អាមេរិកងាកទៅរកជប៉ុនមានបំណងសម្រេចកិច្ចព្រមព្រៀងពាណិជ្ជកម្មសេរីស៊ីជម្រៅជាមួយគ្នា
រដ្ឋធានីវ៉ាស៊ីនតោន៖ ភ្នាក់ងារសារព័ត៌មាន Bloomberg បានឲ្យដឹងកាលពីថ្ងៃពុធ កន្លងមកថា លោកប្រធានាធិបតី ដូណាល់ ត្រាំ (Donald Trump)…
រដ្ឋធានីវ៉ាស៊ីនតោន៖ ភ្នាក់ងារសារព័ត៌មាន Bloomberg បានឲ្យដឹងកាលពីថ្ងៃពុធ កន្លងមកថា លោកប្រធានាធិបតី ដូណាល់ ត្រាំ (Donald Trump)…
រដ្ឋធានីវ៉ាស៊ីនតោន៖ ភ្នាក់ងារសារព័ត៌មាន Bloomberg បានឲ្យដឹងកាលពីថ្ងៃពុធ កន្លងមកថា លោកប្រធានាធិបតី ដូណាល់ ត្រាំ (Donald Trump) បាននិយាយកាលពីថ្ងៃអង្គារ៍ ថារដ្ឋាភិបាលរបស់លោកនឹងជំរុញឲ្យមានការសម្រេចកិច្ចព្រមព្រៀងពាណិជ្ជកម្មសេរីស៊ីជម្រៅជាមួយនឹងប្រទេសជប៉ុនដែលបង្ហាញពីចំណាប់អារម្មណ៍ក្នុងការព្យាយាមបើកទូលាយទីផ្សារកសិកម្មរបស់ប្រទេសជប៉ុនបន្ថែមទៀត ។
លោកប្រធានាធិបតី ត្រាំ បានបង្ហាញពីភាពមិនពេញចិត្តទៅនឹងពន្ធជប៉ុនលើសាច់គោ និងជ្រូកបង្ហាញថារដ្ឋាភិបាលរបស់លោកនឹងមានគោលជំហររឹងមាំជាងមុនក្នុងការចរចាពាណិជ្ជកម្មជាមួយនឹងប្រទេសជប៉ុនដែលនឹងចាប់ផ្តើមក្នុងពេលខ្លីខាងមុខ ។
រដ្ឋាភិបាលជប៉ុនបាននិយាយថា ការចរចាខាងមុខនេះនឹងផ្តោតសំខាន់លើបញ្ហាពន្ធ។ ផ្ទុយមកវិញ រដ្ឋាភិបាលអាមេរិកចង់សម្រេចបានកិច្ចព្រមព្រៀងពាណិជ្ជកម្មសេរីដែលស៊ីជម្រៅជាងនេះដែលផ្តោតលើវិស័យសេវាកម្មនិងបញ្ហាអត្រាប្តូរប្រាក់ផងដែរ។
យោងតាមរបាយការណ៍សេដ្ឋកិច្ចរបស់ប្រធានាធិបតីអាមេរិកបានឲ្យដឹងថា រដ្ឋាភិបាលអាមេរិកមានគម្រោងចូលរួមការចរចាលើពាណិជ្ជកម្មសេរីជាមួយនឹងជប៉ុន។
លោកប្រធានាធិបតីត្រាំបានឲ្យដឹងថាសហរដ្ឋអាមេរិកនឹងទាមទារការបើកទូលាយទីផ្សារកសិកម្មជប៉ុនបន្ថែមទៀតក្នុងកំឡុងពេលចរចានេះ។
របាយការណ៍ខាងលើបានឲ្យដឹងថា «ដៃគូអន្តរជាតិជាច្រើនដូចជាអូស្ត្រាលី បង់ពន្ធឲ្យទៅជប៉ុនទាបជាងយ៉ាងខ្លាំង ដូច្នេះកិច្ចព្រមព្រៀងពាណិជ្ជកម្មសេរីមួយជប៉ុនអាចផ្តល់ភាពយុត្តិធម៌ដល់ក្រុមហ៊ុននាំចេញអាមេរិក»។
លោក Robert Lighthizer ដែលជាអ្នកតំណាងពាណិជ្ជកម្មអាមេរិកបាននិយាយកាលពីខែមុនថារដ្ឋាភិបាលទាំងពីរនឹងចាប់ផ្តើមការចរចាពាណិជ្ជកម្មនៅខែមិនា ប៉ុន្តែពួកគេប្រហែលជាមិនអាចចាប់ផ្តើមមុនខែមេសា ឬឧសភាទេព្រោះសហរដ្ឋអាមេរិកកំពុងតែផ្តោតសំខាន់លើការចរចាពាណិជ្ជកម្មជាមួយនឹងប្រទេសចិន។
យោងទៅតាមទិន្នន័យរដ្ឋាភិបាលជប៉ុនបានឲ្យដឹងថា ការនាំចូលសាច់គោពីអូស្ត្រាលី កាណាដា ម៉ិកស៊ិក និងនូវែលសេឡង់ដែលជាសមាជិកកិច្ចព្រមព្រៀងស៊ីជម្រៅនិងដំណើរការទៅមុខនៃភាពជាដៃគូពាណិជ្ជកម្មប៉ាស៊ីហ្វិកបានកើនឡើងច្រើនជាង ៥០%ទៅទៀតកាលពីខែមករា។
ក្រៅពីកសិកម្មហើយ របាយការណ៍ខាងលើបានបង្ហាញថារដ្ឋាភិបាលនឹងជំរុញដល់ប្រទេសជប៉ុននិងប្រទេសចិនឲ្យបង្កើនការទិញហ្គាសពីសហរដ្ឋអាមេរិកផងដែរ ៕
ចែករំលែកព័តមាននេះ