ខេត្តកំពត ៖ សេចក្តីរាយការណ៍បឋមបានឲ្យដឹងថា មានក្មេងស្រីអាយុ១៣ឆ្នាំត្រូវជនសង្ស័យចំនួន២នាក់ចាប់នាងរំលោភជាបន្តគ្នា ខណៈក្មេងស្រីរងគ្រោះបានដើរចេញពីផ្ទះទៅមើលការប្រគំតន្ត្រីនៅក្នុងភូមិ ហើយនាងបានទៅបត់ជើងតូចក្បែរមាត់ព្រៃ ក៏ត្រូវជនសង្ស័យ២នាក់ចាប់អូសចូលសាលារួចធ្វើសកម្មភាពរំលោភបានសម្រេចជាបន្តបន្ទាប់ កាលពីវេលាម៉ោង៧យប់ថ្ងៃទី១៩ មីនា នៅស្រុកអង្គរជ័យ ខេត្តកំពត ។
តាមសេចក្តីរាយការណ៍បានបន្តថា មុនពេលកើតហេតុ ក្មេងស្រីរងគ្រោះបានដើរចេញពីផ្ទះទៅមើលការប្រគំតន្ត្រីនៅក្នុងភូមិ លុះបានមួយសន្ទុះនាងក៏ដើរទៅបត់ជើងតូចនៅមាត់ព្រៃក្បែរនោះ ស្រាប់តែលេចមុខជនសង្ស័យម្នាក់ ឈ្មោះ សុខ កុសល ចាប់ដៃនាងអូសចូលក្នុងសាលាមួយកន្លែងរួចធ្វើសកម្មភាពរំលោភសេពសន្ថវៈរហូតបានសម្រេច ។
ក្រោយពីឈ្មោះ សុខ កុសល ចាប់រំលោភនាងបានសម្រេចរួចហើយ ស្រាប់តែឈ្មោះ ខាត់ វី ម្នាក់ទៀតដែលជាអ្នកឈរយាមផ្លូវឲ្យឈ្មោះ សុខ កុសល ប្រព្រឹត្តបទល្មើសនោះបានស្ទុះទៅចាប់អូសនាងយកទៅរំលោភ នៅក្នុងព្រៃជាប់ជើងភ្នំក្បែរសាលានោះដែរ ពេលធ្វើសកម្មភាពរួច ជនសង្ស័យទាំង២នាក់បានគេចខ្លួនបាត់ ។
ជនសង្ស័យទាំង២នាក់ខាងលើត្រូវបានសមត្ថកិច្ចស្គាល់អត្តសញ្ញាណអស់ហើយ ដែលជនសង្ស័យម្នាក់ឈ្មោះ ខាន់ វី ភេទប្រុស អាយុ១៧ឆ្នាំ រស់នៅភូមិពោធិ៍ ឃុំភ្នំកុង ស្រុកអង្គរជ័យ ខេត្តកំពត និងជនសង្ស័យម្នាក់ទៀតឈ្មោះ សុខ សុកល់ អាយុ១៧ឆ្នាំ នៅភូមិព្រៃផ្តៅ ឃុំភ្នំកុង ស្រុកអង្គរជ័យ ខេត្តកំពត ។
ពាក់ព័ន្ធនឹងករណីខាងលើនេះ សមត្ថកិច្ចក៏បានធ្វើការឃាត់ខ្លួនជនសង្ស័យម្នាក់ទៀតឈ្មោះ មុត សែមភក្តី ភេទប្រុស អាយុ១៨ឆ្នាំ នៅភូមិត្រពាំងរាំង ឃុំតានី ស្រុកអង្គរជ័យ ខេត្តកំពត ដែលជាបក្ខពួកជនសង្ស័យទាំង២នាក់ខាងលើ និងជាអ្នកលបមើលគេប្រព្រឹត្តបទល្មើស ។
ករណីខាងលើនេះសមត្ថកិច្ចបានទទួលពាក្យបណ្តឹងពីជនរងគ្រោះកាលពីវេលាម៉ោង៣រសៀលថ្ងៃទី ២០ មីនា ហើយសមត្ថកិច្ចបានចាត់កម្លាំងតាមស្វែងរកចាប់ខ្លួនជនសង្ស័យផងដែរ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ