រាជធានីភ្នំពេញ ៖ បើទោះបីជាកម្ពុជារងសម្ពាធពីបណ្ដាប្រទេសធំៗមួយចំនួននៃការនាំចេញផលិតផលក៏ដោយ តែសម្រាប់ផលិតផលកសិកម្មកម្ពុជា នៅតែមានភាពល្អប្រសើរដដែលជាក់ស្ដែង ក្នុងរយៈពេលមិនដល់បីខែផង កម្ពុជាបាននាំចេញផលិតផលកសិកម្មសរុបជាផ្លូវការប្រមាណ១,៤លានតោន ។ ក្នុងនោះផងដែរ កម្ពុជាថ្មីៗនេះបានសម្រេចជោគជ័យមួយទៀត ក្នុងការផ្គត់ផ្គង់បន្លែស្រស់ទៅកាន់ទីផ្សារអឺរ៉ុប បានប្រមាណជាង ៥០ តោន ។
បើយោងតាមប្រសាសន៍លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថាជំហានថ្មីមួយទៀតរបស់កម្ពុជា នោះគឺ « ដោយសារតែមានកិច្ចសហការជាមួយក្រុមហ៊ុនអាកាសចរណ៍មួយ ឆ្នាំ ២០១៩ នេះកម្ពុជាក៏បាននាំចេញបន្លែស្រស់ ទៅកាន់ប្រទេសអឺរ៉ុប ដូចជាប្រទេសបារាំង និងអង់គ្លេស ដែលរហូតមកដល់ពេលនេះ កម្ពុជាបាននាំចេញបន្លែស្រស់ ទៅកាន់ប្រទេសទាំងនោះ សាកល្បងបានប្រមាណជាង ៥០តោនហើយផងដែរ » ។
បើទោះបីជាមានប្រទេសមួយចំនួន បានដាក់សម្ពាធលើការនាំចេញរបស់កម្ពុជា ប៉ុន្តែសម្រាប់ការនាំចេញផលិតផលកសិកម្ម របស់កម្ពុជា នៅតែមានភាពល្អប្រសើរដដែល។ ជាក់ស្ដែង រហូតមកដល់ចុងខែមីនា ឆ្នាំ ២០១៩នេះ ការនាំចេញផលិតផលកសិកម្មជាផ្លូវការ មានទំហំសរុបប្រមាណ១លាន៤សែនតោន ក្នុងរយៈពេលតែជាង២ខែ ។ នេះមិនទាន់បូកបញ្ចូលការនាំចេញក្រៅផ្លូវការទៅកាន់ប្រទេសជិតខាង ដូចជាវៀតណាម និងថៃជាដើមនៅឡើយផង ។
លោករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បន្តថា « ការនាំចេញក្រៅផ្លូវការនៃកសិផលរបស់កម្ពុជាទៅវៀតណាម ជាពិសេសការនាំចេញស្រូវ គិតត្រឹមរយៈ២ខែ ២៣ថ្ងៃនៃដើមឆ្នាំ ២០១៩នេះ មានចំនួន ១លាន១សែន២ម៉ឺនតោន ដែលជាតួលេខមិនបានកត់ត្រាពីស្ថាប័នគយ » ។ លោកបន្តថា សម្រាប់ផលិតផលកសិកម្ម ដែលកម្ពុជាផលិតបានក្នុងឆ្នាំ ២០១៨ និង២០១៩នេះ សរុបប្រមាណ ២៧លានតោន ហើយជាក់ស្ដែងនៅតាមដងផ្លូវជាតិសំខាន់គេឃើញមានការដឹកជញ្ជូនផលិតផលកសិកម្មចេញទៅក្រៅប្រទេស និងពីបណ្ដាខេត្តមករាជធានីភ្នំពេញជាដើម ។
លោកបន្តទៀតថា សម្រាប់ ផលិតផលស្រូវអង្ករ ដែលជាផលិតកសិកម្មដ៏សំខាន់ គេសង្កេតឃើញថា ទីផ្សារអឺរ៉ុបជាទីផ្សារសំខាន់ ក្នុងនោះ ៣០ភាគរយនៃការនាំចេញអង្ករសរុបទៅបណ្ដាប្រទេសអឺរ៉ុប ហើយក្នុងចំណោមបណ្ដាប្រទេសនៅអឺរ៉ុបនោះដែរ ប្រទេសបារាំងជាអ្នកបញ្ជាទិញ ច្រើនជាងគេ ដែលមានរហូតដល់៤០ភាគរយនៃទីផ្សារអឺរ៉ុបទាំងមូល ។ ក្រៅពីនោះ ក៏មានទីផ្សារចិន និងបណ្ដាទីផ្សារនៅក្នុងតំបន់អាស៊ានមួយចំនួនផងដែរ ។
លោករដ្ឋមន្ត្រី បន្ថែមថា សម្រាប់ផលិតផលចេកអំបូង ដែលកម្ពុជាទើបតែទទួលបានកូតានាំចេញទៅកាន់បណ្ដាប្រទេសមួយចំនួនក៏ឃើញថា មានភាពល្អប្រសើរផងដែរ ក្នុងនោះរយៈពេលដូចគ្នាដែរនេះ ការនាំចេញ ចេកអំបូងរបស់កម្ពុជា ទៅកាន់ទីផ្សារអន្តរជាតិសម្រេចបានប្រមាណ១ម៉ឺន៦តោន ខណៈផ្លែស្វាយបាននាំចេញប្រមាណ១ម៉ឺន៥តោនទៅកាន់ទីផ្សារលើពិភពលោកក្នុងនោះក៏មាននៅប្រទេសរុស្ស៊ី ប្រទេសអាមេរិក និងបណ្ដាប្រទេសអឺរ៉ុបផងដែរ ។ ពាក់ព័ន្ធនឹងលទ្ធភាពដែលកម្ពុជាថ្មីៗនេះអាចនាំចេញបន្លែស្រស់ ទៅកាន់ប្រទេសទាំងនោះ សាកល្បងបានប្រមាណចាំង៥០តោនហើយផងដែរ លោករដ្ឋមន្ត្រី រំពឹងថា នៅពេលដែលរដ្ឋាភិបាលបានរៀបចំអាកាសយានដ្ឋានបានល្អ និងធំជាងមុននោះ នឹងអនុញ្ញាតអោយយន្តហោះធំៗអាចចុះចតបាន ហើយក៏អាចដឹកជញ្ជូនផលិតផលកសិកម្មទៅកាន់ទីផ្សារអន្តរជាតិបានកាន់តែច្រើនផងដែរ ។
ដោយឡែកលោកប៉ាន សូរស័ក្តិ រដ្ឋមន្ត្រី ក្រសួងពាណិជ្ជកម្ម ក៏បានស្នើរដល់បណ្ដាវិនិ យោគិនបរទេសនានាបណ្ដាក់ទុនវិនិយោគក្នុងវិស័យកសិកម្មជាពិសេសកែច្នៃកសិផលក្នុងស្រុក ដើម្បី នាំចេញជាជាងនាំចេញផលិតផលមុនសម្រេចទៅកាន់ទីផ្សារអន្តរជាតិ ៕
ចែករំលែកព័តមាននេះ