ខេត្តស្ទឹងត្រែង ៖ សិប្បកម្មកែច្នៃឈើខុសច្បាប់២កន្លែង ត្រូវកម្លាំងចម្រុះមាននគរបាលប្រឆាំងបទល្មើសសេដ្ឋកិច្ចខេត្ត សហការជាមួយផ្នែករដ្ឋបាលព្រៃឈើថាឡាបរិវ៉ាត់ ចុះរឹបអូសឈើប្រមាណជាង១០ម៉ែត្រគូប ធ្វើឡើងកាលពីព្រឹកថ្ងៃទី០៦ មីនា ស្ថិតត្រង់ចំណុចខាងក្រោយផ្ទះអ្នកភូមិវាលដេញ ក្នុងឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង ។
លោកវរសេនីយ៍ឯកវ៉ា សុផាន់ នាយការិយាល័យប្រឆាំងបទល្មើសសេដ្ឋកិច្ចខេត្តបានឲ្យដឹងថា ទីតាំងកែច្នៃឈើខុសច្បាប់ខាងលើនេះ បានធ្វើសកម្មភាពជាយូរណាស់មកហើយ នៅក្រោយភូមិវាលដេញ បន្ទាប់ពីសមត្ថកិច្ចចុះស្រាវជ្រាវរកឃើញថា សកម្មភាពកែច្នៃឈើខុសច្បាប់ដោយគ្មានការអនុញ្ញាតពីជំនាញនោះ កម្លាំងរបស់ការិយាល័យប្រឆាំងបទល្មើសសេដ្ឋកិច្ចបានសហការជាមួយរដ្ឋបាលព្រៃឈើស្រុកថាឡាបរិ
វ៉ាត់បានធ្វើការចុះបង្ក្រាបតែម្តង។
លោកបន្តថា ក្នុងការបង្ក្រាបនេះ យើងរកឃើញឈើជាច្រើនប្រភេទ ដូចជាឈើគគីរចឹក សុក្រំ ដួងចែម ដែលក្រុមឈ្មួញបានអាផែ ជាសន្លឹកសន្លឹកដែលមានមុខកាត់ចាប់២០សង់ទីម៉ែត្រ ៣០សង់ទីម៉ែត្រ រហូតដល់៦០សង់ទីម៉ែត្រ កំរាស់៥ហ៊ុន ដែលគេកែច្នៃជាសន្លឹកទ្វារដឹកជញ្ជូនតាមរថយន្តសាំយ៉ុងទៅកាន់ទីផ្សារគោលដៅ ។ ឈើទាំងពីរទីតាំងនេះ ត្រូវបានក្រុមឈ្មួញធ្វើការកាប់ទន្ទ្រានព្រៃឈើរបស់រដ្ឋ អារពុះ ច្រៀកយកមកទុកជាច្រើនគំនរ នៅតាមរោងសិប្បកម្ម ដែលជាប្រភេទឈើលេខ១ និងឈើលេខ២។
គួរបញ្ជាក់ថា ការបង្ក្រាបសិប្បកម្មកែច្នៃខុសច្បាប់ទាំងពីរកន្លែងនេះ មិនត្រូវបានធ្វើការឃាត់ខ្លួនជនសង្ស័យណាម្នាក់នោះទេ គ្រាន់តែធ្វើការរឹបអូសឈើខុសច្បាប់ដឹកជញ្ជូនយកមករក្សាទុកប៉ុណ្ណោះ។
ចែករំលែកព័តមាននេះ