តបំពាក់ដោយសុីរ៉ែន២គ្រឿងអមដំណើរ នាំទៅកាន់សាលាដំបូងរាជធានីភ្នំពេញ ។
គួររំឭកថា ពាក្យបណ្តឹងរបស់លោក គី តិច មេធាវីរបស់សម្តេចតេជោ ហ៊ុន សែន ប្តឹងលោក ផែង វណ្ណៈ គឺបានចោទថា ឈ្មោះ ផែង វណ្ណៈ បានធ្វើសំណេរផ្សព្វផ្សាយតាមទំព័រហ្វេសប៊ុក របស់ខ្លួនថា «គំនិតគួរពិចារណា !!!
១- លោក ផែង វណ្ណៈ ចាងហ្វាងការផ្សាយ និងជានិពន្ធនាយកគេហទំព័រ Pheng Vannak News តំណាងឲ្យម្ចាស់រថយន្តលេខ 2AF-7777 យកថវិកាចំនួន៥.០០០ដុល្លារ ទៅចូលបុណ្យដល់ក្រុមគ្រួសារសពនិស្សិត ឌុំ រីដា ត្រូវលោកទេសរដ្ឋមន្ត្រី ពេជ្រ ស្រស់ ប្តឹងទៅអង្គភាពប្រឆាំងអំពើពុករលួយ។ បញ្ជាក់៖ ម្ចាស់រថយន្ត 2AF-7777 គឺ ឈ្មោះ យិន ង៉ិច លោក យិន ង៉ិច មិនមែនជាជនបង្កទេ កូនទេដែលបង្ក ត្រូវចែកគ្នាឲ្យដាច់រវាងម្ចាស់រថយន្ត និងជនបង្ក ។
២-លោក លឹម ជាយុត្ថា អគ្គនាយក អង្គភាព Fresh News តំណាងឲ្យថ្នាក់ដឹកនាំយកថវិកាចំនួន៥០.០០០ដុល្លារ ទៅចូលបុណ្យ ដល់ក្រុមគ្រួសារលោកបណ្ឌិត កែម ឡី ដើម្បីធ្វើចេតិយ ម្តេចលោកទេសរដ្ឋមន្ត្រី ពេជ្រ ស្រស់ មិនប្តឹងទៅអង្គភាពប្រឆាំងអំពើពុករលួយ ? ខុសគ្នាដូចម្តេចខ្លះ បើកាន់លុយជាតំណាងទៅចូលបុណ្យដូចគ្នា ?» ។
លោក ផែង វណ្ណៈ ត្រូវបានគេស្គាល់ថា ជាអ្នកលេងហ្វេសបុ៊កល្បីម្នាក់ ដែលក្រៅពីប្រឈមនឹងបណ្តឹងរបស់លោកមេធាវីតំណាងសម្តេចតេជោ លោកក៏កំពុងរងនឹងបណ្តឹង៣ករណីទៀត ដែលពាក់ព័ន្ធនឹងបណ្តឹងបរិហារកេរ្តិ៍នៅតុលាការ និងអង្គភាពប្រឆាំងអំពើពុករលួយ(ACU) គឺ ៖
១-បណ្តឹងរបស់អង្គភាពព័ត៌មាន Fresh News
២-បណ្តឹងរបស់លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ និង៣-បណ្តឹងរបស់លោក ខាន់ សុវណ្ណ ដែលជាអ្នកលេងហ្វេសប៊ុក១រូបដែរ និងមានជម្លោះនឹងគ្នារហូតមក ៕
ចែករំលែកព័តមាននេះ