ខេត្តប៉ៃលិន ៖ ដោយសារនៅរដូវប្រាំងនាឆ្នាំ២០១៩នេះអាកាសធាតុកាន់តែក្តៅខ្លាំងឡើងៗ ស្ទើររលាកស្បែកមនុស្សទើបអាជ្ញាធរខេត្តបានរៀបចំធ្វើកម្មវិធីអបអរសាទរទិវាជាតិបង្ការ និងពន្លត់អគ្គិភ័យលើកទី០៤ ដែលពិធីនេះបានធ្វើឡើង កាលពីព្រឹកថ្ងៃទី២៣ ខែកុម្ភៈ ឆ្នាំ២០១៩ ស្ថិតនៅក្រោមអធិបតីភាពឯកឧត្តម ផាន់ ចាន់ធុល អភិបាលនៃគណៈអភិបាលខេត្ដប៉ៃលិន ឯកឧត្តម ឡី ចាន់ឆាយ ប្រធានក្រុមព្រឹក្សាខេត្តប៉ៃលិន ។
ដោយមានការអញ្ជើញចូលរួមពីលោកឧត្ដមសេនីយ៍ទោ សេង សុគន្ធ ស្នងការនៃស្នងការដ្ឋាននគរបាលខេត្តប៉ៃលិន ។ លោកឧត្ដមសេនីយត្រី ស៊ិន សុភាលក្ម្សី ស្នងការរងទទួលផែនការងារអាវុធគ្រឿងផ្ទុះ និងអគ្គិភ័យបានឡើងអានរបាយការណ៍ស្ដីពីការបង្ការ និងពន្លត់អគ្គិភ័យក៏ដូចជា ការចុះត្រួតពិនិត្យនៅតាមរមណីយដ្ឋានផ្ទះសំណាក់ សណ្ឋាគារ ស្ថានីយ៍ប្រេងឥន្ធនៈ និងការចុះពន្យល់ដល់ប្រជាពលរដ្ឋនៅគ្រប់តំបន់ក្នុងខេត្តផងដែរ ។
ចំណែកឯកឧត្តម ផាន់ ចាន់ធុល អភិបាលនៃគណៈអភិបាលខេត្ដប៉ៃលិនក៏បានឡើងថ្លែងសន្ទរកថា និងមានមតិសំណេះសំណាលសួរសុខទុក្ខដល់កងកម្លាំងប្រដាប់អាវុធថា ត្រូវឱ្យបងប្អូនប្រជាពលរដ្ឋមានការប្រុងប្រយ័ត្នខ្ពស់បំផុត ចំពោះអគ្គិភ័យដោយមុននឹងចាកចេញពីផ្ទះ ត្រូវបិទកុងតាក់ និងគប់ភ្លើងអគ្គិសនីឱ្យបានត្រឹមត្រូវមិនត្រូវដុតធូបទៀនចោល នៅក្នុងផ្ទះ ដោយអត់មានអ្នកមើលការខុសត្រូវនោះឡើយ ។
ប្រភពបន្តទៀតថា ម្យ៉ាងវិញទៀតការប្រើចង្ក្រានហ្គាសកំប៉ុងហ្គាសក្នុងការដាំបាយធ្វើម្ហូបអាហារត្រូវតែត្រួតពិនិត្យឱ្យបានត្រឹមត្រូវច្បាស់លាស់ បើសិនជាមានចេញខ្យល់ហ្គាសប្រគាប់ពន្លត់ភ្លាមៗ ហើយបើសិនជាប្រើមិនស្រួលទេត្រូវតែឱ្យជាងជួសជុលឱ្យបានស្អាតសារជាថ្មីឡើងវិញ ជៀសវាងពេលបង្កទៅជាភ្លើងអគ្គិភ័យឆាបឆេះដល់ផ្ទះរបស់ខ្លួន និងរាលដាលដល់ផ្ទះប្រជាពលរដ្ឋផ្សេងៗទៀតនាំឱ្យអន្តរាយខាតបង់ទ្រព្យសម្បត្តិខ្លួនឯង និងអ្នកដទៃផងដែរ ។ លើសពីនេះបច្ចុប្បន្ននារដូវប្រាំងនាឆ្នាំថ្មីនេះអាកាសធាតុមានការក្តៅខ្លាំងកើនឡើងគួរឱ្យកត់សម្គាល់អាចនឹងងាយក្នុងការបង្កឱ្យឆាបឆេះបើសិនជាមានករណីអគ្គិភ័យកើតនៅក្នុងផ្ទះប្រជាពលរដ្ឋណាមួយក្នុងខេត្ត ។
លោកបញ្ជាក់ថា ការឆាបឆេះដោយសារភ្លើងពិតជាមិនសល់អ្វីនោះឡើយ ដូច្នេះហើយទើប សុភាសិតខ្មែរបុរាណបានលើកឡើងថា «ស៊ូស្លាប់បាកុំឱ្យស្លាប់មេ ស៊ូលិចទូកកណ្តាលទន្លេកុំឱ្យភ្លើងឆេះផ្ទះ» ក្រោយមកកម្លាំងជំនាញការិយាល័យបង្ការ និងពន្លត់អគ្គិភ័យរួមជាមួយកម្លាំងប្រជាការពារភូមិបានសម្ដែងនូវសកម្មភាពពន្លត់អគ្គិភ័យជាក់ស្ដែងជូនគណអធិបតីមើល និងដើម្បីរៀនមើល ហើយធ្វើតាមជាកិច្ចបញ្ចប់កម្មវិធី ។
សូមបញ្ជាក់ថា នៅដើមឆ្នាំ២០១៩នេះករណីអគ្គិភ័យឆាបឆេះផ្ទះប្រជាពលរដ្ឋមានចំនួន១ដងរួចមកហើយក៏មានករណីឆាបឆេះចម្ការប្រជាពលរដ្ឋ២លើកមកហើយដែរ តែមិនបង្កឱ្យនរណាម្នាក់ស្លាប់បាត់បង់ជីវិតនោះទេគ្រាន់តែខូចខាតសម្ភារអស់ថវិកាជាច្រើន និងខ្ទេចខ្ទីដំណាំផងដែរ ៕
ចែករំលែកព័តមាននេះ