ប្រចៀវគឺជាសត្វស្លាបម្យ៉ាងដែលមានក្លិនឆ្អេះ ប៉ុន្តែវាក៏ជាសត្វមានប្រយោជន៍ដែរ គឺវាអាចស៊ីសត្វល្អិតចង្រៃមួយចំនួន ហើយលាមករបស់សត្វប្រចៀវផ្តល់ជីវជាតិដ៏សំខាន់ណាស់ដល់ការលូតលាស់របស់ដំណាំគ្រប់ប្រភេទ។ នេះបើយោងតាមគេហទំព័រក្រសួងកសិកម្ម រុក្ខាប្រមាញ់ និងនេសាទ ។
មុននឹងចិញ្ចឹមយើងត្រូវសង្កេតមើលភូមិណា ឬកន្លែងណាមានក្រចៀវរស់នៅទើបអាចផ្សាំងឱ្យវាស្គាល់កន្លែងសិន ប៉ុន្តែបើកន្លែងនោះពុំមានប្រចៀវរស់នៅទេ យើងមិនអាចធ្វើសំបុកបានទេ ។ យើងត្រូវកាប់ស្លឹកត្នោតឱ្យធ្លាក់សំយាកចុះមកក្រោមទាំងស្លឹកស្រស់ ឬងាប់ឱ្យមានភាពស៊ុបទ្រុប ទើបអាចទាក់ទាញឱ្យសត្វប្រច្រៀវមករស់នៅបាន ។ យើងអាចធ្វើជាសំបុកអំពីឈើដែលមានបណ្តោយ២ម៉ែត្រ ទទឹង២ម៉ែត្រ ហើយដំឈើប្រទាក់គ្នាជាស៊ុមដើម្បីពាក់ធាងត្នោតធ្វើជាជំរកដោយប្រើធាងត្នោតអស់១៦០ធាង។ ចំពោះឈើយកមកធ្វើស៊ុមត្រូវយកឈើល្អខ្លឹមប្រភទអ្វីក៏បានដូចជា ត្នោត ដូង ។ល។ ដើម្បីប្រើបានយូរឱ្យប្រចៀវរស់នៅបាន៣-៤ឆ្នាំ។
នៅពេលប្រមូលអាចម៌ប្រចៀវ គឺពេលភ្លឺឡើងប្រចៀវជុះអាចម៌ពេញក្រោមដើមឈើដែលដែលបានសំបុក ហើយក្រោមដើមឈើនោះត្រូវជំរះស្មៅជុំវិញគល់ឆើឱ្យស្អាតចម្ងាយពី២ម៉ែត្រដើម្បីងាយស្រួលប្រមូលលាមកប្រចៀវ ។ ហើយការប្រមូលអាចម៌ប្រចៀវគឺចាប់ផ្តើមពីម៉ោង១ទៅ២ថ្ងៃត្រង់ ដើម្បីឱ្យលាមកស្ងួតស្រពាន់ (ស្ងួតខ្លាំងអស់ជាតិទឹកនោម) ក្រោយពីប្រមូលហើយយកទៅទុកក្នុងរោងជីដែលមានដំបូលប្រក់ស្លឹក ជញ្ជាំងឈើព័ទ្ធជុំវិញការពារកំដៅ និងភ្លៀង ដល់ពេលប្រមូលទុកគំនរបានច្រើនអាចច្រកចូលការ៉ុង ដោយ១ការ៉ុងពី៣០-៤០គីឡូក្រាម លក់បានតម្លៃ៤ម៉ឺនរៀលក្នុង១ការ៉ុង។ ប៉ុន្តែបើនៅខែរងា ឬរដូវភ្លៀងវិញប្រចៀវពុំសូវមានលាមកទេ ព្រោះពុំសូវមានសត្វល្អិតស៊ី តែបើអាកាសធាតុពុំសូវល្អ គឺវាសំងំក្នុងសំបុកតែម្តងមិនចេញរកចំណីឡើយ លុះត្រាតែមេឃស្រឡះទើបវាចេញ ។
បើនិយាយពីលាមកប្រចៀវនេះវិញ ពិតជាមានប្រយោជន៍ណាស់សម្រាប់ការដាំដំណាំគ្រប់ប្រភេទឱ្យមានប្រសិទ្ធភាព ហើយដើម្បីប្រើប្រាស់លើដំណាំផ្សេងៗ ដំបូងត្រូវយកជីនោះទៅផ្ងំឱ្យកាច់សិនដោយលាយជាមួយលាមកសត្វផ្សេងៗ គឺយកលាមកប្រចៀវ១ការ៉ុងលាយជាមួយលាមកគោ១រទេះច្របល់ចូលគ្នាឱ្យសព្វ រួចស្រោចទឹកឱ្យជោកទើបយកក្រណាត់កៅស៊ូគ្របឱ្យជិតរក្សាទុករយៈពេល៥ទៅ៧ថ្ងៃ តើបយកអាចយកទៅប្រើលើដំណាំគ្រប់ប្រភេទបាន ហើយដំណាំរបស់អ្នកប្រាកដជាលូតលាស់បានល្អណាស់។
ចែករំលែកព័តមាននេះ