សម្តេចតេជោ៖ «រឿងឡានបុកនិស្សិតម្នាក់ស្លាប់ត្រូវតែតាមរកឱ្យឃើញ…»
- ភ្នំពេញ
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានបញ្ជាឱ្យតាមចាប់អ្នកបើករថយន្តបុកនិស្សិតស្រីម្នាក់ស្លាប់ កាលពីថ្ងៃទី២៦ មីនា កន្លងមក ។ មានប្រសាសន៍ក្នុងពិធីប្រគល់សញ្ញាបត្រដល់
គរុសិស្ស គរុនិស្សិត ដែលបានបញ្ចប់ការសិក្សាឆ្នាំ២០១៧-២០១៨ សរុបចំនួន១.៩១៨នាក់ នៅវិទ្យាស្ថានជាតិអប់រំ នាព្រឹកថ្ងៃទី២៧ ខែមីនា សម្តេចតេជោបញ្ជាក់ថា៖ «រឿងរថយន្តបុកនិស្សិតម្នាក់ស្លាប់ ត្រូវតែតាមរកឱ្យឃើញ។ ករណីនេះ បណ្តាលមកពីអី គឺបណ្តាលមកពីអត់គុណធម៌ហ្នឹងឯង» ។
សម្តេចតេជោថ្លែងថា «បើអ្នកជិះម៉ូតូយឺតប៉ុនណា ក៏គង់តែលឿនជាងកង់ដែរ ហើយលឿនជាងអ្នកដើរដែរ លើកលែងតែឡាននិងម៉ូតូ តែម៉ូតូខ្លះបានវ៉ាឡានម៉ាសេរី ប៉ុន្តែគេចចុះគេចឡើងបុកផូងនៅក្រោមឡានបាត់ រឿងហ្នឹងគឺអុីចឹង» ។ សម្តេចតេជោបានលើកឡើងថា គ្រោះថ្នាក់ចរាចរណ៍សព្វថ្ងៃនេះ ធ្វើឲ្យប្រជាពលរដ្ឋស្លាប់ច្រើនជាងសម័យសង្គ្រាមទៅទៀត ។ សម័យសង្គ្រាមមានថ្ងៃខ្លះ អត់មានការប្រយុទ្ធ តែមាន អ្នកស្លាប់ និងរបួសដោយសារភ្លើងឆេះផ្ទះក្រោយការរប្រយុទ្ធ ។
សម្តេចតេជោបញ្ជាក់ថា៖ «ស្រុកខ្មែរបច្ចុប្បន្ន ថ្ងៃណាក៏មានស្លាប់ និងរបួស ជាធម្យមមាន៧នាក់ក្នុងមួយថ្ងៃគិតជាមធ្យម ។ អុីចឹងច្រើនជាសម័យសង្គ្រាមទៅទៀត អីុចឹងត្រូវយកចិត្តទុកដាក់»។ ជាមួយគ្នានេះ ការស្លាប់ដោយសារគ្រោះថ្នាក់ចរាចរណ៍ ជំហានដំបូងគប្បីត្រូវនិយាយពីបញ្ហាគោរពច្បាប់ចរាចរណ៍ទាក់ទងនឹងការមិនប្រើប្រាស់គ្រឿងញៀន និងបញ្ហាសីលធម៌ ។ រឿងទាំងអស់នេះគឺជារឿងដែលយើងត្រូវដោះស្រាយ។
សូមរំឭកថា កាលពីរសៀលថ្ងៃទី២៦ ខែមីនាកន្លងទៅ យុវតីជានិស្សិតម្នាក់បានត្រូវរថយន្តស៊េរីទំនើបមួយគ្រឿងម៉ាក រ៉េន រ៉ូវើរ ដែលបើកក្នុងល្បឿនយ៉ាងលឿន បុកស្លាប់នៅនឹងកន្លែង ខណៈយុវតីរូបនេះជិះម៉ូតូចេញពីសាលារៀន ។ ហេតុការណ៍ខាងលើ ធ្វើឱ្យមានការភ្ញាក់ផ្អើលយ៉ាងខ្លាំងជុំវិញមរណភាពយុវតីរូបនេះ។ រថយន្តស៊េរីទំនើបមួយគ្រឿងពាក់ផ្លាកលេខភ្នំពេញ ២AF-៧៧៧៧ ដែលបើកឆ្លងកាត់ផ្លូវបំបែកជា៤ក្នុងល្បឿនយ៉ាងលឿនដូចហោះ បានបុកម៉ូតគុបជ្រុងមួយគ្រឿងបណ្តាលឲ្យយុវតីម្នាក់ជានិស្សិតឆ្នាំទី៤នៅសាកលវិទ្យាល័យផារ៉ាហ្កន ស្លាប់ភា្លម ។
ក្រោយកើតហេតុ រថយន្តត្រូវបានបើករត់គេចបាត់ស្រមោល តែក្រោយមកត្រូវបានប្រជាការពារសង្កាត់ស្ទឹងមានជ័យទី១ ប្រទះឃើញកំពុងឱ្យរថយន្តសណ្តោងបម្រុងរត់គេចខ្លួនបន្តទៀត ។ ទោះជាយ៉ាងណា ប្រជាការពារបានទាក់ទង ហៅសមត្ថកិច្ចឲ្យមកស្ទាក់ចាប់ និងបង្កឲ្យមានការភ្ញាក់ផ្អើលឡើង កាលពីវេលាម៉ោង១១ និង៤៥នាទីយប់ថ្ងៃទី២៦ ខែមីនា នៅខាងមុខយានដ្ឋានជួសជុលរថយន្តយីហោ ឯក វុទ្ធី តាមផ្លូវលេខ៣៧១ ក្នុងសង្កាត់ស្ទឹងមានជ័យទី៣ ខណ្ឌមានជ័យ ។
ប្រភពព័ត៌មានពីបុរសម្នាក់ជាប្រជាការពារសង្កាត់ស្ទឹងមានជ័យទី១បានឲ្យដឹងថា ខណៈគាត់ជិះម៉ូតូល្បាតមកដល់ចំណុចខាងលើ ស្រាប់តែប្រទះឃើញរថយន្តស៊េរីទំនើបមួយគ្រឿងម៉ាករ៉េន រ៉ូវើរ ពណ៌ខ្មៅ មានស្នាមបែកកញ្ចក់និងកាងមុខចំហៀងខាងស្តាំ ថែមទាំងយកក្រដាសកាសែតបិទពីលើផ្លាកលេខរថយន្ត កំពុងឈប់ចត និងមានរថយន្តមួយគ្រឿងទៀតម៉ាកហ៊ីយ៉ាន់ដាយ ពណ៌ស ជាប្រភេទរថយន្តស៊ីឈ្នួលសណ្តោងឯកជន កំពុងរៀបចំសណ្តោងរថយន្តស៊េរីទំនើបខាងលើចេញពីកន្លែងកើតហេតុ ។
ដោយមានការសង្ស័យទៅលើរថយន្តស៊េរីទំនើបនេះ គាត់ក៏រាយការណ៍ជូនសមត្ថកិច្ចមូលដ្ឋានឲ្យចុះមកត្រួតពិនិត្យភ្លាមៗង ។ បន្ទាប់មក សមត្ថកិច្ចបានបកក្រដាសកាសែតចេញពីផ្លាកលេខ ទើបដឹងថារថយន្តនោះពាក់ផ្លាកលេខ ភ្នំពេញ ២AF-៧៧៧៧ ជារថយន្តដែលបង្កគ្រោះថ្នាក់ចរាចរណ៍បណ្តាលឲ្យយវតីម្នាក់ស្លាប់ភ្លាមៗនៅក្នុងខណ្ឌទួលគោក រួចបើកគេចខ្លួន ដែលកម្លាំងសមត្ថកិច្ចកំពុងស្រាវជ្រាវស្វែងរក ។
តាមបុរសដែលជាអ្នកបើកបររថយន្តស៊ីឈ្នួលសណ្តោង ប្រាប់ឲ្យដឹងថា នាវេលាម៉ោង១០យប់ថ្ងៃទី២៦ ខែមីនានោះ មានបុរសម្នាក់ទូរស័ព្ទមករកគាត់ឲ្យទៅសណ្តោងរថយន្តមួយគ្រឿងដែលខូចនៅចំណុចខាងលើ ដើម្បីយកទៅស្នងការដ្ឋាននគរបាលរាជធានីភ្នំពេញ ។
ពេលនោះ គាត់ក៏បើករថយន្តសណ្តោងទៅកន្លែងកើតហេតុ ឃើញបុរសម្នាក់បើករថយន្តខាងលើចេញមកពីក្នុងយានដ្ឋានជួសជុលរថយន្តយីហោ ឯក វុទ្ធី តែមិនទាន់បានសណ្តោងផង ក៏ស្រាប់តែមានកម្លាំងសមត្ថកិច្ចចុះមកឃាត់តែម្តង។ ចំណែកឯបុរសម្នាក់ដែលបើករថយន្តនោះចេញមក ក៏បានគេចខ្លួនចេញពីកន្លែងកើតហេតុបាត់ស្រមោលទៅ បន្ទាប់ពីឃើញសមត្ថកិច្ច ។
គួរបញ្ជាក់ថា កាលពីវេលាម៉ោងប្រមាណ២រសៀលថ្ងៃទី២៦ ខែមីនាកន្លងទៅ រថយន្តខាងលើបានបើកបុកម៉ូតូមួយគ្រឿងម៉ាក គុបជ្រុង ពណ៌ខៀវ ពាក់ផ្លាកលេខ កណ្តាល ១ J-៥២៥៤ បណ្តាលឲ្យយុវតីម្នាក់ឈ្មោះ ឌុំ រីដា អាយុ២៤ឆ្នាំ ជានិស្សិតជាប់អាហារូបករណ៍ឆ្នាំទី៤នៃសាកលវិទ្យាល័យផារ៉ាហ្កន មានស្រុកកំណើតនៅក្នុងភូមិកំពង់ដំរី ឃុំព្រែកតាមាក់ស្រុកខ្សាច់កណ្ដាល ខេត្តកណ្ដាល ស្លាប់ភ្លាមនៅនឹងកន្លែងកើតហេតុ ត្រង់ចំណុចកែងរវាងផ្លូវលេខ៣១៧និងផ្លូវលេខ៥២៨ ស្ថិតក្នុងសង្កាត់បឹងកក់ទី១ ខណ្ឌទួលគោក ។ បន្ទាប់ពីកើតមានគ្រោះថ្នាក់នេះ រថយន្តខាងលើក៏បើករត់គេចខ្លួនចេញពីកន្លែងកើតហេតុបាត់ស្រមោលតែម្តង ។
ក្រោយពេលប្រទះឃើញ សមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញឲ្យមកស្ទូចយករថយន្តខាងលើទៅរក្សាទុកនៅការិយាល័យនគរបាលចរាចរណ៍ផ្លូវគោករាជធានីភ្នំពេញ ដើម្បីចាត់ការទៅតាមនីតិវិធីច្បាប់ជាបន្តទៀត ។ ចំណែកសពយុវតីរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី ។
ដោយការមានប្រតិកម្មនានាសម្រាប់លេខរថយន្តដែលថតបានតាមកាមេរ៉ាសុវត្ថិភាព ក៏ត្រូវបានគេដឹងថាជារថយន្តរបស់លោកផ្កាយមួយ សេង ពិទូរ្យ ដែលពេលនេះលោកកំពុងស្ថិតនៅប្រទេសរុស្ស៊ី ។ ប៉ុន្តែតាមការបង្ហោះហ្វេសប៊ុករបស់លោក សេង ពិទូរ្យ ភ្លាមៗបង្ហាញថា លោកបានលក់រថយន្តនេះ៣ឆ្នាំមកហើយ តែមិនទាន់បានកាត់ឈ្មោះ ។
តាមសេចក្តីរាយការណ៍បឋមឲ្យដឹងថា លោកវរសេនីយ៍ឯក សែម គន្ធា នាយការិយាល័យនគរបាលចរាចរណ៍ផ្លូវគោករាជធានីភ្នំពេញ បានថ្លែង ប្រាប់បណ្តាញព័ត៌មានក្នុងស្រុក ទាក់ទិនទៅនឹងម្ចាស់រថយន្ត រ៉េន រ៉ូវើរ ពាក់ផ្លាកលេខ ២AF-៧៧៧៧ គឺឈ្មោះ យិន ហ្គិច បានចូលបំភ្លឺនៅការិយាល័យនគរបាលចរាចរណ៍ផ្លូវគោកហើយ នារសៀលថ្ងៃទី២៧ ខែមីនា បន្ទាប់ពីការប្រកាសរបស់សម្តេចតេជោជុំវិញករណីនេះ។ ប៉ុន្តែលោក យិន ហ្គិច មិនមែនជាអ្នកបង្កគ្រោះថ្នាក់ចរាចរណ៍បុកនិស្សិតស្រីស្លាប់នោះទេ តែជាឪពុករបស់នារីម្នាក់ដែលគេសង្ស័យថាជាអ្នកបើករថយន្តដែលមានឈ្មោះក្នុងគណនីហ្វេសប៊ុក Yin Mana ។
លោក សែម គន្ធា បន្តថា ពេលនេះសមត្ថកិច្ចកំពុងបន្តនីតិវិធី ដោយពុំទាន់សម្រេចយ៉ាងណានៅឡើយទេ ដើម្បីចៀសវាងការចោទប្រកាន់លើជនបង្កខុសមនុស្ស ។ សមត្ថកិច្ចបាននិងកំពុងសាកសួរឈ្មោះ យិន ហ្គិច ជាឪពុកយ៉ាងយកចិត្តទុកដាក់ ។ ប្រភពព័ត៌មានជាច្រើនបញ្ជាក់ថា អត្តសញ្ញាណអ្នកបើករថយន្ត រ៉េន រ៉ូវើរ ពាក់ស្លាកលេខ ២AF-៧៧៧៧ ដែលបុកនិស្សិតស្រីឆ្នាំទី៤ម្នាក់ស្លាប់ នោះ គឺជាកូនស្រីថៅកែសណ្ឋាគារប្រេមអិចប្រេសអង្គរ នៅខេត្តសៀមរាប ដែលមានឪពុកឈ្មោះ យិន ហ្គិច ជាសមាជិកក្រុមប្រឹក្សាខេត្ត
សៀមរាប ហើយកូនស្រីនោះឈ្មោះ យិន ម៉ាណា ។ នៅរសៀលថ្ងៃដដែលនោះ ការចូលខ្លួនបំភ្លឺរបស់លោក យិន ហ្គិច មិនត្រូវបានគេដឹងថា តើអ្នកបង្កគ្រោះថ្នាក់នោះជានរណា ? តាមក្រុមគ្រួសារយុវតីរងគ្រោះនៅតែប្រកាន់ថា ទាមទារឱ្យជនបង្កចូលខ្លួនមកសុំទោស ហើយត្រូវតែប្រឈមចំពោះមុខច្បាប់ ។
តាមព័ត៌មានថា លោក យិន ហ្គិច ជាម្ចាស់រថយន្តបានផ្ញើប្រាក់ចូលបុណ្យចំនួន៥.០០០ដុល្លារតាមរយៈលោក ផែង វណ្ណៈ អ្នកលេងហ្វេសប៊ុកល្បីឈ្មោះម្នាក់ ។ នៅមានការចូលបុណ្យពីស្ថាប័នកាកបាទក្រហម អ្នកសិល្បៈ និងមិត្តភក្តិជាច្រើនផងដែរ ៕
ចែករំលែកព័តមាននេះ