ខេត្តកំពង់ឆ្នាំង ៖ សោកនាដកម្មដ៏រន្ធត់មួយដែលប្តីប្រពន្ធ រួមទាំងកូនប្រុសតូចទើបអាយុ១ឆ្នាំ បានស្លាប់ព្រមគ្នាក្នុងគ្រោះថ្នាក់រថយន្តបុកជាមួយម៉ូតូ កាលពីវេលាម៉ោង៤រសៀលថ្ងៃទី១៨ មីនា នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ៤៩និងលេខ៥០ ស្ថិតក្នុងភូមិតាកុល…
ខេត្តកំពង់ឆ្នាំង ៖ សោកនាដកម្មដ៏រន្ធត់មួយដែលប្តីប្រពន្ធ រួមទាំងកូនប្រុសតូចទើបអាយុ១ឆ្នាំ បានស្លាប់ព្រមគ្នាក្នុងគ្រោះថ្នាក់រថយន្តបុកជាមួយម៉ូតូ កាលពីវេលាម៉ោង៤រសៀលថ្ងៃទី១៨ មីនា នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ៤៩និងលេខ៥០ ស្ថិតក្នុងភូមិតាកុល ឃុំពានី ស្រុកកំពង់ត្រឡាច ។
អធិការនគរបាលស្រុកកំពង់ត្រឡាច លោក នន ស៊ីណាត បានឲ្យដឹងថា គ្រួសាររងគ្រោះមានទីលំនៅក្នុងភូមិសុបិន ឃុំពានី ដែលបុរសជាប្តីឈ្មោះ ប៉ុក សារឿន អាយុ២៧ឆ្នាំ ប្រពន្ធឈ្មោះច្រិក សម្ផស្ស អាយុ២៥ឆ្នាំ និងកូនប្រុសអាយុទើប១ឆ្នាំ ឈ្មោះ ស៊ឹម សុចាន់ ។ ប្រភពដដែលបន្តថា ជនរងគ្រោះទាំង៣នាក់
ឪពុក ម្តាយនិងកូនតូច ជិះម៉ូតូមួយគ្រឿងម៉ាកហុងដាស១២៥ ពាក់ផ្លាកលេខ កំពង់ឆ្នាំង ១H-0៧៤៣ ក្នុងទិសដៅពីខាងជើងទៅខាងត្បូង ។
លុះមកដល់ចំណុចខាងលើ ស្រាប់តែមានរថយន្តធុនធំមួយគ្រឿងម៉ាកនីស្សាន់ ពណ៌ក្រហមឆ្នូតនិងពណ៌ទឹកប្រាក់ ពាក់ផ្លាកលេខក្រចេះ៣A ០៣៦៥ បើកបរដោយបុរសឈ្មោះ យឿន សុភាអាយុ២៦ឆ្នាំ មានទីលំនៅភូមិសំរោង ឃុំតាជេស ស្រុកកំពង់ត្រឡាច ក្នុងទិសដៅពីខាងជើងទៅខាងត្បូង ។ លុះមកដល់ចំណុចខាងលើ ក៏បានបត់ទៅទិសខាងលិចបណ្ដាលឱ្យបុកគ្នាជាមួយម៉ូតូជនរងគ្រោះចូលកង់ក្រោយស្លាប់បាត់បង់ជីវិតទាំងគ្រួសារតែម្តង ។
ក្រោយពេលកើតហេតុ អ្នកបើកបររថយន្ត បានបើករត់គេចចូលទៅលាក់ទុកនៅការដ្ឋានរណ្តៅដី ហើយគេចខ្លួនបាត់ ។ ទោះជាយ៉ាងនេះក្តី សមត្ថកិច្ចបានតាមរករថយន្តនោះឃើញ និងនាំយកមករក្សាទុកដើម្បីកសាងសំណុំរឿងបញ្ជូនទៅសាលាដំបូង ។ ដោយឡែក សពជនរងគ្រោះទាំង៣នាក់ ឪពុក ម្តាយនិងកូនតូច ត្រូវបានក្រុមគ្រួសារយកទៅធ្វើបុណ្យតាមប្រពៃណី ។
ករណីគ្រោះថ្នាក់ចរាចរណ៍ខាងលើត្រូវបានសមត្ថកិច្ចឲ្យដឹងថា អ្នកបើកបររថយន្ត និងម៉ូតូខ្វះការប្រុងប្រយ័ត្នទាំងសងខាង ព្រោះកន្លែងកើតហេតុ ជាការដ្ឋានកំពុងធ្វើផ្លូវ មានស្លាកសញ្ញាជាសម្គាល់ឱ្យប្រុងប្រយ័ត្ននិងបន្ថយល្បឿន ៕
ចែករំលែកព័តមាននេះ