រាជធានីភ្នំពេញ ៖ ជំងឺ ប៉េសជ្រូកអាហ្វ្រិក ត្រូវបានរកឃើញមានផ្ទុះមួយករណីនៅខេត្តរតនគិរី នៃប្រទេសកម្ពុជា ។ នេះបើយោងតាមរបាយការណ៍ចុងក្រោយរបស់អង្គការសុខភាពសត្វពិភពលោក ។ របាយការណ៍នេះបានឱ្យដឹងថា ប្រទេសកម្ពុជា ត្រូវបានរក និងរាយការណ៍ពីករណីដំបូងនៃជំងឺគ្រុនជ្រូកអាហ្វ្រិកនៅក្នុងខេត្តមួយក្បែរព្រំដែនវៀតណាម ។
វីរុសនេះ ត្រូវបានគេរកឃើញនៅក្នុងកសិដ្ឋានចិញ្ចឹមជ្រូកដោយវិទ្យាស្ថានស្រាវជ្រាវសុខភាព និងផលិតកម្មសត្វជាតិនៅរាជធានីភ្នំពេញ ។ របាយការណ៍ដដែលបានលើកឡើងថា ជ្រូកចំនួន ៤០០ក្បាលបានងាប់ ហើយជ្រូកសង្ស័យចំនួន ១០០ ក្បាលទៀត ត្រូវបានងាប់ និងកំទេចចោល ។
ការផ្ទុះត្រូវជំងឺប៉េសជ្រូកអាហ្វ្រិក នៅខេត្តរតនគីរី បានបញ្ជាក់ថា មានមួយករណីតាំងពីថ្ងៃទី ២២ ខែមីនា ឆ្នាំ ២០១៩ នេះ។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មបានបញ្ជាក់ថា ពិតជាមានករណីផ្ទុះប៉េសជ្រូកអាហ្វ្រិក នៅកសិដ្ឋានមួយ ស្ថិតក្នុងឃុំសោមធំ ស្រុកអូយ៉ាវដាវ ពិតប្រាកដមែន ដែលក្នុងនោះមានជ្រូក ៤០០ ក្បាលងាប់ និងសល់ប្រមាណជាង ១០០ ក្បាលនឹងកំទេចចោលថ្ងៃនេះ៕
ចែករំលែកព័តមាននេះ