ខេត្តកោះកុង ៖ សម្តេចតេជោនាយករដ្ឋមន្ត្រីបានបញ្ជាក់ថា កិច្ចសហប្រតិបត្តិការមិត្តភាពសន្តិភាព នៅតាមតំបន់ព្រំដែនបានកំពុងទទួលជោគជ័យហើយ ។ ថ្លែងក្នុងពិធីសំណេះសំណាលជាមួយកម្មករនៅក្នុងខេត្តកោះកុង នាព្រឹកថ្ងៃទី១៣ ខែមីនា ឆ្នាំ២០១៩ សម្តេចតេជោ ហ៊ុន សែន បានឲ្យដឹងថា គោលនយោបាយរបស់រាជរដ្ឋាភិបាលដែលធ្វើឲ្យតំបន់ព្រំដែនទៅជាតំបន់មិត្តភាពសន្តិភាពសហប្រតិបត្តិការ និងការអភិវឌ្ឍបានកំពុងនឹងទទួលជោគជ័យហើយ ។
សម្តេចបញ្ជាក់ថា «ចំណុចសល់បន្តិចបន្តួចនោះជារឿងមួយធម្មតាខ្លាំងណាស់ រវាងប្រទេសមួយ និងប្រទេសមួយ ប៉ុន្តែយើងអត់ធ្មន់ដោះស្រាយដោយសន្តិវិធីនេះ ។ រឿងនេះយើងបានកំពុងតែធ្វើជាមួយប្រទេសជិតខាងរបស់យើង» ។ ជាមួយគ្នានោះដែរសម្តេចក៏បានលើកឡើងថា ពីយុទ្ធសាស្ត្រនៃការរឹតចំណងជាមួយបណ្តាប្រទេសជិតខាងនោះគោលនយោបាយរបស់រាជរដ្ឋាភិបាលក៏នាំមកនូវការជោគជ័យនៅក្នុងខេត្តកោះកុងផងដែរ ។
សម្តេចក៏បានលើកឡើងថា សម្តេចក៏បានស្នើដល់ប្រទេសថៃ (មិត្តថៃ) ឲ្យជួយកសាងផ្លូវជាតិលេខ៤៨ ដែលតភ្ជាប់ពីផ្លូវជាតិលេខ៤ ពីខេត្តព្រះសីហនុទៅតភ្ជាប់នៅខេត្តកោះកុង ។ សម្តេចតេជោ«ខ្ញុំបានដឹងច្បាស់ពីភ័ព្វវេសនារបស់ខេត្តកោះកុង ។ កាលនោះសម្តេចទៀ បាញ់ នៅធ្វើជារដ្ឋមន្ត្រីក្រសួងសាធារណៈនៅឡើយទេ ហើយខ្ញុំមិនទាន់បានយកទៅធ្វើជារដ្ឋមន្ត្រីក្រសួងការពារជាតិនោះទេ» ។ សម្តេចក៏បានរំឮកថា កាលពីថ្ងៃបុណ្យនៅខេត្តកោះកុងកន្លងមកនេះ សម្តេចបានបញ្ជាក់ថា រាជរដ្ឋាភិបាលនឹងធ្វើពីខេត្តកោះកុងទៅកាន់ថ្មដា ខេត្តពោធិសាតិ៍ ហើយទៅភ្ជាប់ខេត្តប៉ៃលិន និងបាត់ដំបងតែម្តង ដើម្បីផ្តល់ភាពងាយស្រួលដល់អ្នកធ្វើដំណើរពីខេត្តកោះកុងចង់ទៅលេងខេត្តពោធិសាតិ៍ ប៉ៃលិន និងបាត់ដំបងបានស្រួល ៕
ចែករំលែកព័តមាននេះ