ព្រៃវែង ៖ បើគេធ្វើដំណើរតាមបណ្តោយផ្លូវជាតិលេខ១ ពីទីប្រជុំជនអ្នកលឿង ឆ្ពោះទៅកាន់ខេត្តស្វាយរៀង ពេលមកដល់ចំណុចភូមិសង្កែចុង ឃុំក្រាំងស្វាយ ស្រុកព្រះស្តេច នៅតាមបណ្តោយអមសងខាងដងផ្លូវ គេនិងឃើញមានអ្នកស្រុកដាក់តាំងកំប៉ុងជ័រជាច្រើន មានតូចមានធំទៅតាមថ្នាក់របស់វា កំប៉ុងទាំងនោះគឺជាកំប៉ុងផ្អកត្រីក្រឹម ផ្អកកំពឹស និងត្រីប្រហុកជាដើម ដែលគេដាក់លក់ជាមួយនិងផ្លែខ្វិត។
ជួបជាមួយអ្នកយកព័ត៌មានកោះសន្តិភាព អ្នកភូមិទាំងនោះបានអោយដឹងថា ក្រៅពីផ្អកនិងត្រីប្រហុកនេះ ពួកគាត់ក៏មានលក់ជ្រក់អង្ក្រង ជ្រក់ត្រពាំង ជ្រក់មមាញ ជ្រក់ស្ពៃ និងជ្រក់ត្រាវផងដែរ ដោយក្នុង១កំប៉ុងតូចលក់តម្លៃ១ម៉ឺនរៀល និង១កំប៉ុងធំលក់តម្លៃ១០ ម៉ឹនរៀល ហើយទាំងផ្អកនិងជ្រក់ទាំងនេះ គឺពួកគាត់សុទ្ធតែធ្វើដោយខ្លួនឯង មិនបានទិញតពីគេយកមកលក់នោះទេ ព្រោះខ្លាចគេធ្វើមិនស្អាត ខ្លាចពុលអ្នកហូប។
ចំណែកបងស្រី មាស ស្រីនាង ជាអ្នកលក់ម្នាក់ក្នុងចំណោមអ្នកភូមិទាំងនោះ បានប្រាប់អោយកោះសន្តិភាពដឹងដែរថា គាត់ចាប់យកមុខរបរលក់ផ្អកត្រីក្រឹម ផ្អកកំពឹស និងត្រីប្រហុកនេះតាំងពីឆ្នាំ២០១៦មកម្លេះ ដោយពីដំបូងមានតែគាត់និងប្អូនស្រីប៉ុណ្ណោះដែលចាប់មុខរបរនេះ លុះក្រោយៗមកក៏ចេះតែមានអ្នកផ្សេងៗទៀតលក់តាម ដោយពីដំបូងគេនាំគ្នាមកទិញពីគាត់យកទៅដាក់លក់បន្ត ហើយក្រោយមកក៏ធ្វើលក់ខ្លួនឯង និងបានកើនឡើងជាបន្តបន្ទាប់រហូតដល់សព្វថ្ងៃនេះមានអ្នកលក់ជិត៥០នាក់ហើយ។ ចំណែកអ្នកទិញភាគច្រើន គឺជាអ្នកនៅភ្នំពេញ ដែលពេលថ្ងៃសំរាកគេមកលេងស្រុក ឬមកការបងប្អូនត្រឡប់ទៅវិញក៏ចូលទិញយកទៅហូប ជាពិសេសគឺកម្មកររោងចក្រតែម្តង ហើយពេលដែលលក់ដាច់ខ្លាំងគឺខែបុណ្យទាន។
បងស្រី មាស ស្រីនាង បានបញ្ជាក់ថា មូលហេតុដែលគាត់ចាប់យកមុខរបរនេះ ដោយសារតែគ្រួសារគាត់មានមុខរបរមួយទៀត គឺដើរទិញត្រីពីអ្នកស្រុកដែលគេរកនៅតាមបឹង តាមទន្លេ យកមកលក់នៅតាមផ្សារ ប៉ុន្តែពេលខ្លះត្រីលក់មិនអស់នៅសល់យកមកផ្ទះ មិនដឹងចោលទៅណា ម្តាយគាត់ក៏ធ្វើជាផ្អកញាត់កំប៉ុងទុក យូរៗទៅផ្អកកំប៉ុងកាន់តែច្រើនឡើងៗមិនដឹងយកទៅណា ក៏បែកគំនិតដាក់តាំងលក់នៅចិញ្ចើមថ្នល់មុខផ្ទះ ហើយអ្នកជិតខាងឃើញហើយនាំគ្នាសើចថាសូម្បីតែផ្អកប្រហុកក៏យកមកលក់លើថ្នល់ដែរ ប៉ុន្តែពេលលក់យូរៗមានអ្នកដំណើរចេះតែមកឈប់ទិញច្រើនឡើងៗ រហូតក្នុង១ថ្ងៃគាត់អាចលក់បានពី៦០ទៅ៧០ម៉ឺនរៀល ទើបធ្វើអោយអ្នកដែលសើចគាត់ បែរជានាំគ្នាធ្វើលក់តាមគាត់ដែរ និងបន្តច្រើនឡើងៗដូចសព្វថ្ងៃនេះតែម្តង។
ទោះជាយ៉ាងណាក៏ដោយ អ្នកភូមិសង្កែចុងបានប្រាប់ដូចៗគ្នាថា មុខរបរលក់ផ្អកត្រីក្រឹម ផ្អកកំពឹសជាមួយផ្លែខ្វិតនេះ បានជួយដោះស្រាយក្នុងជីវភាពពួកគាត់ច្រើន គឺរួចថ្លៃម្ហូបអាហារ ថ្លៃកូនរៀន និងថ្លៃចងដៃការបុណ្យទានផ្សេងៗផងដែរ៕
ចែករំលែកព័តមាននេះ