លោកអ្នកដែលមានអាការៈឈឺផ្សាក្រហាយ ពិបាកនោម ឬនោមញឹកសូមគិតទៅដល់ជំងឺរលាកប្លោកនោម ។ លោកសាស្រ្ដាចារ្យមហាបរិញ្ញាវេជ្ជបណ្ឌិត ថុង សុខហ៊ាន ឯកទេសវះកាត់ជំងឺទូទៅ និងប្រព័ន្ធមូត្រសាស្រ្ដនៃមន្ទីរពេទ្យព្រះកុសុមៈបានប្រាប់កោះសន្ដិភាពថា ជំងឺរលាកប្លោកនោមភាគច្រើនបង្កឡើងដោយមេរោគម៉្យាងឈ្មោះ ECOLI ។ កាលណាមេរោគនេះចូលទៅផ្នែកខាងក្នុងនៃប្លោកនោមបង្កឱ្យរលាកក្រហល់ក្រហាយពេលនោមម្ដងៗ ។
តាមការសិក្សាស្រាវជ្រាវបង្ហាញថា មេរោគ ECOLI ជាមូលហេតុបង្កឱ្យកើតជំងឺរលាកពី៧០ទៅ៨០ភាគរយ ។ មេរោគនេះជ្រៀតចូលទៅក្នុងតម្រងនោមតាមរយៈទ្វារមាសរបស់ស្រ្ដី និងប្រដាប់បន្ដពូជរបស់បុរស ។ មេរោគ ECOLI ច្រើនរស់នៅក្នុងពោះវៀនធំរបស់មនុស្ស កាលណាលោកអ្នកបន្ទោបង់ មេរោគនេះជាប់មកជាមួយលាមក បើមិនបានលាងសម្អាតឱ្យបានស្អាតទេ មេរោគនេះនឹងចូលទៅទ្វារមាសស្រ្ដីបង្កឱ្យកើតជំងឺរលាកប្លោកនោមតែម្ដង ។ ជំងឺរលាកប្លោកនោមតែងកើតមានចំពោះស្រ្ដីច្រើនជាងបុរស ព្រោះផ្លូវលាមកនិងទ្វារមាសរបស់ស្រ្ដីនៅជិតគ្នា ។
លោកវេជ្ជបណ្ឌិតបន្ដថា ចំពោះអាការៈនៃជំងឺរលាកប្លោកនោមមានដូចជា នោមញឹក នោមឈឺ នោមតឹង នោមក្រហាយ នោមផ្សា។ ក្នុងដំណាក់កាលធ្ងន់ធ្ងរអាចបណ្ដាលឱ្យមានឈាមពេលនោម ។
ផលវិបាកនៃជំងឺនេះមានច្រើនដូចជា ៖
កូនក្មេងៈ បើមិនបានព្យាបាលឱ្យបានត្រឹមត្រូវទេ អាចនឹងមានផលវិបាករលាកតម្រងនោម ដុំក្រួសនៅក្នុងប្រព័ន្ធទឹកនោម និងខ្សោយតម្រងនោម ។
ស្រ្ដីវ័យកណ្ដាល ឬស្រ្ដីមានស្វាមីៈ ច្រើនកើតជំងឺរលាកប្លោកនោម និងរលាកទ្វារមាសដែលធ្វើឱ្យអ្នកជំងឺមានអារម្មណ៍ខ្លាចរអានៅពេលរួមភេទ ព្រោះតែមានការឈឺចាប់ ។ ជាងនេះទៀត ស្រ្ដីក៏អាចប្រឈមនឹងបញ្ហាធ្ងន់ធ្ងរមួយចំនួនដូចជា រលាករ៉ាំរ៉ៃ ក្រួសក្នុងប្រព័ន្ធទឹកនោម ខ្សោយតម្រងនោម និងកើតជំងឺស្ដ្រេសដោយសារតែបារម្ភខ្លាំង ។
ស្រ្ដីវ័យចាស់ៈ មិនងាយជាដាច់ទេ ដែលគេហៅថា រលាកប្លោកនោមរ៉ាំរ៉ៃដែលអាចបណ្ដាលឱ្យខ្សោយក្រលៀន និងហៀរនោមដោយមិនដឹងខ្លួន ឬក្អកលេចនោម សូម្បីតែជិះយានរលាក់ក៏លេចនោមដែរ ។
វិធីសាស្រ្ដព្យាបាលចែកចេញជាពីរដំណាក់កាល ៖
រលាកប្លោកនោមថ្មីៗៈ
ស្រ្ដីវ័យក្មេងប្រើថ្នាំតែម្ដងនឹងអាចជាដាច់ ។
ស្រ្ដីវ័យកណ្ដាល ឬស្រ្ដីមានស្វាមីអាចត្រូវព្យាបាលចន្លោះពី១សប្ដាហ៍ទៅ១០សប្ដាហ៍ ។
ស្រ្ដីវ័យចាស់ព្យាបាលដោយប្រើប្រាស់ថ្នាំមានជាតិអ័រម៉ូនធ្វើឱ្យទ្វារមាសសើម បង្កើតមេរោគប្រឆាំងនឹងមេរោគ ECOLI ។
ក្នុងករណីរលាកប្លោកនោមរ៉ាំរ៉ៃៈ
ក្រៅពីប្រើថ្នាំសម្លាប់មេរោគ ECOLI ក៏មានវិធីការពារដូចជា ទាំងបុរសនិងស្រ្ដីមុននឹងក្រោយរួមភេទត្រូវលាងសម្អាតប្រដាប់បន្ដពូជឱ្យស្អាត ។
លោកវេជ្ជបណ្ឌិតបានបញ្ជាក់ថា ដើម្បីការពារកុំឱ្យរលាកប្លោកនោម លោកអ្នកគួរអនុវត្ដតាមវិធីខាងក្រោម ៖
ត្រូវលាងសម្អាតទ្វារមាសជាមួយនឹងសាប៊ូតាមការណែនាំពីគ្រូពេទ្យ ។ លាងសម្អាតបន្ទាប់ពីបត់ជើងតូចនិងបត់ជើងធំរួច ។ គួរជ្រើសរើសសំឡីអនាម័យឱ្យបានត្រឹមត្រូវមានលក្ខណៈខ្ពស់ ។ឈឺនោមត្រូវនោមភ្លាមៗមិនត្រូវទុកយូរឡើយ ។ ស្រ្ដីគ្រប់រូប រាល់ពេលចូលបង្គន់ត្រូវជះទឹកឱ្យស្អាត មុនពេលបន្ទោបង់ ។
មិនត្រូវមានការអៀនខ្មាសទេ នៅពេលមានការសង្ស័យថាកើតជំងឺរលាកតម្រងនោម គួរតែប្រញាប់មកពិភាក្សាជាមួយគ្រូពេទ្យ កុំទុកយូរពិបាកព្យាបាលបង្កទៅជាធ្ងន់ធ្ងរ ។ គួរចងចាំថា ស្ដ្រីដែលមានវ័យចាស់ងាយប្រឈមនឹងជំងឺរលាកប្លោកនោមខ្លាំង ៕
ចែករំលែកព័តមាននេះ