រហូតមកទល់ពេលនេះ លោក សម រង្ស៊ី មិនអាចសម្រេចនូវអ្វីដែលលោកចង់បាន បើទោះបីជាលោកបានប្រឹងប្រែងគ្រប់មធ្យោបាយហើយក្តី ។ ប៉ុន្តែផ្ទុយទៅវិញ ស្ថានភាពនយោបាយចុងក្រោយ ហាក់ដូចជាមិនអំណោយផលដល់លោកទេ ដោយអាចធ្វើឱ្យជីវិតនយោបាយរបស់លោកនឹងត្រូវបញ្ចប់ ខណៈដែលសន្លឹកបៀនយោបាយរបស់លោកកឹម សុខា មិនទាន់ត្រូវបានធីបចោល ។
បើទោះបីជារូបលោកស្ថិតនៅក្រៅប្រទេសក្តី លោក សម រង្ស៊ី នៅតែបន្តការរំខានដល់រដ្ឋាភិបាលកម្ពុជា និងសម្តេចតេជោហ៊ុន សែន តាមរយៈសកម្មភាពជាច្រើន ដែលលោកអាចធ្វើបាននៅក្រៅប្រទេស ។ លោក សម រង្ស៊ី បានទាក់ទាញទឹកចិត្តជនបរទេស ឱ្យដាក់ការគាបសង្កត់ដល់រដ្ឋាភិបាលដែល ដឹកនាំដោយសម្តេចតេជោហ៊ុន សែន ។ លោក សម រង្ស៊ី បានទាមទារឱ្យមានការបើកផ្លូវឱ្យរូបលោក រូបលោក កឹម សុខា និងអ្នកនយោបាយប្រឆាំងផ្សេងទៀត ដែលហាមឃាត់អាចធ្វើនយោបាយដូចដើម ។ លោក ទាមទារឱ្យគណបក្សសង្គ្រោះជាតិរស់ឡើងវិញ និងការទាមទារមូួយចំនួនទៀត។ ធ្ងន់ធ្ងរជាងនេះ លោកទាមទារអោយមានការកំចាត់សម្តេចតេជោហ៊ុន សែន ចេញពីតំណែងនាយករដ្ឋមន្ត្រី ។
ប៉ុន្តែរាល់ការទាមទាររបស់លោក រហូតមកទល់ពេលនេះ មិនទាន់បានទទួលផ្លែផ្កាណាមួយឡើយ។ ផ្ទុយមកវិញ លោកគ្រាន់តែបានដុតកំហឹង ដល់សម្តេចតេជោហ៊ុន សែន ដែលជាអ្នកកាន់សន្លឹកបៀនយោបាយសំខាន់ជាងគេបំផុត នៅក្នុងប្រទេសកម្ពុជានៅពេលនេះ ។
ជាប្រតិកម្មទៅនឹងការវាយលុកដោយលោក សម រង្ស៊ី នោះ សម្តេចតេជោ ហ៊ុន សែន បានឈានដល់ការសម្រេចចិត្តមួយដែលថា ការបង្រួបបម្រួមជាមួយលោក សម រង្ស៊ី គឺមិនអាចទៅរួចទេ ។ ដូច្នេះ សម្តេចក៏ធីបចោលសន្លឹកបៀនយោបាយរបស់លោកសម រង្ស៊ី ។
ស្ថានភាពបែបនេះ បានធ្វើអោយលោកសមរង្ស៊ី មានការព្រួយបារម្ភថា នឹងមានការប្រែប្រួលនយោបាយផ្ទៃក្នុង នៅក្នុងសម្ព័ន្ធភាព រវាងក្រុមលោកនឹងក្រុមលោកកឹម សុខា ។ នៅពេលដែលក្រឡាអុកនយោបាយ របស់លោក ហាក់ដូចជាជាប់គាំងនោះ លោក សម រង្ស៊ី បារម្ភថា ក្រុមលោក កឹមសុខា អាចដើរចេញពីក្រុមរបស់លោក ហើយអាចមានវាសនានយោបាយឡើងវិញ តាមរយៈការសម្របសម្រូួលមួយ ដែលអាចនឹងកើតមានជាមួយសម្តេចតេជោ ហ៊ុន សែន ។
លោក សម រង្ស៊ី ថ្មីៗ បានចេញសារនាយោបាយដែលមានលក្ខណៈព្រមាន ដល់ក្រុមលោកកឹម សុខា មិន អោយធ្វើការសុំសិទ្ធិធ្វើនយោបាយឡើងវិញ ខណៈដែលមួយរយៈពេលចុងក្រោយនេះ គេសង្កេតឃើញ មានការប្រឈមមុខដាក់គ្នា កាន់តែខ្លាំងរវាងក្រុមលោកសម រង្ស៊ី និងក្រុមលោកកឹម សុខា ។
លោក សម រង្ស៊ី រហូតមកដល់ពេលនេះ មិនមានភាពបត់បែននយោបាយឱ្យបានគ្រប់គ្រាន់ដើម្បី រកច្រកចេញដ៏ល្អមួយ សម្រាប់ក្រុមអ្នកគាំទ្ររបស់លោកឡើយ ដោយធ្វើឱ្យគេនឹកឃើញដល់ការបែកបាក់ដែលធ្លាប់មានរវាងសម្ព័ន្ធភាព រវាងលោកនិងសម្តេចក្រុមព្រះនរោត្តម រណប្ញទ្ធិ ដែលពេលនោះ ជាព្រះប្រធានគណបសក្សហ្វុ៊ន ស៊ិនប៉ិច ដ៏ធំមូួយ ។ ពេលនេះ បើសិនជាក្រុមរបស់លោកកឹម សុខា មានភាពបន់បែន នយោបាយរហ័សជាងនោះ វានឹងធ្វើអោយលោកសម រង្ស៊ី ទទួលបរាជ័យខ្លាំងបំផុត នៅក្នុងឆាកជីវិតនយោបាយរបស់លោក ចាប់តាំងពីរូបលោកចាកចេញ ពីគណពក្សហ្វ៊ុនស៊ិនប៉ិច និងបានបង្កើតគណបក្សនយោបាយឈ្មោះគណបក្សជាតិខ្មែរ ដែលក្រោយមកប្តូរឈ្មោះ ជាគណបក្សសម រង្ស៊ី កាលពីឆ្នាំ១៩៩៥។
នៅពេលគេពិបាកនឹងឃើញពន្លឺនយោបាយរះឡើងវិញ សម្រាប់លោក សម រង្ស៊ី នោះ ការចាប់អារម្មណ៍ នឹងសម្លឹងមើលថា តើលោកកឹម សុខា និងក្រុមរបស់លោក មានភាពបត់បែននយោបាយយ៉ាងណា? តើក្រុមលោកកឹម សុខា នឹងបន្តធ្វើនយោបាយជាមួយនឹងជំហរដ៏រឹងប៉ឹងរបស់លោកសម រង្ស៊ី ទៀតឬយ៉ាងណា?
បើសិនជាក្រុមលោកកឹម សុខា នៅតែប្រកាន់ជំហរដូចសម រង្ស៊ី នោះ នយោបាយកម្ពុជានឹងស្ថិតនៅក្នុងស្ថានភាពបច្ចុប្បន្នបន្តទៀត ដោយគ្មានភាពប្រាកដប្រជា ។ ចំណែកលោកកឹម សុខា ទំនងជានឹងស្ថិតនៅក្នុងការឃុំខ្លួន គ្មានពេលកំណត់បន្តទៀត ។ នេះជាសេណារីយ៉ូនយោបាយ ដែលអាក្រក់បំផុត សម្រាប់លោកសម រង្ស៊ី លោក កឹម សុខា និងអ្នកគាំទ្រ និងសម្រាប់ប្រទេសកម្ពុជាផងដែរ ពីព្រោះអ្វីៗត្រូវដាក់អោយស្ថិតនៅក្នុងភាពប្រាកដប្រជាយូរអង្វែង ។
ជម្រើសនយោបាយដែលល្អសម្រាប់អ្នកនយោបាយប្រឆាំង គឺត្រូវរកវិធីណាមួយ ដែលពួកគេអាចធ្វើនយោបាយឡើងវិញយ៉ាងពេញលេញ និងមានមេដឹកនាំដ៏ត្រឹមត្រូវ ដើម្បីធ្វើការប្រកួតនយោបាយនៅក្នុងការបោះឆ្នោតខាងមុខ ។ ការខ្វះភាពបត់បែន និងការខ្វះការរៀបចំក្រឡានយោបាយ ថ្មីនឹងមិនអាចនាំផលល្អ ដល់ពួកគេឡើយ ។ ការរង់ចាំឱកាសដោយមិនបានធ្វើអ្វីមួយ វាមិនខុសពីការធ្វើអត្តឃាត ផ្នែកនយោបាយឡើយ។
ការស្រមៃអោយគណបក្សគណបក្សសង្គ្រោះជាតិរស់ឡើងវិញ គឺជាការស្រមៃដែលមិនអាចក្លាយជាការពិតបានទេ ។ ចំណែកការគិតថា គ្មានគណបក្សសង្គ្រោះជាតិ គឺជាទីបញ្ចប់ផ្នែក នយោបាយសម្រាប់ អ្នក នយោបាយប្រឆាំងក៏អាចជាការគិតខុសមួយ។
គេត្រូវតែធ្វើការវិភាគអោយសព្វជ្រុងជ្រោយ ទៅលើការសម្រេចចិត្តរបស់អ្នកបោះឆ្នោត ។ តើគណបក្ស សង្គ្រោះជាតិ អាចដណ្តើមកៅអីបានរហូត ដល់៥៥កៅអី ក្នុងចំណោមកៅអី១២៣ នៅរដ្ឋសភាកាលពីការបោះឆ្នោតឆ្នាំ២០១៣ គឺដោយសារតែឈ្មោះសង្គ្រោះជាតិ ដោយសារតែសម រង្ស៊ី និង ដោយសារ កឹមសុខា?
ការសម្លឹងមួយភ្លែត គេនឹងងាយនឹងឈានដល់ការសន្និដ្ឋានបែបនេះ ។ វាជាការបដិសេធ ការពិតមួយ កាលបើនិយាយថា លោក សម រង្ស៊ី លោក កឹម សុខា និងគណបក្សសង្គ្រោះជាតិ មិនបានចូលរួមចំណែកចំពោះភាពជោគជ័យនោះ។
ប៉ុន្តែបើពិនិត្យអោយស៊ីជម្រៅទៅ លោក សម រង្ស៊ី លោក កឹម សុខា និងគណបក្សសង្គ្រោះជាតិកាលនោះអាចមានប្រជាប្រិយភាពកាន់តែខ្លាំង ក៏ដោយសារតែប្រជាជនកាន់តែច្រើន មានការមិនពេញចិត្តទៅនឹងបញ្ហាសង្គម ដូចជាសេវាសាធារណៈអន់ថយ ដូចជាវិស័យសុខាភិបាល និងវិស័យអប់រំ អំពើពុករលួយ បញ្ហាគ្រឿងញៀន និងបញ្ហាជាច្រើន ដែលញាំញីដល់សង្គមកម្ពុជា។ ជាងនេះទៅទៀត ការសន្យាផ្តល់ ប្រាក់ខែ១៦០ដុល្លារ នៅក្នុងមួយខែដល់កម្មករកាត់ដេរ បានមានឥទ្ធិពលជាខ្លាំង ដល់ការសម្រេចចិត្តរបស់កម្មករកាត់ដេរជាង៧សែននាក់ និងក្រុមគ្រួសាររបស់ពួកគេ នៅក្នុងការបោះឆ្នោតកាលពី
ឆ្នាំ២០១៣។
ដោយពិនិត្យមើលហេតុការណ៍ទាំងអស់នេះ អ្នកនយោបាយប្រឆាំងនៅតែមានលទ្ធភាពច្រើន នៅក្នុងការប្រកួតប្រជែង ជាមួយគណបក្សកាន់អំណាច គឺគណបក្សប្រជាជន បើសិនជាពួកគេអាចរួបរួមបង្កើតគណបក្សនយោបាយដ៏ធំមួយ និងមានរចនាសម្ព័ន្ឋដ៏រឹងមាំ ដែលអាចតាក់តែងចេញជាកម្មវិធី និងយុទ្ឋសាស្ត្រនយោបាយយ៉ាងមានប្រសិទ្ធភាព ។
ស្ថានភាពនយោបាយចង្អុលបង្ហាញថា វានឹងមិនអាចទៅរួចឡើយ ចំពោះសេណារីយ៉ូមួយ ដែលចង់អោយសង្គ្រោះជាតិរស់ឡើងវិញ ជាមួយនឹងវត្តមានពេញលេញទាំងសម រង្ស៊ី និងកឹម សុខា នៅក្នុងនយោបាយ។
ដូច្នេះ ស្ថានភាពនយោបាយប្រហែលជាបានដើរចេញឆ្ងាយហើយ ពីលោកសម រង្ស៊ី បើសិនជាពិនិត្យមើល ការសម្រេចចិត្តដ៏មុតមាំរបស់បុរសខ្លាំង គឺសម្តេចតេជោ ហ៊ុន សែន ។
សេណារីយ៉ូនយោបាយ ដែលអាចកើតមាន គឺនឹងមានការសម្របសម្រួលផ្នែកនយោបាយ ដើម្បីអាចឈានដល់ការផ្តល់សិទ្ធិពេញលេញ ដល់លោកកឹម សុខា ដើម្បីចាប់ផ្តើមជីវភាពនយោបាយថ្មី និងបង្កើតគណបក្សនយោបាយថ្មី ឬក៏វិលទៅរកគណបក្សសិទ្ធិមនុស្សរបស់លោកវិញ ។ ប៉ុន្តែវានៅតែចំណុះថា
តើសម្តេចតេជោនឹងព្រមធ្វើការសម្របសម្រួលណាមួយឬអត់ បន្ទាប់ពីការសម្រេចចិត្តរបស់តុលាការ។
សេណារីយ៉ូនយោបាយមួយទៀតនឹងអាចកើតមាន បើសិនជាសន្លឹកបៀនយោបាយរបស់លោក កឹម សុខាត្រូវបានធីបចោល។ នៅក្នុងករណីនេះ អ្នកនយោបាយប្រឆាំងផ្សេងទៀតក៏អាច ធ្វើការសម្រេច ចិត្តអោយទាន់ពេលវេលា ដើម្បីមានសិទ្ធិនយោបាយពេញលេញ និងបង្កើតគណបក្សនយោបាយថ្មីមួយដ៏រឹងមាំប្រកួតជាមួយគណបក្សប្រជាជនកម្ពុជា។
អ្នកនយោបាយត្រូវតែមានក្រឡាអុកនយោបាយច្រើនបែប ។ បើសិនជាស្ថានភាពតម្រូវអោយគ្មាន សម
រង្ស៊ី គេត្រូវតែគូសវាសនយោបាយដែលគ្មាន សម រង្ស៊ី ។ បើសិនជាស្ថានភាពនយោបាយ តម្រូវអោយ គ្មានទាំងសម រង្ស៊ី និងកឹម សុខា គេត្រូវគូសវាសវ៉ៃក្រឡានយោបាយថ្មី ដោយគ្មានអ្នកទាំងពីរ ។
ការធ្វើនយោបាយមិនចំណុះតែលើបុគ្គលម្នាក់ ឬក៏ពីរនាក់នោះឡើយ។ ដូចនៅក្នុងធុរកិច្ចនានា វាទាមទារ ការរៀបចំក្រុមដ៏ខ្លាំងមួយ ដែលជាកម្លាំងនឹងមិនអាចបំបែកបាន និងមានភាពរឹងមាំជាងបុគ្គលិក ។
ការខ្វះរបៀបគិតនៃការរៀបចំក្រឡាអុកនយោបាយ ទៅតាមស្ថានភាពជាក់ស្តែង វានឹងក្លាយជាការធ្វើ អត្តឃាតនយោបាយមួយ ដែលនិឹងមិនគ្រោះថ្នាក់ តែសម្រាប់អ្នកនយោបាយទេ វាថែមទាំងប៉ះពាល់ដល់ ប្រទេសជាតិផងដែរ។
ឥឡូវយើងរង់ចាំមើលទាំងអស់គ្នាថា តើកឹម សុខា នឹងត្រូវធីបចេញពីនយោបាយ ឬក៏អត់ហើយថា តើអ្នកនយោបាយផ្សេងទៀតនឹងបន្តស្ថានភាព ដូចបច្ចុប្បន្ន ឬក៏រៀបចំក្រឡានយោបាយថ្មី ដោយចេញដំណើរគ្មាន សម រង្ស៊ី ឬគ្មានទាំងសម រង្ស៊ី និងកឹម សុខា ៕
ចែករំលែកព័តមាននេះ