ខេត្តបន្ទាយមានជ័យ ៖ សមណៈសិស្សនិមន្តពីតាមបណ្តាវត្តនានាក្នុងខេត្តបន្ទាយមានជ័យ និងនិមន្តពីបណ្តាខេត្តឧត្តរមានជ័យសរុបចំនួន១៨៤អង្គត្រូវបានចំរៀបការប្រឡងជ្រើសរើសសមណៈសិស្សចូលរៀននៅពុទ្ធិកអនុវិទ្យាល័យសម្តេច ជា ស៊ីម ក្នុងបរិវេណវត្តចម សុធាវាស ហៅ (វត្តស្វាយចាស់) ក្នុងក្រុងសិរីសោភ័ណ ខេត្តបន្ទាយមានជ័យ នាថ្ងៃទី០៦ ខែមីនា ឆ្នាំ២០១៩នេះ ។
បេក្ខជនសមណៈសិស្សចំនួន១២០អង្គ/នាក់ក្នុងឆ្នាំសិក្សា២០១៩ ។ ហើយការប្រឡងនេះ គឺមានរយៈពេលពេញ១មួយថ្ងៃដែលមានវិញ្ញាសារប្រឡងចំនួន៤រួមមាន១-បាលីប្រែលោកប្រយោគ និងវេយ្យករណ៍បាលី ២- ព្រះវិន័យ ៣-គណិតវិទ្យា និង៤- សរេសតាមអាន ។
លោកយិន យឿន ប្រធានមន្ទីរធម្មការ និងសាសនាខេត្តមានប្រសាសន៍ថា ដំណើរប្រឡងនេះជាដំណាក់កាលមួយដ៏សំខាន់សម្រាប់សមណៈសិស្សគ្រប់ព្រះអង្គដែលបានសិក្សារៀនសូត្ររយៈកន្លងមក ដើម្បីធ្វើការវាស់ស្ទង់បង្ហាញពីកម្រិតចំណេះដឹងប្រកបដោយសុវត្ថិខ្ពស់ដែលកើតចេញពីឆន្ទៈ និងការព្យាយាមសិក្សារៀនសូត្ររបស់តេជគុណព្រះគុណម្ចាស់គ្រប់ព្រះអង្គអោយសមស្របតាមពាក្យដំបូន្មានរបស់ព្រះពុទ្ធជាអង្គម្ចាស់ដែលបានបង្ហាត់បង្រៀនព្រះសង្ឃពុទ្ធបរិស័ទឲ្យព្យាយាមមោះមុត ដើម្បីឆ្លងផុតពីភាពអវិជ្ជា ។
លោកយិន យឿន បញ្ជាក់បន្ថែមថា ប្រទេសនីមួយៗលើសកលលោកយើងនេះបើគ្មានធនធានមនុស្សពិតប្រាកដទេប្រទេសនោះ និងជួបភាពក្រីក្រជាក់ជាពុំខាន ។ ហើយត្រូវផ្សារភ្ជាប់ជាមួយនឹងបច្ចេកវិជ្ជាទំនើបផងនោះ ដើម្បីឲ្យកិច្ចការព្រះពុទ្ធសាសនាមានសណ្តាប់ធ្នាប់ល្អធានាបាននៅសាមគ្គីភាពរវាងពុទ្ធសាលនិកជនត្រូវប្រកាន់យកព្រះពុទ្ធ ក្រោមឱវាទធ្វើជាប្រទីបបំភ្លឺផ្លូវសម្រាប់អប់រំចរិយាធម៌ ស្មារតី ជំនះចោលនូវគំនុំការច្រណែននិន្ទាប្រកបដោយអំពើអហិង្សា ។
ចុងក្រោយលោកយិន យឿន សង្ឃឹមជឿទុកចិត្តដល់សមណៈសិស្សទាំងអស់ពិតជាទទួលបានជោគជ័យ ដើម្បីបន្តការសិក្សាកំរិតថ្នាក់ខ្ពស់ៗ បន្តរៀនសូត្រឲ្យបានចប់មហាវិទ្យាល័យ ព្រោះថាការតស៊ូរៀនសូត្រពិតជាមានសារៈសំខាន់ណាស់ជាធនធានមនុស្សប្រកបដោយចំណេះដឹង ដើម្បីចូលប្រឡូកក្នុងសង្គមជាតិយើងឲ្យបានប្រសើរឡើង ៕
ចែករំលែកព័តមាននេះ