រាជធានីភ្នំពេញ ៖ ព្រៃនៅក្នុងដីឡូតិ៍មួយកន្លែងនៅតាមផ្លូវសម្តេចជាស៊ីម ក្នុងភូមិក្រុងថ្មី សង្កាត់គោកឃ្លាង ខណ្ឌសែនសុខ ត្រូវភ្លើងឆាបឆេះរាលដាល់យ៉ាងសន្ធោសន្ធៅទៅជិតដល់លំនៅឋានប្រជាពលរដ្ឋ ហើយត្រូវបានអាជ្ញាធរ និងសមត្ថកិច្ចហៅរថយន្តពន្លត់អគ្គិភ័យទៅជួយអន្តរាគមន៍ទាន់ ។ ហេតុការណ៍នោះបង្កអោយមានការភ្ញាក់ផ្អើល កាលពីវេលាម៉ោង៣និង៣០នាទីរសៀល ថ្ងៃទី២៨ ខែកុម្ភៈ ឆ្នាំ២០១៩ ។
ទោះបីជាយ៉ាងណាប្រជាពលរដ្ឋ អាជ្ញាធរ និងនគរបាលបាននាំគ្នាជួយបាញ់ពន្លត់ទាន់ ពុំបណ្តាលអោយភ្លើងឆេះរាលដាល់ដល់លំនៅឋាននៅក្បែរនោះឡើយ ។ តាមប្រជាពលរដ្ឋបានអោយដឹងថា នៅមុនពេលកើតហេតុគេឃើញភ្លើងបានឆេះចេញពីព្រៃនៅក្នុងដីឡូត៍ផ្នែកខាងលិចជាប់ផ្ទះជួលរបស់ប្រជាពលរដ្ឋ ហើយបានឆេះរាលដាល់យ៉ាងរហ័សពេញដីឡូត៍ទាំងមូលប្រមាណជាង១ហិកតា ។
តាមព័ត៌មានបានអោយដឹងទៀតថា ខណៈនោះភ្លើងបានឆេះទៅដល់ផ្នែកខាងមុខដីឡូតិ៍ យ៉ាងសន្ធោសន្ធៅជិតខ្សែភ្លើង និងឆេះរាលដាល់ទៅជិតផ្ទះប្រជាពលរដ្ឋជាហេតុធ្វើអោយប្រជាពលរដ្ឋនាំគ្នាភ័យស្លន់ស្លោនាំគ្នាជួយជញ្ជូនអីវ៉ាន់ចេញ ។ ភ្លាមៗនោះរថយន្តបានមកអន្តរាគមន៍ចំនួន៥គ្រឿងបានទៅអន្តរាគមន៍ទាន់ពេល ពុំបណ្តាលអោយឆេះរាលដាល់ដល់លំនៅឋានប្រជាពលរដ្ឋឡើយ ។ ទាក់ទិនការកើតមានអគ្គិភ័យឆេះព្រៃនេះសមត្ថកិច្ចមានការសង្ស័យថា មានគេដុតសំរាម ឬបោះកន្ទុយបារីទៅក្នុងដីឡូតិ៍ជាហេតុធ្វើអោយភ្លើងឆាបឆេះតែម្តង៕
ចែករំលែកព័តមាននេះ