រាជធានីភ្នំពេញ ៖ ក្រសួងបរិស្ថាន បានបន្តទប់ស្កាត់ការបញ្ចេញសំណល់រាវកខ្វក់ចេញពីរោងចក្រ សហគ្រាស និងក្រុមហ៊ុននានា ក្នុងរយៈពេល៩ខែ គិតចាប់ពីខែមករា ដល់ខែកញ្ញា ឆ្នាំ២០២៦ សរុបចំនួន ១៩,៦៨៥,០៨៥ ម៉ែត្រគូប ។ ដោយឡែកគ្រាន់តែក្នុងខែកញ្ញា ឆ្នាំ២០២៦ ក្រសួងបរិស្ថានអនុវត្តយ៉ាងសកម្ម ទប់ស្កាត់ទឹកកខ្វក់បានចំនួនជាង ២,២២ លានម៉ែត្រគូប ។
ក្រសួងបរិស្ថាន សម្រេចបានលទ្ធផលនៅក្នុងយុទ្ធនាការ«ផ្ទៃទឹកស្អាត»នេះ ដោយបាន និងកំពុងជំរុញយ៉ាងសកម្ម នូវវិធានការច្បាប់ ដល់ម្ចាស់ក្រុមហ៊ុន រោងចក្រ និងសហគ្រាសនានានៅកម្ពុជា ធ្វើការដំឡើងឧបករណ៍ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ (Automatic Wastewater Quality Monitoring) ដើម្បីតាមដានគុណភាពទឹកកខ្វក់ពីចម្ងាយក្នុងពេលជាក់ស្តែង (Real-time) បានចំនួន ៧២ ក្រុមហ៊ុន និងរោងចក្រ រួចមកហើយ គិតត្រឹមខែកញ្ញា ឆ្នាំ២០៦។ ចំនួននេះមានការកើនឡើងជាលំដាប់ បើប្រៀបធៀបទៅនឹងចុងឆ្នាំ២០២៥ ដែលមានត្រឹមតែ ៥៦ កន្លែង ។
អ្នកនាំពាក្យក្រសួអបរិស្ថាន លោក ខ្វៃ អាទិត្យា បានឱ្យដឹងថា យោងតាមរបាយការណ៍ខាងលើ ទឹកកខ្វក់ប្រមាណ៧០ម៉ឺនម៉ែត្រគូប ត្រូវបានទប់ស្កាត់ជារៀងរាល់ថ្ងៃ មិនឱ្យហូរចូលទៅបំពុលតំបន់ទឹកធម្មជាតិ ប៉ះពាល់បរិស្ថាន និងសុខភាពសាធារណៈ។ អ្នកនាំពាក្យក្រសួអបរិស្ថាន បានថ្លែងអំណរគុណដល់ម្ចាស់រោងចក្រ សហគ្រាស ដែលបានចូលរួមអនុវត្តច្បាប់ និងការលើកកម្ពស់ភាពស្អាតនៅកម្ពុជា ។
លោកបានបន្តថា ក្រសួងបរិស្ថាន នឹងបន្តទប់ស្កាត់ការបញ្ចេញសំណល់រាវ បំពុលទឹកធម្មជាតិបន្ថែមទៀត ដោយបន្តជំរុញលើកទឹកចិត្តដល់រោងចក្រ សហគ្រាសនានា ដែលមានសក្តានុពលប្រភពបំពុល បន្តបំពាក់ឧបករណ៍ស្វ័យត្រួតពិនិត្យ ដើម្បប្រសិទ្ធភាពការងារទប់ស្កាត់ការបំពុលបរិស្ថាន និងជួយឱ្យរោងចក្រ និងក្រុមហ៊ុនខ្លួនឯងអាចគ្រប់គ្រងសំណល់រាវបានត្រឹមត្រូវតាមស្តង់ដារបរិស្ថាន និងស្របតាមក្របបរិស្ថាន និងធនធានធម្មជាតិ និងដើម្បីធានាថា ការបញ្ចេញសំណល់រាវ មិនប៉ះពាល់បរិស្ថាន និងការរស់នៅរបស់ប្រជាពលរដ្ឋ ៕
ចែករំលែកព័តមាននេះ