ខេត្តកំពង់ស្ពឺ ៖ បន្ទាប់ពីចូលរួមមង្គលការបងប្អូនរួច បុរសម្នាក់បើកបររថយន្តត្រឡប់ទៅផ្ទះវិញ លុះធ្វើដំណើរបានពាក់កណ្តាលផ្លូវ ស្រាប់តែរថយន្តឆ្លងចរន្តផ្នែកខាងមុខបង្កជាអគ្គិភ័យឆាបឆេះ ធ្វើអោយម្ចាស់រថយន្តភ័យស្លន់ស្លោស្រែកហៅគេជួយផ្អើលដល់សមត្ថកិច្ចចេញរថយន្តពន្លត់អគ្គិភ័យទៅជួយអន្តរាគមន៍បាញ់ទឹកពន្លត់ ។ ក្នុងហេតុការណ៍នេះដែរមិនបណ្តាលអោយមានគ្រោះថ្នាក់ដល់អាយុជីវិតមនុស្សណាម្នាក់ឡើយ នេះបើតាមការបញ្ជាក់ពីសមត្ថកិច្ច។
ហេតុការណ៍ខាងលើនេះបង្កការភ្ញាក់ផ្អើលកើតឡើងកាលពីវេលាម៉ោង៩និង៣០នាទីយប់ថ្ងៃទី១៤ មីនា ២០១៩ តាមបណ្តោយផ្លូវលេខ៤១ នៅចំណុចភូមិចាស់ ឃុំបរសេដ្ឋ ស្រុកបរសេដ្ឋ ខេត្តកំពង់ស្ពឺ ។
រថយន្តមួយគ្រឿងដែលត្រូវភ្លើងឆាបឆេះខាងលើម៉ាកកាមរី បាឡែន ពណ៌ទឹកប្រាក់ ពាក់ស្លាកលេខ ភ្នំពេញ ១AN-៤១២៧ មានម្ចាស់ឈ្មោះ ហឿន រដ្ឋា ភេទប្រុស អាយុ៣០ឆ្នាំ នៅភូមិដំបូកខ្ពស់ ឃុំផុង ស្រុកបសេដ្ឋ ខេត្តកំពង់ស្ពឺ។
តាមប្រភពពីសមត្ថកិច្ចបានអោយដឹងថា តាមការសាកសួរម្ចាស់រថយន្តបានប្រាប់ឱ្យដឹងថា មុនពេលកើតហេតុ គាត់បានចេញពីផ្ទះទៅចូលរួមមង្គលការបងប្អូនរហូតដល់យប់បន្តិចក៏ត្រឡប់មកផ្ទះវិញ។
ប្រភពដដែលបានបន្តថា ពេលគាត់កំពុងតែបើកបររថយន្តក្នុងទិសដៅពីកើតទៅលិច លុះមកដល់ចំណុចកើតហេតុខាងលើ ស្រាប់តែរថយន្តឆ្លងចរន្តផ្នែកខាងមុខបង្កជាអគ្គិភ័យឆាបឆេះយ៉ាងសន្ឋោសន្ឋៅតែម្តង ពេលនោះគាត់ក៏បានស្រែកហៅអោយពលរដ្ឋដែលមានទីលំនៅក្បែរនោះជួយផ្តល់ដំណឹងដល់សមត្ថកិច្ចដើម្បីឱ្យជួយអន្តរាគមន៍ពន្លត់។
តាមប្រភពដដែលបានអោយដឹងទៀតថា ក្រោយពីទទួលបានសេចក្តីរាយការណ៍ខាងលើរួចមក សមត្ថកិច្ចបានចេញរថយន្តពន្លត់អគ្គិភ័យទៅជួយអន្តរាគមន៍បាញ់ទឹកពន្លត់។ ជាលទ្ធផល សមត្ថកិច្ចប្រើប្រាស់ទឹកអស់មួយរថយន្ត ទើបភ្លើងបានរលត់អស់ជាស្ថាពរ ។ ក្នុងហេតុការណ៍នោះផងដែរពុំមានគ្រោះថ្នាក់ដល់អាយុជីវិតមនុស្សណាម្នាក់នោះទេ។
ពាក់ព័ន្ធនឹងករណីខាងលើ សមត្ថកិច្ចបានសន្និដ្ឋានថា មូលហេតុគឺបណ្តាលមកពីរថយន្តឆ្លងចរន្ត ព្រោះភ្លើងបានឆាបឆេះចេញពីផ្នែកខាងមុខមុន ។
សមត្ថកិច្ចបានអំពាវនាវដល់បងប្អូនដែលប្រើប្រាស់រថយន្តទាំងអស់ សូមត្រួតពិនិត្យរថយន្តរបស់ខ្លួនអោយបានត្រឹមត្រូវ ចៀសវាងជួបហេតុការណ៍អាក្រក់ដូចករណីខាងលើនេះ។
នៅព្រឹកថ្ងៃទី១៥ មីនា ឆ្នាំ២០១៩នេះ បន្ទាប់ពីធ្វើកំណត់ហេតុរួចរាល់ សមត្ថកិច្ចបានប្រគល់ថយន្តទៅអោយម្ចាស់យកទីជួសជុលប្រើប្រាស់វិញ៕
ចែករំលែកព័តមាននេះ