ខេត្តកំពង់ឆ្នាំង ៖ យុវជនម្នាក់បានស្លាប់នៅនឹងកន្លែង និងយុវជន២នាក់ទៀតបានរងរបួសជាទម្ងន់ ក្នុងហេតុការណ៍គ្រោះថ្នាក់ចរាចរណ៍មួយបានកើតឡើងនៅវេលាម៉ោង១០និង២០នាទីយប់ថ្ងៃទី១៣ ខែមីនា ឆ្នាំ២០១៩ នៅចំណុចផ្លូវបែកជាបួន មុខភោជនីយដ្ឋានបៃតង ស្ថិតនៅក្នុងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ខណៈដែលម៉ូតូបុកជាមួយរថយន្ត ។
សមត្ថកិច្ចនគរបាលក្រុងកំពង់ឆ្នាំងបានឲ្យដឹងថា ជនរងគ្រោះក្នុងហេតុការណ៍គ្រោះថ្នាក់ចរាចរណ៍ខាងលើមានឈ្មោះ ជួន តារា រស់នៅភូមិធម្មយុត្តិ ជាអ្នកបើកបរម៉ូតូបានស្លាប់នៅនឹងកន្លែង ។ ចំណែកអ្នកជិះពីក្រោយពីរនាក់ម្នាក់ឈ្មោះ យ៉ុន សេងណាតូ និងម្នាក់ទៀតមិនស្គាល់ឈ្មោះ ។ ប្រភពដដែលបានបន្តថា មុនពេលកើតហេតុជនរងគ្រោះទាំង៣នាក់បានជិះម៉ូតូម៉ាកស្ហូម៉ឺអិច មួយគ្រឿង ក្នុងដំណើរពីកើតទៅលិចលុះមកដល់ចំណុចកើតហេតុ ស្រាប់តែមានរថយន្តមួយគ្រឿងទៀតម៉ាកកាមរីគូថប៉ោង ពណ៌ស ពាក់ស្លាកលេខភ្នំពេញ 2E- 1108 បើកបរដោយបុរសឈ្មោះ លី ប៊ុនឡា អាយុ៤៩ឆ្នាំ ជាមន្ត្រីយោធា មានទីលំនៅភូមិស្ពករាជ្យ ឃុំអណ្ដូងស្នាយ ស្រុករលាប្អៀរ បានបុកជាគ្នាជាមួយម៉ូតូក្នុងដំណើរខ្វែងទិសគ្នាយ៉ាងពេញទំហឹង ។
ក្រោយពេលកើតហេតុគេឃើញជនរងគ្រោះឈ្មោះជួង តារា ជាអ្នកបើកបរម៉ូតូបានស្លាប់នៅនឹងកន្លែង ចំណែកឯយុវជនពីរនាក់ទៀតដែលជិះពីក្រោយបានរងរបួសជាទម្ងន់ ហើយត្រូវបានដឹកទៅសង្គ្រោះនៅមន្ទីរពេទ្យខេត្តកំពង់ឆ្នាំង ។
ដោយឡែកអ្នកបើកបររថយន្តឈ្មោះ លី ប៊ុនឡា ត្រូវបានសមត្ថកិច្ចចាប់ឃាត់ខ្លួនយកមកកាន់អធិការដ្ឋាននគរបាលក្រុងកំពង់ឆ្នាំង ដើម្បីបញ្ជូនទៅកាន់ការិយាល័យនគរបាលចរាចរណ៍ផ្លូវគោកនៃស្នងការដ្ឋនានគរបាលខេត្តជាមួយ និងមធ្យោបាយធ្វើដំណើរទាំងពីរគ្រឿង ដើម្បីកសាងសំណុំរឿងតាមនីតិវិធី ។
ករណីគ្រោះថ្នាក់ចរាចរណ៍ខាងលើនេះសមត្ថកិច្ចបានបញ្ជាក់ថា បណ្តាលមកពីខ្វះការប្រុងប្រយ័ត្នទាំងអ្នកបើកម៉ូតូ និងទាំងអ្នកបើកបររថយន្ត ៕
ចែករំលែកព័តមាននេះ