រាជធានីភ្នំពេញ៖ រូបថតជាច្រើនសន្លឹកដែលតារាចម្រៀងលោកជី ដេវីដ និងទេព បូព្រឹក្ស បង្ហាញតាមហ្វេសប៊ុកកំពុងត្រូវមហាជនចាប់អារម្មណ៍ និងសង្ស័យថា ជារូបភាពPre Wedding របស់អ្នកទាំងពីរ…
រាជធានីភ្នំពេញ៖ រូបថតជាច្រើនសន្លឹកដែលតារាចម្រៀងលោកជី ដេវីដ និងទេព បូព្រឹក្ស បង្ហាញតាមហ្វេសប៊ុកកំពុងត្រូវមហាជនចាប់អារម្មណ៍ និងសង្ស័យថា ជារូបភាពPre Wedding របស់អ្នកទាំងពីរ ។ តាមរយៈរូបភាពច្រើនសន្លឹកដែលបង្ហោះតាមហ្វេសប៊ុកកាលពីពេល ថ្មីៗកន្លងមករបស់តារាចម្រៀងទាំងពីររូបនេះ មានរូបភាព២សន្លឹកត្រូវគេកត់សម្គាល់ថា ជារូបភាពថតមុនអាពាហ៍ពិពាហ៍ចូលមកដល់ ។
ឈុតសម្លៀកបំពាក់អាពាហ៍ពិពាហ៍ត្រូវជី ដេវីដ និងទេព បូព្រឹក្ស ស្លៀកថតជាមួយទិដ្ឋភាពផ្ទៃសមុទ្រដ៏ស្រស់ស្អាតនៅដែនកោះម៉ាល់ឌីវ ទីដែលអ្នកទាំងពីរចេញទៅធ្វើដំណើរកម្សាន្តកាលពីពេលថ្មីៗនេះ ។ រូបភាពនោះត្រូវមហាជន ជាពិសេសអ្នកគាំទ្រនាំគ្នាស្ងើចសរសើរនូវភាពស្រស់ស្អាត និងភាពសក្តិសមជានឹងគ្នា ។ មានទស្សនិកជនខ្លះសង្ស័យថា នេះរូបភាព Pre Wedding របស់អ្នកទាំងពីរ ។
បើទោះបីជាមានការសង្ស័យពីមហាជនក្តី ជី ដេវីដ និងទេព បូព្រឹក្ស ហាក់នៅមិនទាន់ទទួលស្គាល់នៅឡើយទេ បើទោះបីជាអ្នកទាំងពីរបានបង្ហាញសកម្មភាពយ៉ាងស្និទ្ធស្នាលគ្នាលើសពីសង្សារយ៉ាងណាក៏ដោយ ។ នៅពេលដែលមានការជជីកសួរពីមហាជននោះ តារាចម្រៀងទេព បូព្រឹក្ស ត្រឹមតែបានឆ្លើយតបថា ទោះជាទៅដល់ទីកន្លែងណាក៏ដោយ ក៏នាងចង់បង្ហាញនូវសម្លៀកបំពាក់ដែលជាប្រពៃណីរបស់ខ្មែរដែរ។
បើទោះបីជាទេព បូព្រឹក្ស មិនបានទទួលស្គាល់នូវអ្វីដែលគេកំពុងចាប់អារម្មណ៍ពីការត្រៀមខ្លួនសម្រាប់ចូលរោងការជាមួយដៃគូលោកជីដេវីដ នៅក្នុងរយៈពេលខាងនេះក៏ដោយ ប៉ុន្តែតាមរយៈរូបភាពស្និទ្ធស្នាល និងការថតរូបបែបសិល្បៈជាបន្តបន្ទាប់នោះ ប្រាកដណាស់គេជឿថា អ្នកទាំងពីរនឹងអាចមានដំណឹងល្អក្នុងពេល ឆាប់ៗខាងមុខនេះ ។
ជី ដេវីដ និងទេព បូព្រឹក្ស បានទទួលស្គាល់ថា អ្នកទាំងពីរគឺជាសង្សារនឹងគ្នាបន្ទាប់ពីបានសាងទ្រនំនៅក្នុងផលិតកម្មរួមគ្នាក្នុងរយៈពេលប៉ុន្មានឆ្នាំចុងក្រោយនេះ ខណៈពេលដែលអ្នកទាំងពីរបានបង្ហាញនូវភាពស្និទ្ធស្នាលយ៉ាងផ្អែមល្ហែមយ៉ាងបើកចំហ ។
កន្លងមកទេព បូព្រឹក្ស ធ្លាប់បានសារភាពថា បូព្រឹក្ស ថែមទាំងអះអាងទៀតថា ស្នេហានាងជាមួយជី ដេវីត គឺជាស្នេហ៍ពិត ដែលមានគ្រួសារទាំងសងខាងដឹងឮអស់ទៀតផង។ ជាងនេះទៅទៀតទេព បូព្រឹក្ស និងជី ដេវីត បានដាក់ហ៊ុនចូលគ្នារកស៊ីនាំផលិតផលរក្សាសម្រស់ពីបរទេស មកលក់នៅស្រុកខ្មែរដែលបានចំណាយដើមទុនរាប់ម៉ឺនដុល្លារថែមទៀតផង ។
មហាជនសន្និដ្ឋានថា ក្រោយពេលដែលទេព បូព្រឹក្ស និងជី ដេវីត បញ្ចេញភាពផ្អែមល្ហែមលើសស្ករពីមួយថ្ងៃទៅមួយថ្ងៃ ជាមួយនឹងការដាក់ទុនធំរកស៊ីចូលគ្នា គូស្នេហ៍យុវវ័យនេះអាចនឹងភ្ជាប់ពាក្យ និងចូលរោងការនាពេល ឆាប់ៗខាងមុខ ៕
ចែករំលែកព័តមាននេះ